VOV4.Sêdang - Khế 4 kố nah, Vi ƀan Măt trâ̆n Tơnêi têa Việt Nam kong pơlê Kon Tum hiăng tơbleăng rôh mơhnhôk vâ hơ’leh túa tơmiât, túa pêi cheăng kâ dêi hdroâng kuăn ngo, pro ăm hdroâng kuăn ngo kâi châ mơ-eăm vâ hluăn ing kơtiê krá ton. Veăng a leh tơbleăng ai kăn pơkuâ kong pơlê; teăng mâ mâu khu râ, kơvâ cheăng ƀă 10 tơring, pơlê kong kơdrâm dêi kong pơlê rơtế ƀă 10 ngế krê ki rơkê cho hdroâng kuăn ngo.

Kong pơlê Kon Tum ai lối 53% pơ’leăng mâ mơngế cho vâi krâ - nhŏng o hdroâng kuăn ngo ai tơdroăng rêh ối ối hên pá puât. Xiâm kối châ mơnhên xua hriâm ối iâ; ối tơmiât tơ’nôm tơdroăng tŏng kum dêi Tơnêi têa; tá hâi ‘nâi xúa khoa hok kih thuât tung pêi kâ…Nôkố lâp kong pơlê u ối lối 13.600 rơpŏng kơtiê cho mơngế hdroâng kuăn ngo châ vâ chê 94% rơpŏng kơtiê ƀă lối 7.500 rơpŏng vâ chê kơtiê, châ lối 90% tâng pơchông ƀă tâi tâng kơxô̆ rơpŏng vâ chê kơtiê lâp kong pơlê.

Vâ pơ’leh tơdroăng tơmiât, troăng pêi dêi vâi krâ hdroâng kuăn ngo, pro ăm vâi krâ hdroâng kuăn ngo mơ-eăm hluăn ing kơtiê krá tơniăn, Vi ƀan Măt trâ̆n Tơnêi têa Việt Nam kong pơlê Kon Tum mơnhên 5 hnoăng cheăng xiâm, mê cho: Pơtâng tối, tơbleăng mâu troăng pơkâ pêi, troăng hơlâ ki má lối cho kơvâ tơnêi tíu, kơdroh kơtiê krá tơniăn, mơjiâng thôn pơlê nếo troh vâi krâ hdroâng kuăn ngo; Tơbleăng mâu troăng pêi ki rơkê, châ tơƀrê; Hnê mơhno vâi krâ hdroâng kuăn ngo kơtiê ƀă vâ chê kơtiê xúa châ tơƀrê tơmeăm ki mơnhông dêi rơpŏng, kơxô̆ liăn mung vâ mơnhông cheăng kâ; Hnê mơhno vâi krâ pơ’lêh mâu hdrê pêt, mơnăn păn; Mơhnhôk vâi krâ hdroâng kuăn ngo veăng mâu tôh tơrŭm pêi cheăng pêt loăng pơkeăng, mơnhông mơdêk pêi chiâk deăng krúa lĕm, xúa kơmăi kơmok rơxông nếo, thăm veăng pêt kong, gak ngăn ƀă pơkuâ ngăn kong.

Túa pêt loăng pơkeăng pá kơdâm kong dêi hdroâng kuăn ngo a tơring Kon Plông kum kuăn pơlê mơdêk pêi lo liăn

Xông tơpui a roh leh, pôa Nguyễn Văn Hòa – Phŏ pơkuâ hnê ngăn cheăng Đảng kong pơlê, Kăn hnê ngăn Hô̆i đong kong pơlê Kon Tum pơkâ thế: Mâu khu râ, mâu kơvâ cheăng, Măt trâ̆n Tơnêi têa Việt Nam mâu râ tung kong pơlê kal ai hên tơdroăng pêi ƀă cheăng pêi ki nhên, pơxúa vâ rak ngăn tơdroăng rêh ối kế tơmeăm khoăng ƀă hiâm mơno ăm kuăn pơlê; tối tơbleăng, tŏng kum kuăn pơlê trâm pá tung tơdroăng rêh ối, ki rơhêng vâ tối cho vâi krâ hdroâng kuăn ngo, kơpong hơngế hơngo.

Pêi tơtro tơdroăng pơtâng tối, mơhnhôk, thăm pêi pro ƀă po rơdâ tâi tâng rŭm môi tuăn tâi tâng hdroâng mơngế. Pơtâng tối mơhnhôk vâi krâ mâu hdroâng kuăn ngo chôa ‘lâng pơ’lêh troăng tơmiât, troăng pêi, chôa ‘lâng tah lôi mâu khôi túa ki ôh tá lĕm tro, ‘nâi tơkŭm po pêi kâ, pro ăm mâu rơpŏng vâi krâ hdroâng kuăn ngo kơtiê ƀă vâ chê kơtiê mơ-eăm hluăn ing kơtiê krá tơniăn. Pôa Nguyễn Văn Hòa tối, kố cho roh mơhnhôk kân dêi kong pơlê, vâ tơniăn châ tơƀrê kal mơnhông hiâm mơno djâ troăng ahdrối dêi kăn ƀô̆, đảng viên ƀă mơnhên tơdroăng xiâm rêm tơdroăng cheăng ki nhên:

‘’Drêng pin pơkâ pro pơ’lêh troăng tơmiât ƀă troăng pêi dêi vâi krâ hdroâng kuăn ngo mê pơxiâm ing mâu ngế kuăn pơlê loi tơngah tung vâi krâ hdroâng kuăn ngo pin. Klêi mê mâu kăn ƀô̆, đảng viên cho ngế hdroâng kuăn ngo thế prôk hdrối, djâ troăng ahdrối. Tá khu cheăng kal kí pin thế tơkŭm mơnhên nhên mâu tơdroăng tơmiât, troăng pêi ki vâi krâ hdroâng kuăn ngo kal pơ’lêh lơ hriâm vâ mơ-eăm hluăn ing kơtiê krá tơniăn, pro kro mơdrŏng ăm tơná pin, rơpŏng ƀă pơlê pơla’’.

Kĭ tơkêa tơ’noăng pêi pro roh mơhnhôk “Pro pơ’lêh tuăn tơmiêt, hnoăng pêi dêi vâi krâ hdroâng kuăn ngo, pro ăm vâi krâ hdroâng kuăn ngo mơ-eăm hluăn  ing kơtiê krá tơniăn

Roh mơhnhôk châ tiô pơkâ troh hơnăm 2025 ai sap ing 70% tơngi klêng rơpŏng vâi krâ hdroâng kuăn ngo kơtiê, vâ chê kơtiê pơ’lêh troăng tơmiât, chôa ‘lâng tah lôi mâu khôi túa ki ôh tá lĕm tro, ôh tá tơkôm to Tơnêi têa, mơ-eăm xêh hluăn ing kơtiê krá tơniăn; Ai sap ing 40% kơxô̆ rơpŏng chiâng xúa khoa hok kih thuât tung pêi kâ; lối 25% kơxô̆ rơpŏng ai tơdroăng rêh ối pêi lo hên ‘na kế tơmeăm khoăng, hiâm mơno châ pơ’lêh; Kơxô̆ rơpŏng kơtiê, vâ chê kơtiê cho mơngế vâi krâ hdroâng kuăn ngo kơdroh sap ing 3 – 4 % rêm hơnăm.

Mơhnhôk a roh leh, Kăn hnê ngăn Vi ƀan Măt trâ̆n Tơnêi têa Việt Nam kong pơlê Kon Tum tối nhên: Ƀă pói vâ kum mơngế vâi krâ hdroâng kuăn ngo tung kong pơlê ai tơdroăng rêh ối ‘na hiâm mơno thăm po rơdâ, hlê plĕng, ai hên kế tơmeăm khoăng rế hía rế châ pơ’lêh ƀă mơdêk, kum pêi pro ƀlêi trâng Pơkâ Hneăng hôp Đảng ƀô̆ kong pơlê roh má XVI, hneăng hơnăm 2020 – 2025 hiăng pơkâ mơ’no, Khu pơkuâ cheăng Đảng kong pơlê hiăng ai Mơgêi kơxô̆ 08 ‘na troăng hơlâ pêi pro Mâu roh mơhnhôk '‘Pro pơ’lêh troăng tơmiât, troăng pêi dêi vâi krâ hdroâng kuăn ngo, pro ăm vâi krâ hdroâng kuăn ngo mơ-eăm hluăn ing kơtiê krá tơniăn’’ tung kong pơlê.

Ƀă troăng tơmiât mê, Vi ƀan Măt trâ̆n tơnêi têa Việt Nam kong pơlê mơhnhôk Roh mơhnhôk ƀă krếo thế mâu khu râ, kơvâ cheăng, mâu khu râ cheăng kal kí – rêh ối pơlê pơla, vâi krâ mâu hdroâng kuăn ngo, mâu khu pơkuâ tơdroăng loi tĭng tiô khôp tung kong pơlê rŭm môi tuăn, tơrŭm ƀă Măt trâ̆n Tơnêi têa Việt Nam pơtâng tối, mơhnhôk; mơnhông tơdroăng ki rơdêi, hbrâ pêi rơkê, mơhnhôk mâu khu râ, tơdroăng tơ’lêi hlâu a rêm kơpong kuăn pơlê rêh ối tung tơdroăng veăng pêi pro Roh mơhnhôk.

A Leh mơhnhôk “Pro pơ’lêh tuăn tơmiât, hnoăng pêi dêi vâi krâ - nhŏng o hdroâng kuăn ngo, pro ăm vâi krâ hdroâng kuăn ngo mơ-eăm hluăn ing kơtiê krá tơniăn’’, Vi ƀan Măt trâ̆n Tơnêi têa Việt Nam kong pơlê Kon Tum hiăng tơkŭm kĭ tơkêa Tơdroăng tơrŭm pêi pro Roh mơhnhôk, hneăng hơnăm 2021 – 2025 ƀă Viƀan kong pơlê ƀă kĭ tơkêa tơ’noăng pêi pro Roh mơhnhôk pơla Vi ƀan Măt trâ̆n Tơnêi têa Việt Nam a 10 tơring, pơlê kong kơdrâm.

VOV Tây Nguyên chêh

A Sa Ly tơplôu ƀă tơbleăng