VOV4.Sedang - Riân troh 6h lơ 17/5, lâp tơnêi têa hiăng ai 37 ngế tâ pơreăng COVID-19 tung tơnêi têa, mê cho a Bắc Giang 22 ngế; Bắc Ninh 11 ngế; Vĩnh Phúc 3 ngế; Tuyên Quang 1 ngế. Khu xiâm ngăn pơkeăng ăm ‘nâi tung kơxô̆ 37 ngế tâ pơreăng COVID-19 mê, kơxô̆ mâu ngế châ ‘nâi tâ tú a kơpong klâ krê 15 ngế.  Kơxô̆ mơngế tung kơpong châ klâ krê ai 22 ngế. Lâp tơnêi têa ôh tá ‘nâi ulâi mâu tíu xiâm ki nếo tâ. Kơxô̆ mơngế nếo tâ tú riân săp lơ 27/4 troh nôkố ai 1 rơpâu 176 ngế.

Riân troh 16h hâi lơ 16/5, tâi tâng hiăng pâk vaccine mơdât pơreăng COVID-19 rôh má 1 ƀă 2 a mâu kong pơlê, pơlê kong kân tung lâp tơnêi têa ai 979 rơpâu 238 klŏng ăm mâu kăn ƀô̆, mâu ngế cheăng ngăn pơkeăng ki dế pơlât mâu ngế tâ COVID-19, mâu ngăn pơkeăng pêi pro tơdroăng khăm xo mơheăm, ngăn mơheăm, tí tăng xiâm mâu ngế ki tâ tú, mâu ngế cheăng a tôh tơplâ pơreăng COVID-19 tung kuăn pơlê, Khu hnê mơhno hbrâ mơdât pơreăng rêm râ, mâu khu kŏng an, mâu lêng. Tung mê ai 22 rơpâu 561 ngế hiăng châ pâk tŭm 2 roh vaccine.

Gương tơplôu [ă tơbleăng