VOV4.Sêdang - A kong pơlê Kon Tum, mâu Khu pơkuâ ngăn, kơvâ cheăng dế pơtối tŏng kum mơngế pêi cheăng ƀă mơngế xúa mơngế pêi cheăng trâm pá xua pơreăng kân COVID 19 tiô Pơkâ kơxô̆ 68 dêi Chin phuh. Pơtối mê, ƀă troăng hơlâ tŏng kum kơdroh kơlo nâp Liăn ƀaoh hiêm trâm xía vâ pêi cheăng, tơdroăng hmâ trâm tung pêi cheăng, lâp kong pơlê Kon Tum ai 872 tíu cheăng châ tŏng kum ƀă kơxô̆ lối 15.300 ngế pêi cheăng. Kơxô̆ liăn châ kơdroh kơlo nâp tung 12 khế xêo sap ing khế 7 7/2021 cho lối 4 rơtal 670 rơtuh liăn.

Ƀă mơngế pêi cheăng pơtê lôi tơkêa pêi cheăng laga ôh tá tŭm pơkâ vâ châ tŏng kum liăn ôh tá ai cheăng pêi, Khu pơkuâ cheăng pêi, Mô đô̆i rong râ ƀă Rêh ối pơlê pơla kong pơlê Kon Tum hiăng pêi kêi đeăng hồ sơ dêi 50 ngế pêi cheăng ai tŭm pơkâ châ tŏng kum, tung mê, tŏng kum tơ’nôm 28 ngế vâi hdrêng cho kuăn ‘nĕng dêi mơngế pêi cheăng ƀă tâi tâng kơxô̆ liăn lối 213 rơtuh liăn.

A Sa Ly tơplôu ƀă tơbleăng