VOV4.Sedang - Pơkuâ po rôh hôp Khu hnê mơhno cheăng tơnêi têa ‘na hbrâ mơdât pơreăng COVID-19 po a kơxê lơ 21/5 a tíu pêi cheăng Chin phuh, pôa Vũ Đức Đam, Ngế pro xiâm hnê ngăn tơnêi têa, kăn xiâm hnê mơhno tơnêi têa pơkâ thế kong pơlê Bắc Giang rak ngăn kơtăng kơxô̆ kŏng nhân tung kơpong klâ krê pơlê pơla, kơdroh iâ má môi ki tâ tú dêi pơreăng tung pơlê pơla. Kong pơlê Bắc Giang xuân dế cho tíu ki ai pơreăng hên má môi nôkố.

Mê troh nôkố, ai lối 12 rơpâu ngế pêi cheăng cho kong pơlê ki ê dế ối a mâu kơpong klâ krê pơlê pơla dêi Bắc Giang. Kong pơlê hiăng mơjiâng khu tŏng kum tơdroăng rêh ối ăm mâu kŏng nhân akố. Tơdroăng ki rơhêng vâ ‘nâi plĕng nôkố cho pro tiah lâi vâ kum mâu khu mơdró kâ ối tung tơdroăng ki tŏng kum mâu grup pơkuâ ki kân môi tiah Sam Sung rĕng vêh pêi cheăng nếo klêi kơ’nâi hâi khế kơpong cheăng ƀă kơmăi kơmok pơtê pêi cheăng xua ai pơreăng.

Ngế pro xiâm phŏ hnê ngăn tơnêi têa pơchân mâu kong pơlê, pơlê kong kân séa ngăn kơtăng tíu ki ai pơreăng ki nếo ƀă mâu kŏng nhân sap ing kơpong ki ai pơreăng vêh.

Katarina Nga tơplôu ƀă tơbleăng