.VOV4.Sêdang - Kơxê lơ 11/5, a roh hôp mơ’no tơdrêng tung um tơvi ƀă 10 tơring, pơlê kong kơdrâm dêi kong pơlê, pôa Lê Ngọc Tuấn, Kăn hnê ngăn Vi ƀan kong pơlê, Kăn pơkuâ hnê mơhno hbrâ mơdât pơreăng COVID 19 kong pơlê Kon Tum mơnhên, kơjo tơniăn tíu pêi cheăng, tíu kâ ối ăm mâu ngế ki hbrâ mơdât pơreăng COVID 19.

Drêng pơreăng xông tâ tú ó, ôh tá ‘nâi tối hdrối, kong pơlê Kon Tum dế rak 4 tíu séa ngăn, tôh hbrâ mơdât a 3 troăng kân, mê cho: troăng kân lăm ngi kong pơlê ki ê kơxô̆ 14, 24 ƀă 40B.

Mâu ƀok thái pơkeăng khăm ngăn ki tô tung châ mơngế mot a kong pơlê Kon Tum a troăng kân kơxô̆ 14

Rơtế amê a 2 troăng tíu tơkăng kong xŏn 292 km tơkăng Lếo, Kul, khu mô đô̆i gâk kring tíu tơkăng kong tơrŭm Khu ngăn mô đô̆i kong pơlê pơtối rak 70 tôh, hbrâ mơdât pơreăng COVID 19. Mơnhên tơdroăng hbrâ mơdât pơreăng COVID 19 kô ối ton, pôa Lê Ngọc Tuấn, Kăn hnê ngăn Vi ƀan kong pơlê Kon Tum pơkâ mâu tơring, pơlê kong kơdrâm xúa kơxô̆ liăn ki ai, tơdrêng amê, thâ rôe mâu kế tơmeăm ki kal xúa rêm hâi vâ tơniăn tíu kâ ối, tíu pêi cheăng dêi khu hbrâ mơdât pơreăng.

Thăm nếo ối ăm phêp Kăn hnê ngăn Vi ƀan mâu tơring, pơlê kong kơdrâm ‘na troăng rôe tơmeăm khoăng hdrối, tơbleăng kơ’nâi laga thế xúa châ tơƀrê ƀă ton xŏn, ƀă kô chiâng vêh xúa kum ăm tơdroăng hbrâ mơdât pơreăng dêi pơlê.

A Sa Ly tơplôu ƀă tơbleăng