VOV4.Sedang - Tơbleăng ing Vi ƀan tơring Ia H’Drai, kong pơlê Kon Tum tối ăm ‘nâi kong mêi kân, khía pê têi hlối ai jâ kơdo, tơro têi nếo achê kố hiăng pro tro lŭp ó a tơring kố. Xêo apoăng ăm hlo, kong mêi kân, khía pê têi hiăng pro 6 toăng hngêi tơtêa kuâ, lối 2.600 xiâm loăng kơxu tro tơro têi tơđôu, kơtong. Tiô xêo tro lŭp lối 1,2 rơtal liăn.

Khía jâ kơdo, tơro têi xuân pro tơđôu, kơtong 4 xiâm trăng on tơhrik, chong kơ‘vong, pro tơ’nhê 11 troăng kơxái on tơhrik ƀă kơtê kơxái on tơhrik vâ chê 20 tíu, pro tơpâ on tơhrik, 86 toăng kơmăi klâ xoăng on tơhrik a tâi tâng tơring Ia H’Drai tơpâ on. Kŏng ti on tơhrik Kon Tum hiăng tơkŭm mơngế rơnêu troăng kơxái on tơhrik mơ’no on tơhrik ăm lối 1 rơpâu rơpŏng.

Môi xiâm loăng kân hiăng ton hơnăm kơlâk a Ia H'Drai

Vi ƀan tơring Ia H’Drai hiăng mơhnhôk khu ngế tơkŭm gô̆m loăng ki tơđôu rak tơniăn troăng klông, ăm rơxế chiâng prôk lăm; tŏng kum kuăn pơlê ‘mâi rơnêu kế tơmeăm khoăng ki tro lŭp; seá ngăn tơmeăm khoăng a mâu tíu tâ phĭu; tơrŭm ƀă mâu kơ koan tíu cheăng, khu tê mơdró xêo tơmeăm khoăng tro lŭp xua khía jâ kơdo, tơro têa pro.

          A Sa Ly tơplôu ƀă tơbleăng