VOV4.Sêdang - Klêi kơ’nâi 9 hâi pêi cheăng pơtối, hneăng hôp má môi, Kuô̆k hô̆i hneăng má 15 hiăng pêi klêi tâi tâng tơdroăng pơkâ mơ’no ƀă ƀlêi chiâng tơniăn lĕm. Tơpui mơgêi hneăng hôp, pôa Vương Đình Huệ, kăn xiâm hnê ngăn Kuô̆k hô̆i krếo thế kuăn pơlê, mâu lêng tung lâp tơnêi têa, mâu khu mơdró kâ, khu tơrŭm, khu pú hên, kuăn pơlê pin a kong têa ê mơdêk khôi túa tơrŭm, pêi pro kơtăng mâu troăng hơlâ pơkâ dêi Đảng, luât dêi Tơnêi têa, tơkŭm kơxô̆ liăn vâ kâi hbrâ mơdât pơreăng COVID-19, rak vế ivá, châ chăn, tơniăn ăm tâi tâng kuăn pơlê.

Rôh hôp má môi, Kuô̆k hô̆i hneăng 15 cho rôh hôp ai hên tơdroăng kal, po tung pơla dế ai pơreăng kân COVID-19 tâ tú rơ- iô, tâ tú rĕng a Pơlê kong kân Hồ Chí Minh, mâu kong pơlê peăng hdroh mơni kô tơ’lêi tâ tú. Mâu kơ koan, khu râ pơkuâ cheăng, mâu ngế ki cheăng plâ mơdât ƀă tá mâu khu xiâm cheăng kal kí dế  mơ-eăm ‘no ivá pêi tơdroăng cheăng hbrâ mơdât pơreăng vâ kring vế ivá, tơdroăng rêh ối dêi kuăn pơlê.

Hlo ti mê, Kuô̆k hô̆i hiăng môi tuăn po iâ hâi hôp ối 8 hâi tâng vâ pơchông ƀă hdrối nah hlối ‘mâi rơnêu chêh tơdroăng vâ hôp, tơpui tơno ƀă hlối tơ’nôm a tơdroăng pơkâ tơchoâm dêi rôh hôp tơpui mâu tơdroăng kal pêi tơdrêng, hbrâ mơdât pơreăng COVID-19.

Mơgêi rôh hôp má môi, Kuô̆k hô̆i hneăng 15

Tơdroăng mê ăm hlo, Kuô̆k hô̆i hiăng tơpui tro mâu tơdroăng ki hlo ai khât,  pêi thâ rĕng, teăm tơdrêng xúa tơdroăng pơkâ ki hdrối ƀă tâi tâng cho rak ngăn ƀă kring vế ivá dêi kuăn pơlê.

“Hlê nhên mâu tơdroăng xơpá, pơloăng mơnúa kân xua pơkeăng kân COVID-19 Kuô̆k hô̆i, mâu kăn Kuô̆k hô̆i hiăng pơtối rak vế pêi cheăng tro hnoăng cheăng tơná ƀă púi vâ pleăng, xúa tâi hâi chôu, pêi cheăng a chôu ki ê ƀă pêi tơ’nôm mâu hâi pơtê, hơ’lêh nếo, hriăn pêi ki nếo, veăng ‘no hên hnoăng cheăng tơná, ăm tơxâng vâ Kuô̆k hô̆i séa ngăn, tơbleăng hlối môi tuăn ƀă tơdroăng pơkâ 29 ai Pơkâ’’. Hlối teăng hâi tơleăng mơnhên mâu tơdroăng ki kal thế pêi tơdrêng ahdrối, hlối pơkâ mâu tơdroăng ki kal ai pơkâ ton ta ah, veăng pro môi rôh hôp klêi tơniăn tung hên tơdroăng, châ kuăn pơlê ƀă kuăn pơlê tơmâng,hlối vâ môi tuăn veăng tơpui tối’’.

Pôa Vương Đình Huệ, Kăn xiâm hnê ngăn Kuô̆k hô̆i tơpui tơbleăng mơgêi rôh hôp

Rôh hôp apoăng dêi hneăng ki nếo, Kuô̆k hô̆i hiăng pê klêi hnoăng cheăng ki kal cho séa ngăn, pơkâ ‘mâi xing xoăng mơngế ngế pêi cheăng ƀă tâ phĭu, kĭ inâi mâu kăn cheăng tung khu xiâm tơnêi têa, tơniăn tiô pơkâ, tro tơdroăng, tro tiô tơdroăng hiăng pơkâ hdrối, pro hlá mơ-éa tro tiô pơkâ dêi Đảng ƀă luât dêi Tơnêi têa. Ƀă tơdroăng vâ môi tuăn ƀă ai hên ngế vâ, Kuô̆k hô̆i hiăng rah xo Kăn xiâm hnê ngăn tơnêi têa, Kăn xiâm hnê ngăn Kuô̆k hô̆i, Ngế pro xiâm hnê ngăn Chin phuh ƀă mâu kăn xiâm ki ê.

Xuân tơdrêng amê, Kuô̆k hô̆i hiăng séa ngăn, pơkâ mâu tơdroăng  tơdroăng cheăng vâ pêi tung pơla 5 hơnăm 2021-2025; Pơkâ mơnhông cheăng kâ-rêh ối; Pơkâ ‘na liăn ngân tơnêi têa; tơvêh chĕn hnoăng; Pơkâ ‘no liăn cheăng mơjiâng tơmeăm khoăng ton hơnăm. Pakĭng mê, séa ngăn, pơkâ troăng hơlâ ‘no liăn mơjiâng tơmeăm khoăng tiô Tơdroăng pơkâ mơjiâng pro dêi tơnêi têa ‘na mơjiâng thôn pơlê nếo ƀă Tơdroăng pơkâ dêi tơnêi têa xăm kơtiê krá tơniăn ton pơla sap hơnăm 2021-2025.

Tơdroăng séa ngăn, pơkâ tai tâng mâu tơdroăng pơkâ, Tơdroăng pêi cheăng ton tung pơla 5 hơnăm tung rôh hôp ki apoăng dêi hneăng cho mơ-eăm kân dêi Kuô̆k hô̆i, Chin phuh, mâu kơ koan tơrŭm cheăng; ai pơxúa kal khât ƀă tơdroăng mơnhông dêi tơnêi têa, pro tơ’lêi hlâu vâ Chin phuh, mâu kơ koan, mâu kơvâ cheăng, rêm râ, mâu kong pơlê rĕng tơbleăng pêi pro mâu Pơkâ dêi Kuô̆k hô̆i xuân môi tiah Pơkâ Hneăng hôp kân rôh má 13. Tơpui tơno, tối tơdroăng pêi pro tiô pơkâ mơnhông cheăng kâ –rêh ối, liăn ngân tơnêi têa 6 khế apoăng hơnăm ƀă mâu troăng rơhlâ pêi tung 6 khế mơ’nui hơnăm 2021.

Kuô̆k hô̆i khĕn kơdeăn ki mơ-eăm dêi Chin phuh tung tơdroăng hnê mơhno, pơkuâ pêi tiô tơpéa tơdroăng: Hlối hbrâ mơdât pơreăng COVID-19, hlối mơnhông cheăng kâ, pơtối mơdêk, tơmâng khât troh tơdroăng rêh ối, kring vế ivá kuăn pơlê.

Kuô̆k hô̆i thế pêi pro tơdrêng hlối klêi rôh hôp, Chin phuh, Ngế pro xiâm hnê ngăn Chin phuh, mâu kơ koan xiâm tung khu cheăng xiâm tơnêi têa pơtối pơ’lêh nếo, mơdêk ki tơ-ƀrê tung pêi cheăng, mơdêk xoăng râ, xoăng hnoăng pơkuâ cheăng ăm tơtro, rơtế ƀă tơdroăng mơdêk séa ngăn, tí tăng ngăn, rơtế ƀă hnoăng cheăng tối mơnhên dêi khu tơrŭm, mâu ngế, malối mâu ngế ki ối a ko.

Pôa Vương Đình Huệ, Kăn xiâm hnê ngăn Kuô̆k hô̆i thế, mâu kơ koan dêi Kuô̆k hô̆i, Khu kăn Kuô̆k hô̆i ƀă mâu kăn Kuô̆k hô̆i pơtối pơ’lêh nếo rơdêi, mơdêk tơ-ƀrê, pêi cheăng pơxúa tơ-ƀrê, mơdêk hnoăng cheăng séa ngăn tơdroăng pêi pro tiô Pơkâ dêi rôh hôp.

“Pâ thế mâu kăn Kuô̆k hô̆i thâ rĕng tơbleăng ăm kuăn pơlê tung lâp tơnêi têa ‘na tơdroăng tơpui rơhéa a rôh hôp, đi đo rak ki tơrŭm krá ƀă kuăn pơlê. Kuô̆k hô̆i krếo kuăn pơlê, mâu lêng, kuăn pơlê tung lâp tơnêi têa, mâu khu mơdró, kuăn pơlê ki rêh ối a kong têa ê pơtối rak vế tơdroăng hmâ pro ki lĕm sap nah ‘na tơrŭm môi tuăn dêi rơpó, hơ-ui kum dêi rơpó, rơtế ƀă dêi rơpó, nhoăm dêi rơpó, veăng kum, rak vế pêi pro tro mâu troăng rơhlâ dêi Đảng, luât Tơnêi têa, tơkŭm hâi chôu, tơmeăm khoăng ƀă hnoăng cheăng vâ kâi mơdât pơreăng COVID-19, kring vế ivá, tơniăn ăm kuăn pơlê’’.

Ki tơ-ƀrê dêi rôh hôp má môi, Kuô̆k hô̆i hneăng má 15 cho tơdroăng ki pơxiâm tơtro ăm hneăng hôp ki nếo. Ing hnoăng cheăng pêi, hnoăng cheăng pơcháu tiô pơkâ dêi Luât, hlê mâu tơdroăng cheăng pêi ki kal, mâu troăng hơlâ ki kân kal tung Ƀai pơchuât tơbleăng a rôh hôp dêi pôa Nguyễn Phú Trọng, Kăn xiâm pơkuâ hnê ngăn Đảng tung lâp tơnêi têa rôh má 13, ƀă tơdroăng hơ’lêh nếo, đi đo pê klêi, pơtối rak vế tơdroăng tơplâ tơbleăng lĕm 75 hơnăm, ing hnoăng pơkuâ dêi Đảng, tơdroăng rơtế pêi tá tơdroăng kal kí; ki tơrŭm ivá, môi tuăn, nhoăm khât ƀă môi tuăn dêi kuăn pơlê, kuăn pơlê tung lâp tơnêi têa, kuăn pơlê pin ki rêh ối a kong têa ê vâi pú tung lâp plâi tơnêi, Kuô̆k hô̆i hneăng 15 kô pê klêi hnoăng cheăng châ Đảng ƀă kuăn pơlê pơcháu. 

VOV1

Gương tơplôu ƀă tơbleăng