VOV4.Sêdang - Kŏng ti xiâm Tíu pơtroh kơthô Việt Nam ăm ‘nâi sap ing hâi kố lơ 6/8 kô tơkŭm po tơdroăng “Hạt vàng Bưu điện”. Tiah mê, Kŏng ti xiâm kô diâp 700 tâ̆n phái pơtroh ăm kuăn pơlê a mâu kong pơlê peăng Hdroh dế tro pơreăng tâ tú rơ-iô. Ai 6 to kong pơlê, pơlê kong kân châ hbru ăm mê cho: Pơlê kong kân Hồ Chí Minh, Bình Dương, Đồng Nai, Tây Ninh, Long An, Tiền Giang.

Mâu tíu xoăng phái dêi tíu pơtroh kơthô Việt Nam

Tiô tối hdrối 233 rơpâu ngế kuăn pơlê ki ai tơdroăng rêh ối xơpá châ xo phái ing tơdroăng “Hạt vàng Bưu điện”., krê a Pơlê kong kân Hồ Chí Minh, Tíu pơtroh kơthô Pơlê kong kân kô kum 30 tâ̆n phái tung tơdroăng kố vâ hbru rơtế ƀă rêm to hơpiâp on pế pơchên hmê dế tơkŭm pế hmê ăm mâu khu ki hbrâ mơdât pơreăng ƀă mâu kơtiê. Hdrối mê, kơvâ pơtroh kơthô hiăng tơkŭm tơbleăng lối 2.400 tíu kum kế tơmeăm, pro tơniăn yă tê kế tơmeăm a mâu kong pơlê dế pêi pro klâ krê pơlê pơla.

Katarina Nga tơplôu ƀă tơbleăng