VOV4.Sêdang –Kơxo kố, lơ 27/3, Khu xiâm pơkuâ cheăng Đảng tơkŭm po hneăng hôp mơ’no tơdrêng tung um tơvi lâp tơnêi têa hriăn plĕng, hriâm tâp, hlê plĕng, pơtâng tối Pơkâ Hneăng hôp roh má XIII dêi Đảng. Hneăng hôp tơkŭm po tung 2 hâi (lơ 27 ƀă 28/3) ƀă tíu hrik hyôh ki xiâm cho a Ƀơrô hôp Diên Hồng, Hngêi Kuô̆k hô̆i, pơlê kong xiâm Hà Nội ƀă tíu hrik hyôh a mâu Tĭnh ŭi, Đảng ŭi ối tung tơnêi têa; tíu hrik hyôh a mâu khu xiâm, kơvâ cheăng, mâu tíu pêi cheăng ối tung Tơnêi têa ƀă mâu tíu hrik hyôh mâu kơ koan cheăng a mâu tíu ai tŭm kơmăi kơmok kih thuât.

Hneăng hôp roh má XIII dêi Đảng.

A hneăng hôp, mâu Kăn cheăng tung Khu xiâm kal kí kô pơtâng tối mâu tơbleăng, mê cho: Tơbleăng kal kí dêi Khu xiâm pơkuâ Đảng hneăng má XII a Hneăng hôp roh má XIII dêi Đảng; Troăng pêi ton xŏn mơnhông mơdêk cheăng kâ – rêh ối pơlê pơla 10 hơnăm 2021 – 2030 ƀă pơkâ mơnhông mơdêk cheăng kâ – rêh ối pơlê pơla 5 hơnăm 2021 – 2025; Tơbleăng mơgêi  tơdroăng mơjiâng Đảng ƀa pêi pro troăng pơkâ pêi dêi Đảng dêi Khu xiâm pơkuâ tơnêi têa hneăng má XII a Hneăng hôp roh má XIII dêi Đảng; mâu  tơdroăng hlê plĕng nếo ƀă troăng tơmiêt nếo ‘na cheăng lêng gâk kring a Việt Nam; mâu  tơdroăng hlê plĕng nếo ƀă troăng tơmiêt nếo ‘na gâk kring tơnêi têa ƀă hía hé.

Sa Ly tơplôu ƀă tơbleăng