VOV4.Sêdang - Tung mâu khế rơnó mơdrăng kố nah mâu khu râ pơkuâ cheăng, mâu kăn kong pơlê, tơring cheăm, tíu pơkuâ rak ngăn kong ƀă kuăn pơlê dêi kong pơlê Kon Tum hiăng pêi pro tơdrêng 2 tơdroăng cheăng ki kal, tung mê, cho hbrâ mơdât on chếo kong ƀă rak ngăn tơmeăm khoăng kong.

Sap ing hâi Têt Lo hơnăm nếo Tân Sửu troh nôkố, mâu khu râ pơkuâ cheăng, mâu tíu pêi cheăng pơkuâ ngăn kong, mâu kăn kong pơlê, tơring, cheăm, kuăn pơlê, mâu ngế ki xo rak ngăn kong a kong pơlê Kon Tum đi đo mơ-eăm gak ngăn kong xâu lơ ai on chếo kâ kong. Ngoh A Cường, pơlê Têa Kŏn (tối cho) Đăk Kon, cheăm Đăk Rơ Nga, tơring Đăk Tô ăm ‘nâi, kuăn pơlê xo rak ngăn 270 ha kong dêi Kŏng ti pêi cheăng tiô rơnó Môi tung khu rak ngăn kong Đăk Tô. Châ xúa ing kơxô̆ liăn mơhá ăm hnoăng rak ngăn kong, mê pin thế ai hnoăng cheăng ƀă kong:

“Gak ngăn plâ hâi măng ki kal cho rak ngăn kong xâu lơ ai on chếo. Rơnó Têt xuân gak, ôh tá ai Têt xuân thế gak ngăn, gak ngăn tâi rơnó mơdrăng xâu lơ tro on chếo. Rêm hâi pin athế lăm prôk ngăn. Lâp pơlê veăng gak ngăn, hơ’leh dêi rơpó gak ngăn”.

A tơring tơkăng kong Ia H’Drai, cho tíu ki ai lối 88 rơpâu ha kong bă tơnêi kong, pôa Nguyễn Quốc Tuấn, ngế pơkuâ ngăn kong tơring, ăm ‘nâi:

 “Kong tô ton hâi, tô mơdrăng khăng khoăng ki tơ’lêi tro on chếo kâ kong. Ngin xuân ‘nâi nhên mâu kơpong ki xiâm on chếo kâ kong vâ thế gak ngăn plâ hâi măng. Mâu ngế pơkuâ rak ngăn kong. Mâu ngế pơkuâ ngăn kong ki ai mâu khu veăng ngăn. Mâu ki mê hlối rak ngăn kong ƀă hlối pêi cheăng hbrâ mơdât on chếo kong. Pakĭng mê, pơkâ tơrŭm ƀă mâu tíu pêi cheăng, ƀă Vi ƀan cheăm klêi mê mâu tíu pêi cheăng ki pro pơkuâ cheăng a tơring, cheăm. Mâu ngế pơkuâ kong thế pêi pro tro mâu hnoăng pơkâ hiăng kĭ tiô tơdroăng pơkâ 4 tơdroăng pêi pro tơdrêng amê vâ teăm pêi pro drêng ai on chếo kâ kong”.

Tơdroăng rak ngăn kong a kong pơlê Kon Tum pơla hdrối kố nah ôh tá xê to tơdroăng ki dế tơmâng, tŏng kum pêi pro kơhnâ khât ‘na tơnêi tíu, mê, mâu hneăng hôp tơpui tơdroăng ‘na kong, ai môi tơdroăng tơpui mơhno nhên, mê cho ki kơdo mơ-eăm khât dêi mâu kăn kong pơlê xuân môi tiah kơvâ cheăng khu râ tung rak ngăn kong nôkố ƀă ai mơnhông pêt kong. A Hneăng hôp tối mơgêi tơdroăng rak ngăn kong, mơdêk pêt kong hơnăm 2020; tơbleăng tơdroăng cheăng pêi hơnăm 2021 ƀă mâu hơnăm pơtối. Pôa Dương Văn Trang, Kăn hnê ngăn Đảng kong pơlê Kon Tum tối nhên, thế pơkâ nhên hnoăng cheăng vâ ăm tơrêm râ Đảng, tíu pêi cheăng, kong pơlê, mâu ngế pơkuâ rak ngăn kong ƀă tơleăng mơnhên pơxâu phak mâu kăn ƀô̆,  đảng viên ki pro xôi tung tơdroăng cheăng rak ngăn kong:

 “Tâi tâng rêm râ Đảng thế đi đo pơkuâ ngăn, hnê mơhno tơdroăng cheăng rak ngăn kong ăm xêt khât, tơƀrê tâ ƀă mâu ngế ki pơkuâ xiâm râ ủy thế mơhno tâng ối pá tơvâ tơvân hên mê ngế ki pơkuâ râ Đảng hnê mơhno tâng ối xơpá hên, mê ngế pơkuâ xiâm râ Đảng mê thế pôu râng dêi hnoăng cheăng ahdrối. Vi ƀan kong pơlê, Vi ƀan tơring, Vi ƀan cheăm, mâu ngế pơkuâ rak ngăn kong châ pơcháu hnoăng cheăng, thế hnê mơhno rak ngăn, séa ngăn lăm ngăn đi đo. Tâng hlo ai xôi hên thế pôu râng hnoăng cheăng a ngiâ Khu kăn Đảng kong pơlê. Pơxâu kơtăng mâu kăn ƀô̆, đảng viên ki pro xôi luât pơkâ drêng xo pêi tơdroăng rak ngăn kong”.

Kong pơlê Kon Tum dế mơ-eăm khât tung rak ngăn vâ chê 549 rơpâu ha kong ki chiâng xêh, lối 61 rơpâu ha kong ki pêt nôkố ƀă châ tiô pơkâ tung 5 hơnăm la ngiâ pêt châ 15 rơpâu ha kong. Vâ pêi tơdroăng mê, môi tung mâu tơdroăng cheăng ki kal dêi kong pơlê Kon Tum pơkâ cho pơtối pêi tơ-ƀrê dêi luât pơkâ mơhá liăn ăm hnoăng râk ngăn kong tung rak ngăn, ƀă mơnhông pêt kong.

Ô vâi krâ nhŏng o ƀă pú hmâ! Môi tiah hiăng tơbleăng apoăng  tơdroăng, nôkố pó vâi krâ nhŏng o ƀă pú hmâ rơtế tơmâng roh kơ-êng dêi ngế chêh hlá tơbeăng ƀă pôa Hồ Thanh Hoàng, Kăn pơkuâ kơxô̆ liăn mơhá hnoăng rak ngăn ƀă mơnhông pêt kong dêi Kon Tum ‘na mâu tơdroăng pơkâ kân tung hơnăm 2021 ƀă tơdroăng châ tơƀrê pêi pro troăng hơlâ mơhá hnoăng liăn rak ngăn ƀă mơnhông pêt kong tung pái khế apoăng hơnăm pơla hdrối kố nah dêi kong pơlê Kon Tum.

-Ô pôa, tung hơnăm 2021 pơkâ xo hnoăng liăn, mơhá liăn rak ngăn ƀă mơnhông pêt kong dêi kong pơlê Kon Tum châ pêi pro ƀă pơkâ ki nhên môi tiah lâi?

-Tiâ: Tung hơnăm 2021, Khu pơkuâ râng kơxô̆ liăn mơhá hnoăng rak ngăn ƀă mơnhông pêt kong dêi kong pơlê Kon Tum pêi pro pơkâ môi tiah kơ’nâi kố:

‘Na pơkâ xo hnoăng liăn, mơhá liăn gak ngăn ƀă mơnhông pêt kong. Pơkâ xo hnoăng liăn cho 298 rơtal 688 rơtuh liăn, tung mê Kơxô̆ liăn kong pơlê Kon Tum kô xo tơdrêng 65 rơtal 300 rơtuh liăn; Kơxô̆ liăn rak ngăn ƀă mơnhông pêt kong Việt Nam ăm cho lối 233 rơtal liăn.

Pơkâ mơ’no ing kơxô̆ liăn xo hnoăng hơnăm 2021 cho 298 rơtal 688 rơtuh liăn, tung mê, xo ing kơxô̆ liăn hbrâ cho 14 rơtal 900 rơtuh  liăn ƀă 5% pơkâ xo hnoăng liăn. Kơxô̆ liăn kố mơ’nui hơnăm ôh tá xúa tâi mê mơdrếo ăm mâu khu pơkuâ kong ai ƀăng kong ki rak ngăn ƀă mơnhông pêt kong.

Má péa nếo, kơxô̆ liăn mơhá ăm mâu khu pơkuâ kong cho khu pú hên, mâu Vi ƀan cheăm, pơlê kân ƀă mâu rơpŏng, ngế krê, kuăn pơlê a thôn pơlê cho 256 rơtal 400 rơtuh liăn. Kơxô̆ liăn xing xoăng ăm tơ’nôm ăm mâu khu pú hên tŏng kum tơdroăng pêi cheăng dêi Khu pơkuâ râng kơxô̆ liăn mơhá hnoăng rak ngăn ƀă mơnhông pêt kong kong pơlê; kơxô̆ liăn tŏng kum mâu tíu cheăng mơjiâng Troăng pơkuâ kong krá tơniăn hneăng hơnăm 2021 – 2030, kơxô̆ liăn tŏng kum hdrê pêt tơprâ tơprŭng hơnăm 2021 ƀă mơ’no liăn ăm tơdroăng pơkuâ Kơxô̆ liăn mơhá hnoăng rak ngăn kong cho 24 rơtal 800 rơtuh  liăn. Hbrâ drêng xo hnoăng liăn iâ ƀă ai tơ’nôm mâu hnoăng cheăng tung hơnăm 2021 cho 4 rơtal 8 rơtuh liăn.

‘Na mâu hnoăng cheăng má môi cho thăm séa ngăn, mơhnhôk mâu tíu cheăng xúa tơdroăng rak ngăn ƀă mơnhông pêt kong nâp liăn mơhá hnoăng rak ngăn ƀă mơnhông pêt kong i tŭm, teăm tơdrêng ‘na Kơxô̆ liăn mơhá hnoăng grak ngăn ƀă mơnhông pêt kong dêi Kon Tum tiô pơkâ ‘na pơkâ thế Khu pơkuâ kơxô̆ liăn mơhá hnoăng rak ngăn ƀă mơnhông pêt kong Việt Nam pêi pro tro tơdroăng rak ngăn ƀă mơnhông pêt kong dêi Kon Tum vâ tơniăn hnoăng cheăng hơnăm 2021 tiô pơkâ.

Mơhá liăn rak ngăn ƀă mơnhông pêt kong ăm tâi tâng mâu ngế pơkuâ rak ngăn kong tŭm, teăm tơdrêng, tơdrăng, kum pơkuâ, rak ngăn dâng 384 ơpâu ha kong châ dâng 67,3% tâi tâng ƀăng kong lâp kong pơlê, ôh tá xêo ƀăng loăng kơxu, tơmeăm khoăng ki má môi.

Po rơdâ pêi pro tŭm, teăm tơdrêng mâu hnoăng cheăng pơtâng tối vâ mơdêk hlê plĕng dêi mâu khu pú hên, mơngế krê ai tơdjâk ƀă tâi tâng kuăn pơlê rêh tung kong, achê kong ‘na troăng hơlâ mơhá liăn hnoăng rak ngăn ƀă mơnhông pêt kong, kum tung tơdroăng veăng rak ngăn ƀă mơnhông pêt kong rế tơtro tâ’’.

Tơkŭm po séa ngăn tơdroăng pơkuâ, xúa kơxô̆ liăn mơhá hnoăng rak ngăn ƀă mơnhông pêt kong ƀă mâu ngế pơkuâ kong cho khu tơrŭm, mâu Vi ƀan cheăm, pơlê kân tung kong pơlê vâ mơdêk châ tơƀrê pơkuâ, xúa kơxô̆ liăn mơhá hnoăng rak ngăn ƀă mơnhông pêt kong.

Tơkŭm po séa ngăn, mơnhên ƀăng kong ki xing xoăng ăm rak ngăn ƀă mơnhông pêt kong hơnăm 2021 pro xiâm kối vâ xêo, mơnhên ƀă mơhá hnoăng liăn rak ngăn ƀă mơnhông pêt kong hơnăm 2021 ăm mâu tíu cheăng khu pơkuâ kong cho khu pú hên, rơpŏng, ngế krê, kuăn pơlê a thôn ƀă mâu Vi ƀan cheăm, pơlê kân châ Tơnêi têa pơcháu hnoăng pơkuâ, rak ngăn kong”.

-Tung pái khế apoăng hơnăm kố nah tơdroăng cheăng dêi Khu pơkuâ râng kơxô̆ liăn rak ngăn ƀă mơnhông pêt kong dêi Kon Tum hiăng châ tơƀrê tiah lâi tung tơdroăng pêi pro troăng hơlâ mơhá hnoăng rak ngăn ƀă mơnhông pêt kong?

-Tiâ: Tung pái khế apoăng hơnăm 2021, Khu pơkuâ kơxô̆ liăn mơhá hnoăng rak ngăn ƀă mơnhông pêt kong Kon Tum hiăng châ tơƀrê hên tung tơdroăng pêi pro troăng hơlâ mơhá hnoăng rak ngăn ƀă mơnhông pêt kong môi tiah kơ’nâi kố:

Má môi, ngin hiăng tơbleăng Vi ƀan kong pơlê kĭ ăm pêi pro Pơkâ xo hnoăng liăn, mơhá hnoăng rak ngăn ƀă mơnhông pêt kong dêi kong pơlê Kon Tum ƀă tối hdrối kơxô̆ liăn pơkuâ rak ngăn ƀă mơnhông pêt kong dêi Kon Tum.

Má péa, ngin hiăng tơpui tơno ƀă kĭ tơkêa ƀă 2 tíu cheăng xúa mơngế rak ngăn ƀă mơnhông pêt kong cho 2 hngêi kơmăi on tơhrik nếo hiăng pêi cheăng ƀă kêi đeăng hơp đong 1 tíu xúa mơngế rak ngăn ƀă mơnhông pêt kong xua hơ’leh chiâng kơpong kong pơlê xua Khu pơkuâ kơxô̆ mơhá hnoăng rak ngăn ƀă mơnhông pêt kong Việt Nam kô xo.

Xêo troh hâi lơ 31/3/2021, Khu pơkuâ kơxô̆ liăn mơhá hnoăng rak ngăn ƀă mơnhông pêt kong dêi kong pơlê hiăng xo lối 101 rơtal 700 rơtuh liăn mơhá hnoăng rak ngăn ƀă mơnhông pêt kong, châ 34,08% pơkâ pêi châ Vi ƀan kong pơlê pơcháu.

Tơdroăng má péa, cho ngin hiăng mơnhên ƀă mơdrếo liăn hnoăng rak ngăn ƀă mơnhông pêt kong hơnăm 2020 ăm mâu khu pơkuâ kong cho khu pú hên, mâu Vi ƀan cheăm, pơlê kân, rơpŏng, ngế krê, kuăn pơlê a thôn pơlê; xo hdrối liăn mơhá hnoăng rak ngăn ƀă mơnhông pêt kong hơnăm 2021 ăm mâu khu pơkuâ kong cho khu pú hên; tâi tâng kơxô̆ liăn hiăng mơ’no pêi cheăng troh hâi lơ 31/3/2021 cho lối 48 rơtal 300 rơtuh liăn. Tung mê, ăm liăn a ngâ dêi hơnăm 2020 cho 44 rơtal 700 rơtuh liăn, xo hdrối liăn rak ngăn ƀă mơnhông pêt kong hơnăm 2021 cho  3 rơtal 600 rơtuh liăn.

Tơdroăng pơtối cho ngin hiăng hbrâ mâu pơkâ ki kal tơrŭm ƀă Hngêi arak liăn kum khu mơdró kâ tơlo liăn cheăng dêi Tíu pơtroh kơthô Liên Việt – Tíu pêi cheăng a kong pơlê Kon Tum mơdrếo liăn troh lâp lu liăn mơhá hnoăng rak ngăn ƀă mơnhông pêt kong hơnăm 2020 ăm mâu khu pơkuâ kong cho rơpŏng, ngế krê châ Tơnêi têa pơcháu tơnêi, pơcháu kong tung kong pơlê Kon Tum.

Ngin xuân hiăng tơkŭm po 3 Hneăng hôp hnê mơhno tơdroăng pêi cheăng ‘na kih thuât tung pêi pro troăng hơlâ mơhá hnoăng rak ngăn ƀă mơnhông pêt kong ăm mâu Vi ƀan cheăm, pơlê kân vâ hnê mơhno mâu tơring kố xúa kŏng ngê̆ thông tin, djâ lơgât xing xoăng  tơdroăng rak ngăn ƀă mơnhông pêt kong ing lơgât mơ-éa pơtroh tung phôn râng kŏng lơ kơmăi kơmok ki rơkê kum ăm tơdroăng séa ngăn, mơnhên ƀăng kong ki xing xoăng ăm rak ngăn ƀă mơnhông pêt kong tơniăn rĕng, mơdêk ki tơtro, kơdĭng liăn.

Ngin hiăng tơkŭm séa ngăn tơdroăng pêt, rak ngăn kong ki hơ’leh, tŏng kum pêt kong dêi mâu tíu cheăng, pơlê châ pơcháu ing kơxô̆ liăn pêt kong ki hơ’leh xua mâu khu mơ’no liăn cheăng nâp a Khu pơkuâ kơxô̆ liăn mơhá hnoăng rak ngăn ƀă mơnhông pêt kong kong pơlê Kon Tum.

Tơrŭm ƀă Khu pơkuâ ‘na pêi chiâk deăng ƀă mơnhông mơdêk thôn pơlê ƀă mâu kơvâ cheăng ki tơdjâk tơbleăng Vi ƀan kong pơlê hnê mơhno, pơkuâ pêi pro pơkâ pêt kong ki hơ’leh hơnăm 2021 ƀă hneăng hơnăm 2021 – 2025 vâ pêi pro Pơkâ Hneăng hôp Đảng ƀô̆ kong pơlê Kon Tum roh má XVI hneăng hơnăm 2020 – 2025.

Ngin hiăng mơjiâng ƀă po rơdâ troăng hơ’leh xúa kơmăi kơmok, xúa kŏng ngê̆ thŏng tin tung mâu tơdroăng pêi cheăng, xúa kơmăi kơmok ‘măn  tơdroăng ‘na ƀăng kong châ mơhá hnoăng liăn rak ngăn ƀă mơnhông pêt kong, pơkuâ mâu ngế ki châ xing xoăng ƀăng rak ngăn ƀă mơnhông pêt kong a kong pơlê Kon Tum.

-Mơnê kô pôa Hồ Thanh Hoàng, Kăn pơkuâ râng kơxô̆ liăn mơhá hnoăng rak ngăn ƀă mơnhông pêt kong kong pơlê Kon Tum hiăng mơdoh chôu ăm roh tơpui tơno kố!

Khoa Điềm rah chêh

Gương- A Sa Ly tơplôu ƀă tơbleăng