VOV4.Sêdang - Khu kăn pơkuâ hnê ngăn Đảng kong pơlê Kon Tum pơkâ tung 5 hơnăm la ngiâ mơ-eăm ai 4 tơring [ă pơlê kong kơdrâm Kon Tum châ mơnhên tối thôn pơlê nếo lơ hiăng pê klêi tơdroăng pơkâ mơjiâng thôn pơlê nếo. Vâ ai tiô pơkâ mê, kong pơlê Kon Tum thế ‘nâi nhên tơdroăng vâ tơbleăng pêi pro tro 8 khu tơdroăng cheăng, troăng hơlâ, tung mê, tơmâng ngăn khât troh tơdroăng hnê tối vâ kuăn pơlê mơ-eăm mơjiâng thôn pơlê nếo. 

Troh nôkố, kong pơlê Kon Tum ai 28 to cheăm châ mơnhên cheăm pêi klêi thôn pơlê nếo. pakĭng mê, ai 10 to cheăm châ sap ing 15 troh 18 tơdroăng pơkâ; 45 to cheăm sap ing 10 troh 14 tơdroăng pơkâ ƀă 2 to cheăm pêi klêi sap ing 8 troh 9 tơdroăng pơkâ. Khu pơkuâ ngăn Đảng kong pơlê Kon Tum pơkâ tung 5 hơnăm la ngiâ mơ-eăm ai 4 to tơring ƀă pơlê kong kơdrâm Kon Tum pêi klêi thôn pơlê nếo lơ pêi klêi hnoăng cheăng mơjiâng thôn pơlê nếo.

Ai sap ing 60 to cheăm pêi klêi thôn pơlê nếo, môi tiah: pơkâ pro troăng prôk, hno têa, on tơhrik, hngêi mơhno túa lĕm tro, hngêi ối kuăn pơlê, kơxo# ngế ai cheăng pêi đi đo ƀă hên ki ê. Achê kố, a Rôh hôp má 3 Khu pơkuâ ngăn Đảng ƀo# kong pơlê hneăng má 15, Khu pơkuâ ngăn Đảng kong pơlê Kon Tum tơkŭm tơpui tơno hnoăng cheăng mơjiâng thôn pơlê nếo. Tơpui a rôh hôp, pôa Dương Văn Trang, Ngế cheăng tung Tíu xiâm Đảng, kăn pơkuâ hnê ngăn Đảng kong pơlê Kon Tum tối ăm ‘nâi:

“Khu pơkuâ ngăn Đảng hiăng pơkâ séa ngăn, mơnhên tối nhên mâu tơdroăng ki hiăng pêi pro klêi, mâu tơdroăng ki tá hâi pêi pro klêi, xơpá tơvâ tơvân tung pơla mơjiâng thôn pơlê nêó a kong pơlê. Mơnhên xiâm kối ‘na mâu tơdroăng ki pêi klêi ƀă tơdroăng ki tá hâi pêi pro klêi. Séa ngăn tơdroăng ki ai khât dêi kong pơlê, mâu tơdroăng ki hnê mơhno dêi Tơnêi têa ‘na mơjiâng thôn pơlê nếo vâ mơnhên tơdroăng pơkâ, hnoăng cheăng, troăng hơlâ ki kal vâ mơjiâng thôn pơlê nếo a kong pơlê hơnăm 2021 – 2025”.

Leh lo lăm pêi cheăng mơjiâng thôn pơlê nếo a Kon Tum

Vâ pêi klêi mâu tơdroăng pơkâ troh hơnăm 2025 ai 4 tơring ƀă pơlê kong kơdrâm Kon Tum pêi klêi thôn pơlê nếo lơ hiăng klêi tơdroăng cheăng mơjiâng thôn pơlê nếo, Khu pơkuâ ngăn Đảng kong pơlê Kon Tum mơnhên athế tơbleăng, pêi pro tro 8 tơdroăng cheăng, mê cho: mơdêk hnoăng cheăng tối tơbleăng ‘na mơjiâng thôn pơlê nếo; mơdêk ki rơkê plĕng tung rak ngăn ƀă pêi pro túa pơkâ, malối cho mơnhông mơdêk pêi chiâk deăng, thôn pơlê; ‘no liăn cheăng mơjiâng pro hngêi trăng, troăng klông cheăng kâ rêh ối pơlê pơla thôn pơlê tơtro ƀă tơdroăng mơnhông kơpho#.

Klêi mê, vêh pơkâ kơvâ pêi chiâk deăng, mơdêk tơdroăng ki pêi lo kế tơmeăm ăm kuăn pơlê; mơnhông tơdroăng hnê hriâm, khăm pơlât, mơhno túa lĕm tro, rak vế kong prâi tơnêi tíu; mơdêk ki rơkê plĕng tung tơrŭm Đảng ƀă khu pơkuâ tơdroăng kal kí a pơlê, cheăm; pêi pro tơdroăng ki mơhnhôk veăng tơlo liăn mơjiâng thôn pơlê nếo; mơdêk tơdroăng ki pơkuâ dêi rêm râ Đảng, rak ngăn pơkuâ dêi Vi ƀan hnê ngăn rêm râ ƀă mơdêk ivá mâu khu pú hên cheăng ‘na tơdroăng kal kí pơlê pơla a thôn pơlê tung mơjiâng thôn pơlê nếo.

Klêi kơ’nâi Têt Lo hơnăm nếo Tân Sửu 2021, tâi tâng tá 10 tơring, pơlê kong kơdrâm dêi kong pơlê Kon Tum tơkŭm po Leh lo lăm pêi cheăng apoăng hơnăm tơbleăng ăm tâi tâng kuăn pơlê tơrŭm tơdjuôm ivá mơjiâng thôn pơlê nếo ƀă kơpho# rơkê plĕng. A pơlê kong kơdrâm Kon Tum, khu kăn pơkuâ ƀă kuăn pơlê dêi 21 to cheăm, bêng hiăng lo pêi pro tơdroăng ki pêt loăng apoăng hơnăm mơ-eăm tung hơnăm kố pêt ki iâ hlái ai 2 rơpâu xiâm loăng ngiât; ok ƀê tong a mâu troăng prôk tung thôn pơlê; lo lăm pêi cheăng go#m văng ‘mâi rơnêu kơpho#.

Pôa Nguyễn Thanh Mân, kăn hnê ngăn Vi ƀan pơlê kong kơdrâm Kon Tum ăm ‘nâi, hơnăm kố pơlê kong kơdrâm mơ-eăm kô ai tơ’nôm 2 to cheăm Čư\ Kroong pêi klêi thôn pơlê nếo. Troh hơnăm 2023 pơlê kong kơdrâm kô pêi klêi thôn pơlê nếo ƀă kơpho# túa má II hdrối hơnăm 2025. Khu kăn pơkuâ hiăng pơcháu hnoăng cheăng ăm tơrêm to cheăm, bêng, kơ koan tíu pêi cheăng rak tơniăn lo lăm pêi cheăng châ tơƀrê, ai pơxúa:

“Ƀă mâu cheăm tơdroăng ki lo lăm pêi cheăng pro troăng prôk a thôn pơlê, ‘mâi rơnêu mâu kế tơmeăm a mâu pơlê cheăm ki vâ pêi pro vâ mơjiâng mâu tơdroăng pơkâ vâ pêi klêi thôn pơlê nếo. Ƀă mâu bêng vêh pêi pro nếo tơdroăng ki rak tơniăn tung kơpho#, tơkŭm po kĭ tơhrâ ƀă mâu rơpŏng kuăn pơlê rak ngăn hngêi trăng, troăng klông kih thuât kơpho#, rak ngăn loăng ngiât. Rơtế amê Vi ƀan hnê ngăn pơlê kong kơdrâm kô ‘mâi rơnêu kơpho#, malối cho ‘mâi rơnêu kĭng troăng, klŏng mơ’no têa, loăng ngiât, on tơhrik a mâu troăng prôk troh a tíu xiâm dêi pơlê kong kơdrâm.

Pêi pro troh tơdroăng ki mơjiâng pơlê kong kơdrâm Kon Tum chiâng kơpho# túa má II, pơlê kong kơdrâm kô tơbleăng mâu kế tơmeăm ki kal vâ po rơdâ tơnêi tơníu kơpho#”.

Kăn pơkuâ pơlê kong kơdrâm Kon Tum pêt loăng ngiât a troăng kơpho#

Rơtế ƀă mâu troăng hơlâ pơkâ tơdjuôm, khu pơkuâ ngăn rêm to cheăm, tơring dêi kong pơlê Kon Tum séa ngăn a tơdroăng ki ai khât dêi kong pơlê vâ ai troăng hơlâ pơkâ krê, vâ rak vế ƀă mơdêk ăm rêm to tơdroăng pơkâ thôn pơlê nếo. Pôa Nguyễn Văn Thủy, kăn phŏ hnê ngăn Vi ƀan tơring Kon Rẫy ăm ‘nâi:

“Tung ki hên troăng hơlâ mê ki kal cho mơhnhôk kuăn pơlê ‘nâi xúa kơmăi kơmok tung pêi cheăng kâ vâ pro chiâng tơdroăng ki kơnía, pêi lo liăn hên tâ tung rơtế a môi ƀăng tơnêi vâ pơkâ tơleăng tơdroăng pêi lo liăn ƀă hluăn ing kơtiê krá ton. Ki nhên gá, mê cho ăm mâu hdrê loăng pêt, mơnăn ki nếo, dâi lĕm, tung tơdroăng ki xúa thăm nếo pêt mơjiâng ƀă mâu túa hdrê loăng pêt vâ pêi lo liăn hên tâ, pơkâ tơleăng tơdroăng ki pêi lo liăn ăm kuăn pơlê”.

Vâ pơtối rak vế krá tơniăn, mơdêk mâu tơdroăng pơkâ, khu kăn pơkuâ 28 to cheăm pêi klêi thôn pơlê nếo dêi kong pơlê Kon Tum pơtối mơdêk hnoăng cheăng tối tơbleăng ‘na mơjiâng thôn pơlê nếo; rak vế tơƀrê tung hneăng tơ’noăng ‘’Kon Tum tơdjuôm ivá mơjiâng thôn pơlê nếo’’, mơhnhôk, xúa mâu ivá cheăng vâ ‘mâi mơnhông, rak vế ƀă mơdêk mâu tơdroăng pơkâ.

                                                                                                                   Quốc Học chêh tối            Katarina Nga tơplôu ƀă tơbleăng