VOV4.Sedang - Tơdjâk troh ngế tro tâ pơreăng COVID 19 a kong pơlê Dak Lak, kơxo hâi lơ 13/5, Khu pơkuâ ngăn pơkeăng ƀă khăm pơlât kong pơlê Kon Tum tối ăm ‘nâi, Tíu xiâm mơdât pơreăng kong pơlê hiăng mơnhên tíu tê tơmeăm xúa rêm hâi tung pơlê kong kơdrâm Kon Tum, tíu ngế tro tâ pơreăng COVID 19 má 3237 kong pơlê Dak Lak tot rơxế ôtô rôe tơmeăm kâ drêng prôk ing pơlê kong kân Đà Nẵng vêh a pơlê kong kơdrâm Ƀuôn Ma Thuột a hâi lơ 6/5/2021.

Klêi kơ’nâi mơnhên tíu tê tơmeăm khoăng xúa rêm hâi tíu ki ngế F0 kong pơlê Dak Lak mot rôe tơmeăm kâ, khu cheăng kong pơlê Kon Tum hiăng tơkŭm mơdât ôh tá ăm mot a tíu kố, xôh pơkeăng kơdê pơreăng tíu tê tơmeăm khoăng xúa rêm hâi tíu ki ngế F0, F1 mot, troh kơmăng hâi lơ 12/5 tơkŭm po ăm djâ klâ kơtăn tơkŭm 9 ngế F1.

Khu cheăng kong pơlê Kon Tum pêi pro thâ mâu troăng hbrâ mơdât pơreăng a Tíu tê tơmeăm khoăng xúa rêm hâi Sen

Tơdrêng amê mơnhên châ 202 ngế cho F2 pơkâ klâ kơtăn a hngêi ƀă chêh inâi khăm ngăn ivá 40 ngế cho F3. Nôkố, ivá dêi mâu ngế F1 tơniăn, ôh tá hlo tơdroăng ki tro tâ COVID 19. Klêi kơ’nâi khăm ngăn roh má 1 dêi Tíu xiâm mơdât pơreăng kong pơlê Kon Tum ăm hlo 9 ngế F1 pơrá âm tĭnh ƀă SARS-CoV-2.

A Sa Ly tơplôu ƀă tơbleăng