VOV4.Sêdang - Vâ mơdêk tơƀrê tơdroăng cheăng hbrâ mơdât pơreăng Covid-19, Vi ƀan hnê ngăn kong pơlê Kon Tum hiăng pơkâ, vêh tơkŭm po 6 tíu gâk ki ai tơdjâk ‘na pơreăng a kong pơlê, tung mê, pơcháu ăm kăn hnê ngăn Vi ƀan tơring, pơlê kong kơdrâm pro kăn pơkuâ ngăn tíu gak. Tiô pơkâ dêi kăn hnê ngăn Vi ƀan kong pơlê Kon Tum, ai 6 tíu gâk ki ai tơdjâk ‘na séa ngăn pơreăng Covid-19 a kong pơlê châ séa ngăn tâi tâng vâ mơdêk ki tơƀrê tơdroăng cheăng hbrâ mơdât pơreăng.

Hnê mơhno mâu rơxế mot a tíu séa ngăn ki tơdjâk ‘na pơreăng Covid-19 Sao Mai – tơdjêp ƀă kong pơlê Gia Lai

6 tíu gak châ xing xoăng mâu troăng prôk ki kal dêi kong pơlê môi tiah troăng kân 14 - troăng kân Hồ Chí Minh - troăng a peăng Kơnhŏng ƀă peăng Hdroh  kong pơlê Kon Tum; a 4 to hơlâ troăng Đông Trường Sơn ƀă troăng kân 40B-tơdjêp ƀă kong pơlê Quảng Ngãi; kông Sê San 4, a troăng kân 14C, ƀă troăng kân 40B a tíu ki tơdjêp pơla tơring Nam Trà My, kong pơlê Quảng Nam ƀă cheăm Ngọc Lây, tơring Tu Mrông.