VOV4.Sêdang - Drêng pơreăng COVID-19 xông tâ tú ó a kong pơlê Dak Lak drêng pơtối châ hlo hên ngế tro tâ tung rêm hâi, Khu pơkuâ ngăn pơkeăng ƀă khăm pơlât kong pơlê Dak Lak hiăng tơbleăng pơkâ ‘na tơdroăng tíu tơdah pơlât mơngế tro tâ COVID-19. Pakĭng thăm pro mâu tíu pơlât troh lâp lu, hngêi pơkeăng pơtân, mê ki phá tơ-ê tung pơkâ kố cho kong pơlê kô tơkŭm pơkuâ ƀă rak ngăn F0 a hngêi, pơ’lêh tơdroăng cheăng dêi mâu Tíu xiâm pơlât chiâng tíu tơdah pơlât mơngế tro tâ COVID-19.

Kơxô̆ mơngế tro tâ COVID-19 tâk rĕng, Dak Lak pêi pro Pơkâ pơlât F0 a hngêi

Pơtối mê, kô pêi pro pơlât a hngêi ƀă ngế tro tâ pơreăng COVID-19 ki ôh tá mơhno tơdroăng châi pa kong ƀă pơlât tiô pơkâ dêi Khu xiâm pơkuâ ngăn pơkeăng ƀă khăm pơlât ‘na pơkâ pơlât a hngêi, châ mâu ƀok thái pơkeăng, khu râ kăn pơkuâ séa ngăn ƀă mơnhên tŭm tiô pơkâ. Tung hâi lơ 2/11, kong pơlê Dak Lak châ hlo 102 ngế tro tâ COVID-19, tung mê ai 44 ngế tung pơlê pơla, mơdêk kơxô̆ ngế tro tâ COVID-19 dêi lâp kong pơlê tâk 4.396 ngế.

A Sa Ly tơplôu ƀă tơbleăng