VOV4.Sêdang - Kơxo lơ 12/5, Khu xiâm kŏng an tơkŭm po hôp mơ’no tơdrêng tung lâp tơnêi têa tơpui tơdroăng, pơcháu cheăng pêi ƀă ăm mâu lêng kring vế vâ rak tơniăn tung hâi tâ phĭu rah xo kăn Kuô̆k hô̆i hneăng 15 ƀă Hô̆i đong rêm râ hneăng hơnăm 2021- 2026. Troh veăng hôp ƀă tơbleăng a hneăng hôp, pôa Vương Đình Huệ, Kăn xiâm hnê ngăn Kuô̆k hô̆i khĕn kơdeăn khât mâu hnoăng cheăng, tơdroăng ki hiăng pêi tơ-ƀrê, ki hbrâ rơnáu, mơ-eăm dêi tâi tâng mâu lêng kŏng an kuăn pơlê ƀă mâu ngế tung tơdroăng tơbleăng kring tơniăn tung hâi tâ phĭu, hâi leh dêi tâi tâng kuăn pơlê, pêi pro pêi châ tơ-ƀrê hneăng tâ phĭu.

Pôa Vương Đình Huệ, Kăn xiâm hnê ngăn Kuô̆k hô̆i tối tơbleăng a hneăng hôp

Pôa Vương Đình Huệ, Kăn xiâm hnê ngăn Kuô̆k hô̆i tối nhên kal thế hnê mơhno pêi ‘na tơdroăng ai pơxúa, ki kal dêi tơdroăng kring tơniăn tung hâi tâ phĭu. Khu xiâm kŏng an pơtối tơrŭm krá ƀă ƀă mâu khu râ kơvâ cheăng dêi Hô̆i đong Tâ phĭu tơnêi têa, Khu xiâm pơkuâ ngăn lêng, Khu xiâm ngăn pơkeăng pơlât, Khu kăn Đảng kong pơlê, khu kăn Đảng pơlê kong kơdrâm, Vi ƀan hnê ngăn kuăn pơlê, Vi ƀan  ngăn tâ phĭu rêm râ séa ngăn nhên mâu hnoăng cheăng pêi vâ tơniăn ƀă kô pêi klêi tơ-ƀrê hnoăng cheăng tung hâi tâ phĭu.

Gương tơplôu ƀă tơbleăng