VOV4.Sêdang - Lối 15 hơnăm hdrối, tôn Tu Thó, cheăm Tê Xăng, tơring Tu Mrông, kong pơlê Kon Tum athế tơkâ luâ 3 rôh xĕn pơlê troh kơpong ki pro pơlê nếo xua tơnêi tơhnah tơhnâp. Achê kố, châ Tơnêi têa tơmâng ngăn, tŏng kum liăn ngân, ‘no liăn cheăng mơjiâng pro hngêi trăng, troăng klông ki krá gâk, vâ chê 140 rơpŏng kuăn pơlê hdroâng kuăn ngo Rơteăng hiăng hmiân tuăn ƀă tíu ối nếo.

Ƀă kơxô̆ liăn ‘no hên sap ing hdrối nah troh nôkố, tơring Tu Mrông hiăng ‘mâi xĕn tâi tâng 139 rơpŏng, tơdrêng amê hnối mơjiâng pro klêi, gak mâu troăng prôk môi tiah on tơhrik, têa ôu kâ hum roh, hngêi mơhno túa lĕm tro, hngêi trung mầm non, troăng prôk tung thôn, troăng lăm ngi klâng hiăng tơniăn tơdroăng rêh ối ăm vâi krâ nhŏng o.

Pôa A Đê, kăn hnê ngăn Vi ƀan cheăm Tê Xăng ăm ‘nâi, khŏm mơ-eăm troh mơ’nui hơnăm 2021 kô ‘mâi xê̆n tâi tâng vâ chê 140 rơpŏng troh kơpong ki pro pơlê nếo, tơniăn tơdroăng rêh ối ƀă pêi cheăng kâ ăm kuăn pơlê.

Katarina Nga  tơplôu ƀă tơbleăng