VOV4.Sêdang - Kăn phŏ hnê ngăn Vi ƀan kong pơlê Kon Tum cho jâ Y Ngọc hiăng pêi cheăng ƀă kăn pơkuâ tơring Kon Plong ƀă cheăm Măng Cành ‘na tơdroăng ki ai hên mâu ngế tro hơ-ou kế kâ a cheăm Măng Cành. A rôh pêi cheăng, Khu ngăn pơkeăng ƀă khăm pơlât ăm ‘nâi hiăng pâk xo mơheăm pơtroh ăm kơ koan ki ai tơdjâk troh vâ séa ngăn tăng xiâm kối, tơrŭm ƀă cheăm mơhnhôk kuăn pơlê prâu tah lôi kế kâ ki nhôm pro chiâng ai pơreăng.

Ƀă mâu ngế ki tro hơ’ou, kơvâ ngăn pơkeăng ƀă khăm pơlât tối, nhôm tro hơ-ou ing trếo Clostridium botulinum ƀă dế pơlât ăm mâu ngế ki tro hơ-ou mê. Kăn phŏ hnê ngăn Vi ƀan kong pơlê pơkâ thế tơring Kon Plong tơtrŏng troh tơdroăng ki tơbleăng, hnê tối tung lâp lu ăm kuăn pơlê ‘nâi ‘na túa pơreăng cho hơ-ou kế kâ, pôi tá pro ăm tơdjâk troh tơdroăng ki tơ’mot ôm hyô dêi tơring tơdrêng amê hnối pơkâ thế kơvâ ngăn pơkeăng ƀă khăm pơlât rĕng séa ngăn, mơnhên xiâm kối khoh ai pơreăng, hbrâ mâu túa pơkâ vâ hbrâ mơdât drêng ai hên ngế tro hơ-ou, hnối tơrŭm tối tơbleăng mâu troăng hơlâ rak tơniăn kế kâ tung rôh tâ phĭu hiăng vâ chê troh la ngiâ kố ah.

Katarina Nga tơplôu ƀă tơbleăng