VOV4.Sêdang - Tung kơxô̆ vâ chê 357.000 ngế kuăn pơlê dêi kong pơlê Kon Tum a kơxo ah, lơ 23/5 kô pêi pro dêi hnoăng cheăng dêi kuăn pơlê, pro xiâm dêi tơná ing kơtâ hlá phĭu rah pôk khu kăn Kuô̆k hô̆i hneăng 15 ƀă khu kăn Hô̆i đong rêm râ, hneăng hơnăm 2021-2026, ai rơpâu ngế kuăn pơlê ki chêh inâi mot tung hlá mơ-eá dêi tơnêi têa pin. Mâu kuăn pơlê ki mê hdrối nah cho mâu ki lăm rêh ối hmâng vâ ƀă xo on veăng ôh tá ai hlá mơ-eá pơkŏng rêh ối a kơpong tíu tơkăng kong pơla Việt Nam - Lếo nôkố hiăng châ ‘mot inâi mơngế tung tơnêi têa Việt Nam tro tiô tơdroăng tơhrâ dêi Chin phuh péa tơnêi têa.

Rế vâ chê troh hâi tâ phĭu rah xo kăn Kuô̆k hô̆i hneăng 15 ƀă Hô̆i đong hnê ngăn rêm râ, hneăng hơnăm 2021-2026, prếi on veăng ngoh A Vơi ƀă nâ Y Quên, kuăn ngo Jêh - Triêng ối a pơlê Đăk Si, cheăm Đăk Dục, tơring Ngọc Hồi thăm rế phiu ro tâ. Hlối mơgrúa lĕm dêi hngêi trăng, prế on veăng xuân hiăng djâ hlá kờ tơnêi têa ki khêi kơtúa dêi a hơlâ troăng. Nâ Quên ăm ‘nâi, péa on veăng nâ xuân dế 27 hơnăm, tŭm prế châ nôu, pâ lo ing kong têa Lếo lăm troh rêh ối a pơlê Đăk Si ing ối tơxĭn nah.

Hơnăm 2012 ing tơdroăng hnê mơhno dêi mâu kăn ƀă kơvâ ngăn ‘na luât dêi cheăm tơring tŭm péa ngế châ chêh ‘mot inâi mot tung tơnêi têa Việt Nam klêi mê, má trâm dêi rơpó hmâ dêi rơpó hlối xo dêi rơpó chiâng on veăng.

Hngêi A Vơi ƀă nâ Y Quên chuâ hlá cơ tơnêi têa vâ koh hâk ro Hâi tâ phĭu

Hâi tâ phĭu lơ 23/5, prế on veăng rôh má peá châ lăm tâ phĭu pêi pro tro hnoăng dêi mơngế kuăn pơlê, hnoăng tơná pro xiâm tâ phiu ro tung hiâm mơno hlối hâk tơngăm há:

“Kố cho rôh má péa á châ lăm tâ phĭu. Má on veăng á tâ phĭu ro tung hiâm mơno. Drêng hâi châ chêh ‘mot inâi tung tơnêi têa á hlo mâu ngế lăm tâ phĭu á  bú tâ khíu kơ dêi tơná. Tung mâu hâi hdrối nah kăn thôn ƀă mâu kăn ƀô̆ cheăm xuân hiăng lăm hnê tối ‘na luât tâ phĭu, tơbleăng inâi mâu ngế ki lo tơbriât pro kăn ăm má on veăng á ‘nâi. Klêi mê xuân troh a kuât dêi pơlê vâ hnê tơbleăng ăm kuăn pơlê ‘nâi mâu tơdroăng. Má on veăng xuân rế púi vâ troh hâi ki lăm tâ phĭu”.

Tung hâi tâ phĭu a lơ 23/5 cheăm tơkăng kong Đăk Dục, tơring Ngọc Hồi, kong pơlê Kon Tum ai tâi tâng 410 ngế kuăn pơlê cho mâu ki châ chêh ‘mot inâi mot tung tơnêi têa Việt Nam sap ing hơnăm 2009 nah troh hơnăm 2020. Mâu kuăn pơlê ki mê ối tơkŭm hên a péa pơlê Đăk Si ƀă Đăk Răng.

Pôa Bloong Keo, môi ngế kuăn pơlê Đăk Si ăm ‘nâi, tâi tâng kuăn pơlê châ chêh ‘mot inâi mot tung tơnêi têa Việt Nam nôkố xuân hiăng ai tơdroăng rêh ối tơniăn, châ lăm tâ phĭu cho môi tơdroăng ki châ kuăn pơlê tối cho kal khât vâ mơhno hnoăng tơná ƀă pơlê xiâm Việt Nam:

“Ki hdrối, châ Đảng, Tơnêi têa tơmâng khât mơhno ăm tíu ối, ăm kuăn pơlê châ tơniăn. Kuăn pơlê pêi cheăng kâ mơ-eăm kơhnâ. Drêng vêh troh a hngêi, hngêi trăng ôh tá tơnhiê tơ’nhĕng nôkố hiăng lĕm yoh. Kuăn pơlê rêh ối akố pêi tro tơdroăng kring vế tơniăn pơlê pơla. Mâu troăng hơlâ dêi Đảng - luât tơnêi têa kuăn pơlê xuân rak vế pêi pro tro. Kuăn pơlê châ chêh ‘mot inâi mot tung tơnêi têa Việt Nam hiăng hbrâ rơnáu vâ râng hlá phĭu lăm tâ phĭu”.

Prếi on veăng A Vơi ƀă Y Quên ngăn tơdroăng chêh tối ‘na tâ phĭu ki vâi tơbleăng a kuât dêi pơlê

Pôa Phạm Hải Châu, Kăn phŏ hnên ngăn Đảng tơring, Kăn hnê ngăn Hô̆i đong tơring, Kăn hnê ngăn Vi ƀan tâ phĭu dêi tơring Ngọc Hồi, kong pơlê Kon Tum ăm ’nâi, vâ kum kuăn pơlê ki ing kong ê châ ‘chêh inâi ‘mot tung tơnêi têa ai tŭm hnoăng ki pơxúa, hnoăng chiâng ta phĭu dêi tơná, mâu kăn rêm râ rơtế ƀă khu grup dêi tơring ing apoăng hơnăm 2021 troh nôkố hiăng pêi tro tơdroăng hnê tối ƀă troăng hơlâ “pôu tơrêm hngêi, trâm tơrêm ngế’’.

Tơring hiăng pêi pro rôh séa ngăn nhên hnê tối ‘na tơdroăng tâ phĭu, tung mê, ai tơmâng khât troh kuăn pơlê cho mâu ngế ing kong têa ê ki nếo châ chêh ‘mot inâi mot tung tơnêi têa”:

“Mâu ngế cheăng hnê tối ƀă mâu kăn ƀô̆ dêi thôn lăm pôu tơrêm rơpŏng hngêi ki mê hnê tối ƀă rơkong kuăn pơlê hmâ tơpui ăm mâu kuăn pơlê ki mê châ chêh ‘mot inâi mot tung tơnêi têa hnê tối ăm vâi hlê ‘na Luât tâ phĭu xuân môi tiah hnoăng pêi pro dêi kuăn pơlê mơngế Việt Nam drêng lăm tâ phĭu rah xo kăn Kuô̆k hô̆i ƀă kăn hnê ngăn Hô̆i đong rêm râ. Ing tơdroăng hnê tối nhên khât ƀă hlối mơhno um, tối hleăng nhên ăm kuăn pơlê hlê ƀă kuăn pơlê hâk phiu, loi tơngah khât kơ mâu kăn pơkuâ dêi Đảng pêi pro tro hnoăng tâ phĭu dêi tơná”

Khoa Điềm chêh

Gương tơplôu ƀă tơbleăng