.VOV4.Sêdang - Pôa Lê Văn Thanh, Ngế xiâm phŏ pơkuâ cheăng pêi – Mô đô̆i rong râ ƀă Pơlê pơla nếo ai roh pêi cheăng ƀă Vi ƀan kong pơlê Dak Lak ‘na tơdroăng séa ngăn tơdroăng pêi pro tiô troăng hơlâ, tơdroăng ‘na kơdroh kơtiê, mâu ngế pêi cheăng, cheăng pêi a kong pơlê Dak Lak. Hneăng hơnăm 2016 – 2020 Dak Lak hiăng ‘măn vâ chê 900 rơtal liăn ăm Tơdroăng pơkâ xiâm tơnêi têa kơdroh kơtiê krá tơniăn.

Tâ tá chôu phut hôp

Kơxô̆ liăn ki kố hiăng kum Dak Lak mơ’no liăn pro tơ’nôm hngêi trăng, troăng klông tŏng kum mơnhông mơjiâng pro kế tơmeăm khoăng, tăng hên cheăng pêi, po rơdâ túa pêi kơdroh kơtiê, pêi pro troăng hơlâ tŏng kum liăn kơjo mơnhông pêi kâ, tŏng kum ‘na hnê hriâm, khăm pơlât, mơgrúa hyôh kong prâi, hngêi ối ƀă hía hé.

Tung 5 hơnăm hiăng luâ, vâ chê 252 rơpâu roh rơpŏng kơtiê ƀă mâu ngế ai troăng hơlâ tơnêi têa tŏng kum châ mung liăn hngêi arak liăn ƀă kơxô̆ liăn vâ chê 7 rơpâu rơtal liăn. Pôa Lê Văn Thanh, Ngế xiâm phŏ pơkuâ Cheăng pêi – Mô đô̆i rong râ ƀă rêh ối pơlê pơla kheăn kơdeăn mâu tơdroăng mơ-eăm tung tơdroăng kơdroh kơtiê ƀă tăng cheăng pêi ăm mâu ngế pêi cheăng a kong pơlê Dak Lak, laga vâ kơdroh kơtiê krá tơniăn, Dak Lak kal thế pơkâ troăng pêi ton xŏn ki nhên ƀă thế pôu râng hnoăng cheăng ăm ngế ối ako dêi kong pơlê.

Tơdrêng amê, kal pêi pro hên túa tŏng kum kuăn pơlê veăng pêi kâ, mơnhên tơdroăng mơngế pêi cheăng vâ ai troăng hnê mơjiâng cheăng pêi, tŏng kum ti tăng cheăng pêi tơtro.

A Sa Ly tơplôu ƀă tơbleăng