VOV4.Sêdang - Drêng rôh pôa Nguyễn Xuân Phúc, Ngế pro xiâm hnê ngăn tơnêi têa châ rah xo pro kăn xiâm hnê ngăn tơnêi têa Kŏng hòa xah hô̆i chuh ngiah Việt Nam, kơxê lơ 5/4, pôa Thoungloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn tơnêi têa Kŏng hoa Yân chuh Nhân yân Lếo hiăng pơtroh kơthô ƀă krếo phôn rơkâu. Tung kơthô ai chêh rơkâu kơ Kăn xiâm pơkuâ hnê ngăn Đảng, Kăn xiâm hnê ngăn kong têa Lếo loi khât tiah kố, ƀă ivá mơ-eăm, ki nhoăm ƀă hlê ai hên túa pêi cheăng dêi tơná, pôa Nguyễn Xuân Phúc, Kăn xiâm hnê ngăn tơnêi têa rơtế ƀă mâu kăn xiâm ki nếo kô pơtối mơnhông Việt Nam kâi pêi klêi hên mâu tơdroăng ki kân tâ nếo, pêi tơ-ƀrê tơdroăng Pơkâ Hneăng hôp kân rôh má 13 dêi Đảng Kŏng sản Việt Nam.

Pôa Lý Khắc Cường, Ngế pro xiâm hnê ngăn kong têa Sinuâ krếo phôn rơkâu kơ pôa Nguyễn Xuân Phúc, ƀă pôa Phạm Minh Chính, Ngế pro xiâm hnê ngăn Chin phuh. Ngế pro xiâm hnê ngăn kong têa Sinuâ tối kô mơ-eăm mơjiâng khu tơrŭm cheăng châ ƀlêi tăng, rơtế ai pơxúa pơla péa tơnêi têa, veăng ‘no hnoăng mơ-eăm mơnhông tơrŭm cheăng ƀă kong têa ki achê tơrŭm tung tŭm tơdroăng cheăng pơla Sinuâ, Việt Nam.

Xuân tung hâi ki mê, pôa Yoshihide Suga, Ngế pro xiâm hnê ngăn kong têa Nhuk  xuân hiăng krếo phôn rơkâu kơ pôa Nguyễn Xuân Phúc, Kăn xiâm hnê ngăn tơnêi têa ƀă pôa Phạm Minh Chính, Ngế pro xiâm hnê ngăn tơnêi têa.

Gương tơplôu ƀă tơbleăng