VOV4.Sêdang - Tiô tơdroăng ki nếo pơtâng tối, châ hên ngế rơhêng vâ ‘nâi plĕng, mê hiăng ai 144 ngế rêh ối a kơpong ki tro thế mơdât mot lo,  prôk lăm a hơlâ 189/1 troăng Mai Hắc Đế, bêng Tân Thành, pơlê kong kơdrâm Ƀuôn Ma Thuột, kong pơlê Dak Lak klêi kơ’nâi pâk xo ngăn mơheăm pơrá âm tính, ôh tá tâ pơreăng SARS-CoV-2. Maluâ tiah mê, tâi tâng kuăn pơlê akố tối krê, ƀă lâp pơlê kong kơdrâm tối tơchoâm ôh tá chiâng tơngôu, ôh tá chiâng hê, tơdroăng cheăng ki hbrâ tơplâ mơdât pơreăng COVID-19 xuân đi đo châ Khu râ pơkuâ ngăn ƀă khu ngăn ‘na pơkeăng ƀă khăm pơlât dêi kong pơlê Dak Lak pơkâ pêi pro kơtăng khât.

Klêi ai ngế ki apoăng dương tính ƀă SAR-CoV-2, kơvâ ngăn pơkeăng kong pơlê Dak Lak hiăng pơtroh hlá mơ-éa ăm mâu tíu pêi cheăng thế tăng ngăn nhên luât ki ăm phêp, ôh tá tơkŭm hên khu lăm hriâm, ôh tá lăm hyô ngăn ukố umê, ôh tá lăm xah hêi vâ tơniăn ‘na mơngế hbrâ mơdât pơreăng COVID-19.

Ing mê, thế mâu kơ koan, tíu pêi cheăng pơtê pơtân tơdroăng ki ăm pơtê ƀă mâu kăn ki pơkuâ mâu kơ koan, mâu ki pêi cheăng a mâu kơ koan, mâu ngế pêi cheăng ăm tơnêi têa ƀă mơngế pêi cheăng ƀă kŏng (Bú to mâu ki ai tơdroăng kal prôk tơdrêng tê, tơdroăng kal khât ‘nâng chiâng prôk); ôh tá tơkŭm khu pú hên lăm hriâm lơ lăm ôm hyô (tung tơnêi têa ƀă a kong têa ê) tung pơla dế ai pơreăng, dế tơbleăng hdrối ki rơ-iô tơ’lêi tâ tú pơreăng COVID-19; tơkŭm mơngế vâ rak  tơniăn ‘na tơdroăng hbrâ mơdât pơreăng, khăm pơlât a mâu hngêi pơkeăng teăm, tơdrêng, teăm tiô pơkâ kring vế, rak ngăn ƀă mơdêk ivá mo le\m ăm kuăn pơlê tung kong pơlê. 

Pakĭng mê mơdêk hnoăng cheăng séa ngăn ‘mâi hơ’lêh  tiô pơkâ ‘na hbrâ mơdât pơreăng a kơ koan, đông lêng, ngế xiâm pơkuâ kơ koan tíu pêi cheăng chiu pôu râng hnoăng cheăng a ngiâ Ngế xiâm pơkuâ ngăn pơkeăng pơlât ƀă mâu kăn pơkuâ mâu tíu pêi cheăng, mâu ngế pêi cheăng a kơ koan, mơngế pêi cheăng ƀă kŏng ki oh tá vâ rak vế pêi pro tro luât pơkâ ‘na hbrâ mơdât pơreăng COVID-19; pơcháu ăm Khu séa ngăn dêi Tíu xiâm ngăn ‘na Pơkeăng pơlât pơkuâ, tơrŭm ƀă mâu tíu pêi cheăng, mâu ki tơdjâk troh séa ngăn, tí tăng ngăn tơdroăng tơbleăng mâu tơdroăng hnê mơhno ‘na hbrâ mơdât pơreăng COVID-19 a mâu kơ koan, tíu pêi cheăng rak ngăn; pơxâu phak mâu khu ki lâi, ngế ki lâi pro xôi ‘na hbrâ mơdât pơreăng. 

Mâu ki cheăng a Tíu xiâm séa ngăn pơkeăng ƀă mơdât pơreăng kong pơlê xo ngăn mơheăm mâu kuăn pơlê kơpong ki klâ krê a hơlâ troăng 189/1 dêi troăng Mai Hắc Đế

Khu xiâm ngăn pơkeăng pơlât xuân thế mâu tíu pêi cheăng pơtối tơbleăng, pêi tro mâu tơdroăng pơkâ hbrâ mơdât pơreăng COVID-19 tiô hnê mơhno dêi rêm râ pơkuâ, hnê mơhno dêi Vi ƀan  kong pơlê a Hlá mơ-éa chêh kơxô̆ 3743, hâi lơ 4/5/2021 dêi Vi ƀan kong pơlê ƀă mâu tơdroăng hnê mơhno dêi Tíu xiâm ngăn pơkeăng hbrâ mơdât pơreăng COVID-19.

Ngăn a hnoăng cheăng pêi ƀă ‘na mơngế pêi cheăng dêi kơ koan, tíu cheăng pêi tơdroăng tơrŭm ƀă tơkŭm po, tíu pêi cheăng, tơring cheăm kong pơlê mơjiâng troăng hơlâ, pơkâ, tơbleăng pêi mâu tơdroăng vâ rak tơniăn ‘na tơdroăng cheăng khăm pơlât tung pơla tơkŭm po tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong kuăn pơlê rêm râ tung kong pơlê hneăng hơnăm 2021-2026.

Ƀă mâu tíu khăm pơlât, Tíu xiâm ngăn pơkeăng pơlât thế xĭng xoăng mơngế pêi cheăng ăm tơtro ƀă tơdroăng dế tâ tú pơreăng, xing xoăng mơngế gak ngăn, klâ khu pêi cheăng, hơ’lêh dêi rơpó; chêh hlá mơ-éa ki vâ pêi pro tơdroăng hbrâ mơdât pơreăng tiô mâu tơdroăng dế ai pơreăng COVID-19 tâ tú, tung mê, ai pơkâ nhên ‘na xĭng xoăng mơngế gak ngăn, mơngế pêi cheăng, mâu khu thế hơ’lêh dêi rơpó pêi cheăng, pơtroh troh a hngêi pơkeăng, tơdah xo mơngế ki pơlât, ‘na tơdroăng kâ trếo kơhiâm, séa ngăn ki lơ tâ pơreăng, hbrâ mơdât lơ tâ tú tung mâu tíu khăm pơlât drêng ai pơreăng tâ tú a tíu khăm pơlât.

Hlo pơreăng COVID-19 tâ tú rơ-iô, mâu kăn tơring Čư Mgar, kong pơlê Dak Lak dế mơdêk hnoăng cheăng pêi pro ‘na hbrâ mơdât pơreăng. Ing tung kong pơlê ai 1 ngế nhôm tâ pơreăng, ki nếo vêh ing Đà Nẵng, mơhé khăm ngăn mơheăm nếo 1 hdroh klêi mê ăm hlo âm tính, la ki tơ’lêi tâ tú pơreăng xuân ối tung châ. Khu hnê mơhno hbrâ mơdât pơreăng COVID-19 tơring Cư\ Mgar hiăng tơbleăng tơdroăng thế hbrâ mơdât pơreăng a kơlo ki ó tâ.

Pakĭng mê, séa ngăn pơkâ pêi pro kơtăng tâ mâu tơdroăng hbrâ mơdât pơreăng tung tơring, malối a kơpong ki ai tơdroăng tơkŭm hên ngế.  A kơchơ pơlê kân Quảng Phú - a tíu xiâm tê mơdó dêi tơring Čư\ Mgar, Khu rak ngăn kơchơ rah thế mâu ngế lăm séa ngăn rêm hâi tối pơchân ăm kuăn pơlê, tối ăm mâu khu mơdró thế truâ kên pâng rơkong môh tung pơla tê mơdró tơmeăm, ƀă mơngế ki lăm kơchơ rôe tơmeăm; hnê tối ăm kuăn pơlê rôe tơmeăm rĕng iâ, rôe mâu tơmeăm ki tơná vâ rôe, pôi tá ối tơkŭm pú hên tơpui tơno môi tiah hdrối nah…

Mâu troăng hơlâ mê châ kuăn pơlê, mâu ki mơdró vâ môi tuăn. Mâu tíu tê mơdró ki ôh tá kal tung tơring pơla kố xuân dế pêi pro kơtăng tơdroăng hbrâ mơdât… Tâi tâng 40  tíu mơdró karaoke, billiards xuân thế klĭng péa pơtân ‘nôi.

Hlo pơreăng tâ tú rơ-iô, Vi ƀan hnê ngăn kong pơlê Dak Lak hiăng pơkâ hlá mơ-éa ‘na tơbleăng hbrâ mơdât pơreăng drêng tung kong pơlê hiăng tối ai ngế tâ pơreăng COVID-19. Ing mê, kong pơlê Dak Lak hnê mơhno ăm Kăn hnê ngăn Vi ƀan râ tơring, râ cheăm pêi pro tơdroăng tơrŭm ƀă mâu tíu pêi cheăng ki tơdjâk troh hnê mơhno pêi mâu tơdroăng hbrâ mơdât pơreăng tung kong pơlê sap ing 0 chôu hâi lơ 10/5/2021 ta troh tối tơbleăng ki nếo ah nếo.

Hlá tơbeăng Dak Lak

Gương tơplôu ƀă tơbleăng