VOV4.Sedang - Tiô inâi tơbleăng kơlo tơxup tơbriât râ kong pơlê PCI hơnăm 2020 dêi Ƀơrô ngăn cheăng kơmăi kơmok ƀă tê mơdró Việt Nam nếo tơbleăng, 4 tung 5 to kong pơlê Tây Nguyên hiăng kơdroh điêm kơxô̆ tâng vâ pơchông ƀă pơchông ƀă hơnăm 2019. 3 to kong pơlê Tây Nguyên tung khu ki chía tơtêk dêi hơnăm 2019, ai 2 kong pơlê chu ối cho khu ki ôh tá tơtêk ƀă ôh tá kơdroh.

3 to kong pơlê Tây Nguyên ai tâi tâng điêm kơxô̆ tơxup hên, ối tung khu chía tơniăn hơnăm 2019 cho Lâm Đồng, Gia Lai ƀă Dak Lak, mê hơnăm kố, bu ai to Lâm Đồng châ ối tung khu ki kố, maluâ hiăng kơdroh 1,8 điêm. Dak Lak ƀă Gia Lai, ƀă kơlo kơdroh cho 1.59 ƀă 2.22 điêm, hiăng ối tung khu ki krâ kơvâ.

Ƀă Gia Lai, xiâm kối cho xua kơlo mơdró kâ tŏng kum khu mơdró kâ tro kơdroh ƀă kơlo hnê cheăng ăm mâu ngế pêi cheăng kơdroh. Xuân tiô tơbleăng kơlo tơxup râ kong pơlê hơnăm 2020, Tây Nguyên ôh tá ai kong pơlê ki lâi ối tung khu “kong pơlê ki pêi pro kơdroh”, la ai 2 to kong pơlê ối tung top mơ’nui dêi “khu ki ôh tá tơtêk, ôh tá chu kơdroh”. Tung mê, kong pơlê Dak Nông, cho kong pơlê a Tây Nguyên tâk điêm kơxô̆ tâng vâ pơchông ƀă hơnăm 2019, ƀă kơlo tâk 1,46 điêm, la xuân ối a mơ’nui a kơpong ƀă ối má mơ’nui tung khu ôh tá tơtêk ƀă ôh tá chu kơdroh dêi lâp tơnêi.

Nga tơplôu ƀă tơplôu tơbleăng