VOV4.Sêdang - Pơla hdrối kố nah, tơdroăng tơbleăng luât pơkâ tŏng kum dêi tơnêi têa hiăng luâ tơdroăng ki kal. Tung mê thế tối troh tơdroăng mơnhông tơdroăng hnê hriâm- hnê mơjiâng tuăn ngôa rơkê a kơpong hdroâng kuăn ngo ƀă kong ngo. Mơhé hâi lĕm la hiăng ai tiô púi vâ hnê ƀă hriâm.

Hngêi trung phôh thong hdroâng kuăn ngo ai tíu kâ koi ối pơtê kong hâi râ má môi Nậm Búng, cheăm Nậm Búng, tơring Văn Chấn, kong pơlê Yên Bái cho hngêi trung nếo mơjiâng khế 4 hơnăm 2021. Kố xuân cho tíu xah hêi ƀă hriâm tâp dêi mâu vâi o mơngế hdroâng kuăn ngo rêh ối tung cheăm. Hngêi trung ki nếo, kân rơdâ, kơƀăng tăng châ rôe ki nếo cho tơdroăng phiu ro ôh tá xê to ƀă thái cô ƀă hok tro dêi hngêi trung mê cho tơdroăng phiu ro dêi nôu pâ ai kuăn ‘nĕng tiô hriâm. Nôkố vâi hmiân tuăn pơtroh kuăn ‘nĕng xua mâu kuăn ‘nĕng ôh tá tro hngíu a rơnó hngíu, ôh tá tro tô dêi rơnó tô môi tiah a hngêi trung ki ton.

Tiô thái Nguyễn Văn Du, Kăn phŏ pơkuâ hngêi trung tối, nôkố ƀă kuăn ‘nĕng vâi krâ hdroâng kuăn ngo rêh ối rơtâ tá hngêi trung nếo kố mê kô tơniăn tơdroăng xah hêi xuân môi tiah hriâm tâp ăm mâu vâi o hok tro. Laga pakĭng mâu tơdroăng ki tơ’lêi hlâu mê xuân ối amê mâu tơdroăng pá puât ƀă thái, cô ƀă hok tro dêi hngêi trung Nậm Búng kố.

‘’Troăng prôk, têa ô hum rôh jíu dêi mâu muăn mê xuân thế kơnôm hngêi kuăn pơlê, kơxop hlá mơ-éa hriâm mê 100% mâu muăn thế rôe, laga tơdroăng rêh ối dêi kuăn pơlê kơpong kong ngo cho pá puât. Hngêi trung xuân mơhnhôk nôu pâ mơ’no liăn ki phá tơ-ê ƀă péa môn Toán ƀă Tiếng Việt, ƀă kơxop mơ-éa ki ê cho hriâm tiô kơxop hlá mơ-éa dêi cô xua ôh tá châ vâ rôe. 60% mâu muăn ôh tá ai ivá vâ rôe tŭm mâu kơxop mơ-éa’’.

Pôa Nguyễn Văn Tiến, Kăn hnê ngăn cheăm Tiên Nguyên, môi cheăm kơpong kong ngo dêi tơring Quang Bình, kong pơlê Hà Giang tối ăm ‘nâi: Tối vâ tơniăn tíu kâ ối hnối hnê hriâm ăm thái cô ƀă hok tro a mâu hngêi trung tung cheăm mê hiăng tơniăn tŭm, laga ki khât păng ‘nâng mê tơmeăm khoăng tá hâi tŭm, ki rơhêng vâ tối cho kơbong hriâm ƀă mâu hngêi xah hêi pơlê pơla.

Vâ pro ăm i lĕm xuân môi tiah mơjiâng tơ’nôm laga kơxô̆ liăn ôh tá ai, kơxô̆ liăn mơhnhôk tung kuăn pơlê xuân pá xua vâi krâ pơrá cho mơngế hdroâng kuăn ngo ôh tá ai liăn vâ tŏng kum, veăng tơlo. Xua mê, kal khât tơdroăng ki veăng dêi mâu khu râ, mâu kơvâ cheăng pro ti lâi tơniăn hnê ƀă hriâm a tiú kơpong kong ngo ối trâm hên pá puât.

“Kơbong hriâm tá hâi tŭm, kơbong hôp, kơbong pêi cheăng xuân tá hâi tŭm. To lâi hơnăm hdrối cheăm xuân mơhnhôk pơlê pơla veăng tơlo ing nôu pâ hok tro, kăn ƀô̆ ƀă hía hé, laga bu pơtân tê xuân ôh tá krá môi tiah tơmeăm dêi Tơnêi têa pro. Xuân thế tơniăn, lâm hriâm cho thế tơniăn má môi, laga vâ châ tiô ki hôm mê tá hâi châ, xuân tá hâi tŭm, thế mung kơbong pêi cheăng dêi mâu thái cô, hâ ho ‘nâng’’.

Ôh tá tŭm kơxop hlá mơ-éa hriâm, ôh tá tŭm kơbong hriâm, mâu kơbong pêi cheăng mê cho mâu tơdroăng ki mâu hngêi trung a kơpong hơngế hơngo, kơpong vâi krâ hdroâng kuăn ngo xuân dế trâm. Laga ƀă tơdroăng tơmâng tŏng kum dêi Tơnêi têa ƀă mâu troăng hơlâ ki pơxúa, châ tơƀrê rơtế tơdroăng tŏng kum ing mâu kơxô̆ liăn pơlê pơla tung pơla achê kố, tơdroăng kố kô châ tŏng kum. Vâ pro ti lâi ăm mâu vâi o hok tro, mâu nôu pâ hok tro hmiân tuăn ai hngêi trung hriâm tơtro má môi, tơniăn ăm tơdroăng mơjiâng kuăn mơngế ki Đảng ƀă Tơnêi têa tơmâng tŏng kum khât păng ‘nâng.

VOV4 chêh

A Sa Ly tơplôu ƀă tơbleăng