VOV4.Sedang - Kong pơlê Kon Tum ai 6 to cheăm ki malối xơpá, tung mê, ai 3 to cheăm tơkăng kong ƀă 6 to đông mố đô̆i gak tơkăng kong a troăng tơkăng kong tơdjêp ƀă kong têa Lếo a péa tơring Đăk Glei, Ngọc Hồi châ Hô̆i đong tâ phĭu Tơnêi têa ăm phêp tơkŭm po tâ phĭu rĕng tâ môi hâi, tơkéa vâ tối cho a hâi lơ 22/5.

Kơpong tâ phĭu kơxô̆ 2 thôn Đăk Nớ, cheăm Đăk Nhoong, tơring Đăk Glei hdrối hâi tâ phĭu

Tung hâi tâ phĭu ki tơkŭm po hdrối a hâi lơ 22/5, ai 6 to cheăm ki malối xơpá ối tung 36 kơpong tâ phĭu ƀă tâi tâng lối 10 rơpâu ngế kuăn pơlê. A mâu kơpong tâ phĭu ki tơkŭm po rĕng tâ a kong pơlê Kon Tum, rơtế ƀă tơdroăng rak tơniăn kế tơmeăm khoăng ăm hnoăng cheăng tâ phĭu, khu kăn pơkuâ ƀă kơvâ cheăng ki ai tơdjâk troh kong pơlê xuân hiăng pêi pro tro hnoăng cheăng hbrâ mơdât pơreăng COVID-19.

Hbrâ rơnáu kơƀăng chêh tơbleăng hnê mơhno kuăn pơlê tâ phĭu hbrâ mơdât pơreăng COVID 19

Hdrối hâi tâ phĭu, kăn ƀô̆, mâu ngế cheăng ‘na khăm pơlât hiăng xôh pơkeăng kơdê pơreăng, xing xoăng kơpong ki vê ngăn ki tô hngíu, kơ-ƀeăng ki ‘măn têa kơdê pơreăng, kên pâng môh rơkong ƀă xoăng kơbong klâ krê drêng châ ‘nâi ai ngế ki tơngê, kơ-o, ôh tá kâi hiâm tung pơla tâ phĭu.

Katarina Nga tơplôu ƀă tơbleăng