VOV4.Sêdang - Tơdroăng pơkâ dêi tơnêi têa ‘na mơjiâng thôn pơlê nếo chiâng tơdroăng mơhnhôk pêi pro lâp lu tung tơnêi têa tối tơchoâm, Dak Nông tối krê. Tơdroăng hiăng pro xiâm ki rơdêi, tơkŭm tơrŭm môi tuăn dêi rêm râ tung pơlê pơla, mơhnhôk tăng ivá rơdêi ‘na môi tuăn ƀă tơmeăm khoăng vâ mơjiâng kơpong thôn pơlê rế ton rế xông tơ-ƀrê, malối kơpong xơpá ƀă kơpong hdroâng kuăn ngo.

Maluâ ai hên tơnêi, la tơdroăng ki kơklêa, kơtiê ối trâm đi đo ƀă rơpŏng pôa Ðiểu Byan, hdroâng kuăn ngo M’nông, a ƀon Điêng Đu, cheăm Dak Ngo, tơring Tuy Đức, kong pơlê Dak Nông. Xiâm kối cho xua rơpŏng pôa tá hâi ‘nâi túa pêi kâ, pêi pêt kế tơmeăm ối tiô tuá ki ton.

Tơdroăng mơjiâng thôn pơlê nếo hiăng kum pôa Ðiểu Byan tăng troăng prôk ki tơtro tung mơnhông cheăng kâ ƀă mơ-eăm pro kro mơdrŏng. Klêi kơ’nâi pôa châ veăng hriâm a mâu lâm ki hnê ‘na pêi chiâk, hnê hriâm khoa hok – kih thuât hiăng rơtế ƀă rơpŏng khên tơnôu hơ’lêh tơnêi pêt, túa pơkâ kơdrum pêt kloăng hôt, kơphế a ƀăng tơnêi ki 8 ha.

Tơnêi mê pôa hiăng pêt mâu klŏng hôt hdrê ki dâi, kơphế hdrê ki nếo hiăng dâi lĕm, plâi kơtóu pêi lo liăn hên châ lối hrĭng rơtuh liăn rêm hơnăm. Drêng hiăng hluăn ing kơtiê, kơklêa, pôa Ðiểu Byan khên tơnôu ‘no liăn păn tơ’nôm ro lai ƀă troăng prôk tiô pơkâ ki pêt hên hdrê, păn hên mơnăn vâ ví tơdroăng ki ôh tá mơhúa ƀă yă tê ôh tá tơniăn kế tơmeăm, pêi lo ing chiâk deăng, kơnôm tơdroăng ki pêi lo liăn dêi rơpŏng đi đo tơniăn.

Nôkố, rêm hơnăm, ôh tá riân kơxô̆ liăn ‘no hrê, rak ngăn, rơpŏng pôa ối pêi lo liăn tơniăn lối 400 rơtuh. Ôh ti xê pro kro mơdrŏng ăm dêi tơná, pôa Điểu Byan ối kum 4 rơpŏng kơtiê mung ro kăn păn xo kuăn, vâ pro tơ’lêi ‘na kơxô̆ liăn vâ vâi krâ nhŏng o tung pơlê rơtế hluăn ing kơtiê. Sap ing mâu tơdroăng pêi ki ai pơxúa, tơƀrê mê, pơla hdrối kố nah pôa Ðiểu Byan châ pôk mot cheăng tung chi ƀô̆, kăn pơkuâ ƀon Điêng Đu.

Tối ‘na tơdroăng mơjiâng thôn pơlê nếo, pôa Ðiểu Byan ăm ‘nâi, kố cho tơdroăng ki ai pơxúa khât ƀă kuăn pơlê, malối cho kơpong ki malối xơpá ƀă kơpong hdroâng kuăn ngo kố. Kơnôm ai tơdroăng pơkâ ki nếo, tơkŭm tŭm ivá tơrŭm; pro hơ’lêh nếo túa tơmiât dêi kuăn pơlê tung cheăng kâ tơtro ƀă khoa hok – kong ngê̆; tơtro ƀă tơdroăng cheăng pôu râng dêi tơná ƀă rơpŏng hngêi, tơrŭm ƀă pơlê pơla.

Pôa Điểu Byan dế chĕm dêi ro nhâ

Mơjiâng thôn pơlê nếo hiăng pro ngiâ méa thôn pơlê hơ’lêh tâi tâng tá liăn ngân, hiâm mơno ƀă kuăn mơngế nếo; pro tơ’lêi hlâu ăm tơdroăng ki tơrŭm ‘na hiâm mơno ƀă mơhno túa lĕm tro pơla mâu hdroâng kuăn ngo ƀă dêi rơpó. Xuân tiô pôa Ðiểu Byan, châ kuăn pơlê loi tơngah pôk pro kăn pơkuâ ơlê cho tơdroăng ki hâk tơngăm khât. Laga, kố xuân cho hnoăng cheăng ki kân, tơná pôa athế đi đo mơ-eăm pêi klêi vâ rơtế ƀă kuăn tung ƀon pêi pro tơƀrê tơdroăng pơkâ mơjiâng thôn pơlê nếo.

Hdrối rôh vâ pêi pro tơdroăng thôn pơlê nếo, ƀon Bu Bir, cheăm Quảng Tín, tơring Dak Rlâp, kong pơlê Dak Nông ai 96 rơpŏng kuăn pơlê, la ai troh 16 rơpŏng kơtiê ƀă 30 rơpŏng vâ chê kơtiê. Hngêi trăng troăng klông ki hên cho mâu troăng prôk tơnêi, xơpá tung tơdroăng ki pơto chơ tơmeăm khoăng, phon rơvât mot tung mâu kơpong pêi chiâk deăng, mâu khu ki roê hjip yă.

Sap ing rôh ki tơbleăng mơjiâng thôn pơlê nếo, châ tơdroăng ki veăng tŏng kum ‘na liăn ngân pro troăng prôk, kum ‘na hdrê pêt, mơnăn păn, khoa hok – kih thuât ƀă hên ki ê, kuăn pơlê a tíu kố phiu ro khât ‘na tơdroăng ki pleăng tơnêi pro troăng, khên tơnôu hơ’lêh pêt mâu hdrê loăng ki dâi lĕm, xúa khoa hok –kong ngê̆ tung cheăng kâ châ tơƀrê. Nôkố, lâp ơlê bu ối 4 rơpŏng kơtiê, 10 rơpŏng vâ chê kơtiê, kơxô̆ troăng ki châ ok ƀê rong tung thôn pơlê châ lối 90%.

Troh nôkố, lâp kong pơlê ai 29 to cheăm tung 60 to cheăm pêi klêi thôn pơlê nếo. Ƀă 12 to cheăm ki malối xơpá ối tung 2 tơring 30a cho Tuy Đức ƀă Dak Glong troh nôkố pơrá hiăng pêi klêi 10 tơdroăng pơkâ; hngêi trăng, troăng klông cheăng kâ rêh ối pơlê pơla thôn pơlê kơpong ki malối xơpá, malối cho kơpong hdroâng kuăn ngo châ tơmâng ngăn ‘no liăn cheăng.

Jâ Hà Thị Hạnh, kăn pơkuâ Khu hnê mơhnhôk cheăng Khu pơkuâ ngăn Đảng Dak Nông ăm ‘nâi, ƀă kuăn pơlê hdroâng kuăn ngo kong pơlê Dak Nông tối tơdjuôm, malối cho hdroâng kuăn ngo akố mê khu ki pơkuâ xiâm cho krâ pơlê, kăn pơkuâ pơlê, ngế ki châ kuăn pơlê loi nhuô̆m ƀă đảng viên tung pơla hdrối kố nah hiăng mơdêk tro khât hnoăng cheăng djâ troăng ahdrối tung pêi pro mâu troăng hơlâ pơkâ dêi Đảng, luât dêi Tơnêi têa, veăng kum mơjiâng pơlê rế hía rế kro mơdrŏng.

Tung mê, hên ngế hiăng ai túa tơmiât, túa pêi ki rơkê plĕng, xúa khoa hok – kih thuât tung cheăng kâ châ tơƀrê mâu túa pơkâ ki rơkê plĕng, tê mơdró ăm pêi lo liăn hên, pro chiâng mâu tơdroăng tơ’noăng pêi cheăng kơhnâ a kơpong thôn pơlê, kơpong hdroâng kuăn ngo; hên ngế krê hiăng châ khu râ Đảng, khu kăn pơkuâ tơring, cheăm khĕn kơdeăn, kuăn pơlê loi nhuoăm pôk pro mâu kăn pơkuâ thôn, pơlê, chiâng mâu ngế ki xiâm tung tơdroăng cheăng kal kí a cheăm, tơring.

                                                                   Hlá tơbeăng Nhân dân

Katarina Nga tơplôu ƀă tơbleăng