VOV4.Sêdang - Kơxo lơ 22/4, Vi ƀan Măt trâ̆n Tơnêi têa Việt Nam kong pơlê Kon Tum mơhnhôk Roh mơhnhôk vâ hơ’leh troăng tơmiât, troăng pêi dêi vâi krâ hdroâng kuăn ngo, kum vâi krâ mơ-eăm hluăn kơtiê krá tơniăn. Kong pơlê Kon Tum ai lối 53% pơ’leăng mâ mơngế cho vâi krâ hdroâng kuăn ngo, ai tơdroăng rêh ối pá puât. Xiâm kối xua hriâm iâ; ối tơmiât kơnôm to tơdroăng tŏng kum dêi Tơnêi têa; tá hâi ‘nâi troăng xúa khoa hok kih thuât tung pêi kâ.

Kĭ tơkêa tơ’noăng pêi pro roh mơhnhôk

Vâ hơ’leh troăng tơmiât, troăng pêi dêi vâi krâ hdroâng kuăn ngo, pro ăm vâi krâ hdroâng kuăn ngo mơ-eăm hluăn ing kơtiê krá tơniăn, Vi ƀan Măt trâ̆n tơnêi têa Việt Nam kong pơlê Kon Tum mơnhên 5 hnoăng cheăng xiâm, mê cho: Pơtâng tối, tơbleăng mâu troăng hơlâ ki má lối cho kơvâ tơnêi tíu, kơdroh kơtiê krá tơniăn, mơjiâng thôn pơlê nếo troh vâi krâ hdroâng kuăn ngo; Tơbleăng mâu túa pêi rơkê, troăng pêi châ tơƀrê; hnê mơhno vâi krâ hdroâng kuăn ngo kơtiê vâ chê kơtiê xúa châ tơƀrê tơmeăm khoăng dêi rơpŏng, kơxô̆ liăn mung vâ mơnhông cheăng kâ; Hnê mơhno vâi krâ hơ’leh mâu hdrê loăng plâi, mơnăn păn; thăm veăng pêt kong, kring vế ƀă gak ngăn kong.