VOV4.Sêdang - Kơxo kố, lơ 24/3, pơxiâm po rôh hôp má 11, Kuô̆k hô̆i hneăng má 14. Pôa Nguyễn Hạnh Phúc, kăn xiâm chêh tơm xo rơkong Kuô̆k hô̆i ăm ‘nâi, vâ rak tơniăn tơdâng tơ’mô tung hnoăng cheăng ‘na mâu ngế cheăng dei Đảng, Tơnêi têa, Kuô̆k hô̆i kô mơdoh dâng 7 chôu vâ séa ngăn nhên mâu tíu pei cheăng pơkuâ dêi mâu inâi Đảng ƀă Tơnêi têa.

Kuô̆k hô̆i rôh kố bu séa ngăn a mâu inâi kăn pơkuâ Tơnêi têa, ôh ti xê to séa ngăn tâi tâng ƀă kố cho tơdroăng ki séa ngăn ăm hneăng má 14. Klêi kơ’nâi rôh tâ phĭu châ tơkŭm po, troh khế 7 hơnăm kố, Kuô̆k hô̆i kô pơtối séa ngăn ‘na mâu ngế cheăng ăm hneăng má 15 ƀă tơdroăng ki krâ kơlŏng pro kăn kô po tiah hmâ tiô pơkâ.

Tiô tối hdrối a rôh hôp kố, Kuô̆k hô̆i kô pêi pro tơdroăng ki ôh tá pơtê cheăng ƀă mâu kăn pơkuâ xiâm dêi Đảng, Tơnêi tơdrêng amê hnối pôk mâu ngế cheăng teăng ăm mâu ngế ki ối rak dêi hnoăng cheăng kố tiô tơdroăng ki tâ phĭu pơkí. Rơtế amê, Kuô̆k hô̆i xuân pôk, ôh tá pơtê cheăng ƀă mâu inâi kăn pơkuâ mâu kơ koan Tơnêi têa, tung mê, cho: Kăn xiâm phŏ hnê ngăn tơnêi têa, mâu kăn xiâm phŏ hnê ngăn Kuô̆k hô̆i ƀă kăn pơkuâ Vi ƀan dêi Kuô̆k hô̆i, Kăn xiâm séa ngăn Tơnêi têa, kăn xiâm chêh tôm xo rơkong Kuô̆k hô̆i, mâu Ngế pro xiâm phŏ hnê ngăn tơnêi têa, ngế xiâm pơkuâ ƀă mâu ngế cheăng ki ê dêi Chin phuh.

Pakĭng mê, Kuô̆k hô̆i kô ôh tá ăm pơtê cheăng, pôk nếo kăn xiâm hnê ngăn Hô̆i đong tâ phĭu tơnêi têa.

Katarina Nga tơplôu ƀă tơbleăng