VOV4.Sêdang - Kơxê lơ 7/4, Vi ƀan kong pơlê Kon Tum ƀă Hngêi trung Đăi hok Tây Nguyên tơkŭm po leh kĭ tơkêa tơrŭm tung tơdroăng hnê mơjiâng, hriăn plĕng khoa hok ƀă pơcháu ăm kơmăi kơmok hneăng hơnăm 2021 – 2025. Pơkâ xiâm dêi tơdroăng tơkêa cho vâ mơnhông châ tơƀrê tơmeăm ki ai hlâu, tơmeăm ki rơdêi dêi rêm pâ vâ rơtế mơnhông tung mâu kơvâ cheăng: Tơrŭm hnê mơjiâng mơngế pêi cheăng tiô mâu kơvâ rêm pâ rơhêng vâ ‘nâi plĕng vâ mơnhông mâu  tơdroăng ki ai hlâu mơnhông rơdêi ‘na hnê mơjiâng dêi hngêi trung ƀă tơdroăng kal vâ hnê mơjiâng dêi kong pơlê Kon Tum kum tung  tơdroăng mơnhông mơdêk tơdjuôm péa pâ; tơrŭm hriăn plĕng khoa hok ƀă pớchau ăm kơmăi kơmok vâ mơjiâng mâu tơmeăm ki xiâm, tơmeăm ki mơnhông tơtêk dêi kong pơlê Kon Tum ƀă kơpong Tây Nguyên.

Tíu leh kĭ tơkêa

Tơdrêng amê, xúa châ tơƀrê tơmeăm khoăng ki ai hlâu drêng kong prâi hơ’leh; xúa mâu tơmeăm ki ai hlâu ƀă mơnhông châ tơƀrê tâ mê nếo tơmeăm ki ai hlâu dêi kong pơlê Kon Tum tung hriăn plĕng khoa hok ƀă pơcháu kơmăi kơmok, mơnhông tơdroăng hnê khoa hok ƀă kơmăi kơmok, rak ngăn tơdroăng rêh ối, ivá ăm kuăn pơlê ƀă rak vế khôi túa lĕm tro hdroâng kuăn ngo a kơpong Tây Nguyên.

A Sa Ly tơplôu ƀă tơbleăng