VOV4.Sêdang - Maluâ cho kong pơlê ki ôh tá ai ngế tâ pơreăng, la xuân ôh tá tơniăn xua tơdroăng tâ tú dêi pơreăng COVID-19, hâi lơ 17/5, kăn hnê ngăn Vi ƀan kong pơlê Kon Tum hiăng pơkâ mơdêk hbrâ tơbleăng mơdât pơreăng a kơlo ki hên má môi. Tiah mê, Vi ƀan hnê ngăn kong pơlê Kon Tum pơkâ mơdêk tối tơbleăng hbrâ mơdât pơreăng COVID-19 a kong pơlê a kơlo ki hên má môi sap ing 12 chôu măng dế kố lơ 18/5.

Kuăn pơlê cheăm Đăk Dục, tơring Ngọc Hồi, kong pơlê Kon Tum truâ kên pâng môh rơkong drêng troh ngăn tơdroăng kal a tíu ki hbrâ tâ phĭu

Rơtế ƀă tơdroăng ki pơkâ thế mâu khu râ, kơvâ cheăng ki ai tơdjâk troh rĕng tơkŭm po tơbleăng pêi pro kơtăng mâu tơdroăng pơkâ hbrâ mơdât pơreăng, Vi ƀan hnê ngăn kong pơlê Kon Tum pơklât thế kuăn pơlê truâ kên pâng môh rơkong drêng lo ing hngêi xuân môi tiah ối a tíu ối tơdjuôm ƀă pêi pro kơtăng tơdroăng pơkâ thế 5K hbrâ mơdât pơreăng dêi Khu xiâm ngăn pơkeăng.

Vi ƀan hnê ngăn kong pơlê Kon Tum xuân pơkâ thế Vi ƀan hnê ngăn 10 tơring, pơlê kong kơdrâm dêi kong pơlê mơhnhôk khu pơkuâ tơdroăng kal kí, mâu Tôh pêi cheăng pơlê pơla séa ngăn krá tíu, rơpŏng hngêi, kuăn pơlê vâ rĕng châ ‘nâi mâu ngế ki mơni kô tâ pơreăng vâ tơbleăng mâu troăng hơlâ hbrâ mơdât pơreăng tơdrêng.

Katarina Nga tơplôu ƀă tơbleăng