VOV4.Sêdang - Tung tơdroăng cheăng kăch măng dêi tơná, kăn xiâm hnê ngăn tơnêi têa cho pôa Hồ Chí Minh hiăng ‘măn chôu hên tơdroăng ki ôh tá kâi piu ăm giai câ̆p Kŏng nhân ƀă Hâi pêi cheăng lơ 1/5. Tung pơla lăm tăng troăng tŏng xo tơnêi têa, hâi lơ 1/5/1920, pôa Nguyễn Ái Quốc hiăng veăng tung rôh mitting tơbâ hâi pêi cheăng lâp plâi tơnêi rơtế ƀă Khu đảng viên Xah hô̆i Pơhlăng ƀă veăng a rôh hôp pâ thế pơtê pơtroh mơngế tung tơnêi têa.

Hâi lơ 1/5/1942, tiô rơkong krếo thế dêi kăn pơkuâ pơlê kong kân Moskwa prếi ngế ki chêh tơm xo rơkong dêi Quốc tế Kŏng sản, Nguyễn Ái Quốc veăng ƀă tơpui tung rôh mitting tơbâ Hâi pêi cheăng lâp plâi tơnêi lơ 1/5.

*** Klêi kơ’nâi Kăch măng Khế tơheăm châ ƀrê trâng, tơnêi têa châ tơniăn krê, hâi lơ 18/2/1946, Pôa Hồ Chí Minh, Kăn xiâm hnê ngăn tơnêi têa hneăng apoăng hiăng kĭ mơ-éa ‘na mâu hâi pơtê Têt, tơbâ mâu tơdroăng mơnhông tơtêk ƀă leh tơdroăng loi tĭng tiô khôp, tung mê tơbleăng: Hâi lơ 1/5 cho môi tung mâu hâi Leh xiâm ƀă kŏng nhân, pêi cheăng lâp tơnêi têa châ pơtê môi hâi laga ối châ mơhá liăn khế”. Sap ing kố, hâi lơ 1/5 châ ngăn cho môi tung mâu hâi leh xiâm rêm hơnăm dêi Tơnêi têa pin. Hâi lơ 29/4/1945, pôa Hồ Chí Minh kĭ luât 56 pơkâ kŏng nhân châ mơhá liăn khế hâi pơtê Lâp plâi tơnêi pêi cheăng lơ 1/5.

Hâi lơ 1/5/1946, roh apoăng tung tơdroăng mơnhông tơnêi têa pin, hâi Lâp plâi tơnêi pêi cheăng lơ 1/5 châ tơkŭm po tơbâ mit ting kân krip a Hà Nội, veăng amê ai 20 rơpâu ngế kuăn pơlê pêi cheăng.

Gương - A Sa Ly tơplôu ƀă tơbleăng