VOV4.Sêdang - Kơxê lơ 11/6, Khu xiâm râng liăn hiăng tơkŭm po Leh tơdah xo liăn tơlo ăm Khu râng liăn roê vaccine hbrâ mơdât COVID-19 sap ing mâu khu tơrŭm ƀă khu mơdró kâ. Pôa Hồ Đức Phớc, Ngế xiâm ngăn liăn ngân tơnêi têa hiăng châ hlo ƀă diêp Hlá mơ-éa mơnhên tơlo dêi mâu khu ki tŏng kum. A rôh leh, Hồ Đức Phớc prếi kăn pơkuâ Khu râng liăn hiăng tơdah xo kơxô̆ liăn tơlo kum dêi 5 khu ki tŏng kum ƀă kơxô̆ liăn lối 320 rơtal liăn.

Teăng mâ mâu kăn ƀô̆, mơngế cheăng khu pơkuâ Hnôu ‘măn rak liăn Tơnêi têa, pôa Nguyễn Đức Chi, kăn pơkuâ xuân hiăng diâp ăm khu râng liăn ƀă kơxô̆ liăn veăng kum ai 3 rơtal 450 rơtuh liăn. Pôa Hồ Đức Phớc mơnhên tối: tung pơla mơjiâng pro, tê mơdró dêi khu mơdró kâ trâm hên xơpá xua pơreăng COVID-19, la hên khu mơdró kâ hiăng mơ-eăm kơdroh hrê, ôh ti xê to rak tơniăn pêi cheăng ki ối xo kơxô̆ liăn veăng kum ăm Khu râng liăn roê vaccine hbrâ mơdât COVID-19.

Katarina Nga tơplôu ƀă tơbleăng