VOV4.Sêdang - Kơxo lơ 9/4/2021, a Tíu xiâm Đảng, Khu xiâm kal kí hiăng hôp ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng vâ tơpui tơno ‘na mâu  tơdroăng ƀă  tơdroăng pơkuâ, hnê mơhno  tơdroăng pêi cheăng pái khế  apoăng hơnăm 2021 ƀă mâu hnoăng cheăng ki xiâm la ngiâ. Khu xiâm kal kí môi tuăn mơnhên, Khu xiâm pơkuâ Tơnêi têa, Khu xiâm kal kí, Khu pơkuâ hnê ngăn Đảng, Kuô̆k hô̆i, Kăn xiâm hnê ngăn tơnêi têa, Chin phuh, mâu khu râ, mâu kơvâ cheăng hiăng pơkuâ, hnê mơhno châ tơƀrê, tơkŭm châ tơƀrê Hneăng hôp XIII dêi Đảng ƀă kêi đeăng hnoăng cheăng ki kal ‘na mơjiâng Đảng ƀă  tơdroăng cheăng kal kí, mơnhông mơdêk cheăng kâ – rêh ối pơlê pơla, cheăng lêng, gâk kring, tơpui ƀă kong têa ê. Tung la ngiâ, mâu khu râ, mâu kơvâ cheăng kal pơtối mơnhông mâu  tơdroăng châ tơƀrê, rĕng tah lôi mâu  tơdroăng ki tá hâi tơtro, pá puât, pơloăng mớnua; pơtối hnê mơhno pêi pro Pơkâ hneăng hôp má XIII dêi Đảng ƀă  tơdroăng mơ-eăm kêi đeăng mâu pơkâ xiâm, hnoăng cheăng pơkâ mơ’no tung hơnăm 2021. Tung mê, kal tơkŭm hnê mơhno châ tơƀrê blêi trâng  roh tâ phĭu rah xo Kuô̆k hô̆i hneăng má XV ƀă Hô̆i đông kuăn pơlê mâu râ hneăng hơnăm 2021 – 2026.

A Sa Ly tơplôu ƀă tơbleăng