VOV4.Sêdang - Tung péa hâi, lơ 26 ƀă 27 khế 4, a pơlê kong kơdrâm Kon Tum, Khu pơkuâ vâi kơdrâi kong pơlê Kon Tum tơkŭm po hnê tơdroăng cheăng ăm mâu ngế kơdrâi roh apoăng tơbriât to pro kăn teăng mâ Hô̆i đong kuăn pơlê mâu râ hneăng hơnăm 2021 – 2026.

Veăng lâm hnê tơdroăng cheăng, vâ chê 200 ngế kơdrâi roh apoăng tơbriât to pro kăn teăng mâ Hô̆i đong kuăn pơlê mâu râ dêi kong pơlê Kon Tum, hneăng hơnăm 2021 – 2026, châ hriâm hên tơdroăng ‘na Kuô̆k hô̆i ƀă Hô̆i đong kuăn pơlê; plĕng tơ’nôm pơkâ ‘na mơhnhôk tâ phĭu; hnoăng cheăng dêi Khu pơkuâ vâi kơdrâi mâu râ tung veăng tâ phĭu rah xo kăn teăng mâ Kuô̆k hô̆i ƀă Hô̆i đong kuăn pơlê; châ pêi pro troăng trâm mâ ƀă khu chêh hlá tơbeăng, um tơvi, mơjiâng um méa krê; hriâm tơdroăng ki pơchuât ối tâng a ngiâ hên ngế, tiâ rơkong kơ-êng dêi kuăn pơlê.

Hnê ăm tơdroăng cheăng ăm mâu ngế kơdrâi roh  apoăng tơbriât to pro kăn teăng mâ Hô̆i đong kuăn pơlê mâu râ

Pakĭng mê, mâu ngế kơdrâi ki apoăng tơbriât to pro kăn teăng mâ Hô̆i đong kuăn pơlê mâu râ dêi kong pơlê, ối châ mâu kăn teăng mâ veăng hên hneăng cheăng Kuô̆k hô̆i, Hô̆i đong kuăn pơlê kong pơlê tối mâu túa ki rơkê tơtro tung ‘nâi mâu tơdroăng pói vâ dêi kuăn pơlê xuân ai veăng tơpui tơdroăng xiâm dêi hneăng hôp.

A Sa Ly tơplôu ƀă tơbleăng