VOV4.Sêdang - Yăo sư, Tiê̆n sih Nguyễn Thanh Long, ngế xiâm ngăn pơkeăng ƀă khăm pơlât nếo trâm mâ, tơpui tơno ƀă kăn pơkuâ mâu hngêi pơkeăng, tíu khăm pơlât a Pơlê kong kân Hồ Chí Minh ‘na hnoăng cheăng hbrâ mơdât pơreăng COVID-19. Ngế xiâm ngăn pơkeăng ƀă khăm pơlât pơkâ thế mâu kăn pơkuâ ƀă mâu hngêi pơkeăng, tíu khăm pơlât krê pơtối tơdjuôm ivá, môi hiâm mơno veăng kum rơtế ƀă pơlê kong kân tung hbrâ mơdât pơreăng, malối cho tung pơlât, rak ngăn ivá châ chăn ăm mâu ngế ki tâ COVID-19 vâ pơlê kong kân tơkâ luâ hneăng ki xơpá kố.

Pôa Nguyễn Thanh Long, ngế xiâm ngăn pơkeăng ƀă khăm pơlât pêi cheăng a Pơlê kong kân Hồ Chí Minh

Ngế xiâm ngăn pơkeăng ƀă khăm pơlât tối, rơhêng vâ mâu hngêi pơkeăng, mâu tíu khăm pơlât krê athế chêh inâi ƀă Khu xiâm ngăn pơkeăng ƀă khăm pơlât Pơlê kong kân Hồ Chí Minh kơxô̆ xoăng koi kum ăm tơdroăng ki rak ngăn ivá tiah hmâ ƀă kơxô̆ xoăng koi ăm tơdroăng ki pơlât mâu ngế ki tâ COVID-19.

Tung kơxô̆ xoăng koi chêh inâi dêi kơpong ngăn pơkeăng krê, pơlê kong kân kô châ tơkŭm tâi tâng kơxô̆ xoăng koi pơlât mâu ngế ki tâ pơreăng COVID-19 ƀă kô tơrŭm xing xoăng mâu ngế ki tâ pơreăng.

Katarina Nga tơplôu ƀă tơbleăng