VOV4.Sêdang - A kong pơlê Kon Tum hnoăng cheăng tối tơbleăng ‘na rôh tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn rêm râ dế châ mơdêk rĕng. Kơnôm ing hên túa hên tơdroăng hnê tối mê kuăn pơlê tơ’lêi ‘nâi tdroăng kal, ‘nâi nhên tâ ‘na ki pơxúa ƀă tơdroăng ki kal dêi rôh tâ phĭu xuân môi tiah hnoăng cheăng dêi tơná ƀă tơdroăng cheăng ki kân krip kố dêi hdroâng mơngế.

Tung mâu hâi ki kố troh tâi tâng 84 to thôn, tôh kơphô̆ 11  to cheăm, pơlê kân dêi tơring Đăk Hà a lâi xuân tâng ro tơdroăng tơbleăng tối ‘na hâi leh kân dêi hdroâng mơngế, hâi tâ phĭu rah xo kăn Kuô̆k hô̆i hneăng 15 ƀă Hô̆i đong hnê ngăn kuăn pơlê rêm râ. Jâ Nguyễn Thị Thắm, Kăn ƀơrơ ngăn ‘na mơho túa lĕm tro - tơdroăng nếo ai dêi tơring Đăk Hà ăm ‘nâi, tung tơdroăng hnê tối hâi tâ phĭu roh kố, rơtế ƀă tơdroăng hnê tối, tơring hiăng tơmâng pơtối rak vế ki rơdêi dế tơbleăng tối tơbleăng kum kuăn pơlê ‘nâi hlê ai hên tơdroăng vâ rah xo tung tơdroăng tâng tối mâu tơdroăng:

“Ngin xúa kŏng ngê̆ thŏng tin tung tơdroăng cheăng hnê tối. Kuăn pơlê kô tâng tơbleăng mâu tơdroăng ‘na tâ phĭu ing mâu phôn râng kŏng dêi tơná. Ngin xuân tơmâng khât troh tơdroăng hnê tơbleăng ing Zalo, Facebook mê cho a trang Thời sự cho tối Tơdroăng nếo ai Đăk Hà, Tơdroăng ai ‘na Đăk Hà, Đăk Hà 24h. Mê cho mâu trang ki xua mâu kơ koan, mâu khu lêng ki tơbleăng tơdrêng mơjiâng ƀă rak ngăn vâ pêi pro tơdroăng cheăng hê tối ăm kuăn pơlê”.

Hnê tối tơdroăng tâ phĭu tung trang thông tin tơring Đăk Hà

‘Nâi nhên tơdroăng hnê tối hneăng tâ phĭu cho hnoăng cheăng ki kal, mâu kăn rơtế ƀă ƀơrô pơkuâ cheăng dêi tơring Đăk Hà tơmâng khât ‘na hnoăng cheăng mê. Jâ Phạm Thị Thương, Kăn phŏ hnê ngăn Vi ƀan tơring Đăk Hà, Kăn phŏ Vi ƀan tâ phĭu tơring Đăk Hà ăm ‘nâi, vâ kuăn pơlê tơ’lêi châ tâng mâu tơdroăng, tơring pêi tơdroăng hnê tối ‘na tâ phĭu tiô tơrêm ki xiâm pơkâ tơdroăng, tơrêm rôh nhên ƀă tơmâng troh hên tơdroăng hnê tối: 

“Tơring po mâu trang chêh ‘na ki xiâm dêi tơdroăng vâ mơ’no tung rơ’jiu, um tơvi dêi tơring. Klêi mê chêh mơ’no tơbleăng tung trang thŏng tin điê̆n tưh, mâu trang măng xah hô̆i pơlê pơla ki tơring hiăng pơkâ. Mâu kơ koan cheăng dêi mâu cheăm, pơlê kân hnê tối tiô tơdroăng rơxế tơbleăng a loa lăm prôk ukố umê. Hnê tối ƀă tơdroăng cổ động chêh a kơƀăng điê̆n tưh klêi mâ a pa-nô, ap-phích ƀă hên túa ki ê.

Pakĭng mê, xuân hnê mơhno ăm mâu kăn ƀô̆, mâu kăn pơkuâ kơ koan, mâu ngế cheăng ăm tơnêi têa ƀă kuăn pơlê vâ tí tăng ‘nâi plĕng  ƀă ‘nâi nhên  mâu pơkâ ing mê pêi hnoăng cheăng tâ phiŭ dêi tơná ƀă tơná pin lăm tâ dêi’’.

Hnê tối tơdroăng tâ phĭu ing loa mơhno dêi tơring Đăk Hà

Kơnôm hên tuá pêi pro, tơdroăng tơbleăng hnê ăm tơ’lêi pâ tung tuăn, tơ’lêi hlê mê tâi tâng mâu kuăn pơlê ƀă mâu kuăn pơlê a tơring Đăk Hà plĕng nhên ‘na tơdroăng tâ phĭu, ‘na hnoăng pêi pro dêi tơná tung tơdroăng tâ phĭu, pôa Trần Đình Vân, 72 hơnăm, ối a tôh kơphô̆ 7, pơlê kân Đăk Hà ăm ‘nâi, a tôh kơphô̆ dêi pôa kuăn pơlê xuân ‘nâi nhên tơdroăng ‘na tâ phĭu.

Khu kăn séa ngăn, lăm ngăn tơdroăng tâ phĭu dêi Khu kăn Vi ƀan xiâm Măt trâ̆n tơnêi têa Việt Nam khĕn kơdeăn khât tơdroăng hnê tối ‘na tâ phĭu dêi tơring Đăk Hà

Mâu hâi ki kố, kuăn pơlê dế tơpui tơno hên tơdroăng ‘na 8 ngế ki lo tơbriât pro kăn Kuô̆k hô̆i, 5 ngế ki lo tơbriât pro kăn Hô̆i đong hnê ngăn kong pơlê, 58 ngế lo tơbriât pro kăn hnê ngăn Hô̆i đong tơring ƀă kăn hnê ngăn Hô̆i đong pơlê kân  vâ hâi lơ 23/5 la ngiâ kô ah kô lăm tâ ta phĭu:

“Hơnăm kố ai tơdroăng kal cho hneăng tâ phĭu rah xo kăn Kuô̆k hô̆i ƀă Hô̆i đong hnê ngăn rêm râ. Ngin cho mâu ngế ki rêh ối tung kơpong kô đi đo tơmâng khât, tơmâng xo mâu tơdroăng hnê tối ing hên ƀâng, mê cho: tung rơ’’jíu, tung um tivi, drêng hôp tơpui ƀă kuăn pơlê a tôh kơphô̆, drêng trâm tơpui hôp chi ƀô̆, tơkŭm hôp mâu hơnăm hiăng krâ.

Tâi tâng mâu rôh hôp, rôh tơkŭm mê xuân hnê tối tơpui troh tơdroăng tâ phĭu rah xo kăn Kuô̆k hô̆i ƀă Hô̆i đong hnê ngăn kuăn pơlê rêm râ. Ngin loi khât kô rah xo mâu ngế ki ai hiâm mơno lĕm, ngế ki rơkê ƀă ngế ki kuăn pơlê loi nhoăm”.

Khoa Điềm chêh

Gương tơplôu ƀă tơbleăng