VOV4.Sêdang - Drêng tơdroăng ki tâ tú ó ing pơreăng COVID-19 hiăng lân lu a hên kong pơlê, pơlê kong kân tung lâp tơnêi têa pro lối rơpâu ngế vâi hdrêng ki ối tung kơpong tro thế ăm klâ ối krê, la ôh tá ai nôu pâ, rơpŏng hngêi, xua vâi hdrêng ki tro klâ ối krê rế hiá rế hên. Pakĭng tơdroăng ki tơ’lêi tâ tú pơreăng ƀă athế rêh ối xêh môi ngế tung môi kơpong veăng ki ôh tá hmâ, mâu vâi o kô tơ’lêi trâm tơdroăng ki tô tuăn, châi ko, pro ‘mêi troh hiâm tuăn, thăm nếo kô tro khu ki ê hjip, ‘nêk, mơ’nêa, xua mê, kal athế ai troăng hơlâ ki vâ kring vế vâ châ rak vế tơniăn ăm mâu vâi hdrêng ki ối klâ krê a mâu hngêi ki ăm ối kơtăn hơngế ing rơpŏng hngêi, nôu pâ mê.

Tiô mâu ngế rơkê ‘na tuăn tơchĕng tơmiât dêi vâi hdrêng, vâi hdrêng F0, F1 lăm klâ krê ôh tá ai nôu pâ ối ƀă vâi tơmiât môi tiah tro vâi  ‘nêk mơnhâu tơná, xâu, tô tuăn, tuăn ngôa ôh tá tơleăng lĕm. Tiô nâ Nguyễn Thị Thu Hiền ngế rơkê ‘nâi plĕng ‘na tuăn ngôa, ai tí tăng ‘nâi plĕng hên tơdroăng tối tiah kố, tơdroăng klâ krê gá vâ môi tiah tô pâm ƀă pro ‘mêi ăm vâi hdrêng, malối a mâu vâi hdrêng ki phô̆m xông kân.

Kố cho hơnăm ki tối rĕng loi ƀă tá ki xông tơ-ƀrê ƀă ‘na tuăn ngôa mê tơdroăng hbrâ hnê ăm vâi pơla dế hơnăm ki kố cho kal khât. Mơhé mâu khu tơkŭm ki tơdjâk troh ‘na klâ krê xuân hiăng châ hriâm ‘na tơdroăng hbrâ mơdât ki lơ ‘nêk, hôu, tô pâm pro vâi hdrêng chiâng xâu tung kơpong mê la vâi hdrêng ôh tá ai nôu pâ lơ nhŏng o xiâm ối ƀă pro kơdroh hnoăng ki ai ngế kring vế tơná.

Tơdroăng kố kal thế, hdrối vâ djâ ngế hdrêng lăm klâ krê, nôu pâ nhŏng o xiâm thế hbrâ hnê tối hdrối ăm ngế hdrêng vâ ngế hdrêng pôi tá tơchĕng tơmiât mâu tơdroăng ki xâu vâi lơ ‘nêk, lơ hôu dêi tơná:

“Nôu pâ kô hnê tối ăm mâu khu vâi hdrêng ki kân tâ, mê cho vâi hdrêng ki dế phô̆m xông kân, pakĭng mâu tơdroăng ki vâi hiăng châ hriâm ing ối tơxĭn, mâu vâi hdrênng thế ‘nâi chiâng vâ mơdât mâu tơdroăng ki ôh tá tơniăn ‘na tuăn ngôa. ‘Nâ hía xua tơchĕng tơmiât hên, ‘nâ hía vâ ai ngế ki ối achê, kring vế tơná, tâng ôh tá ai ngế kring vế xuân tơ’lêi chiâng ôh tá tơniăn tuăn ngôa.

Xua mê, tơdroăng ăm ‘nâi ki tơ’lêi ôh tá tơniăn ‘na tuăn ngôa, kô ‘nâi hdrối mâu tơdroăng ki kôm, ai kôm hlo tung kơpong ối klâ krê, mơni kô tro vâi xúa tơná vâ pro tơdroăng ki ê, lơ xúa tơná ai tơdroăng ki ê nếo, ‘nâ hía pro pơlăm pơlối, tơdroăng ki mê kô kum ăm vâi o hbrâ rơnáu xêh tâ’’.

Tơdroăng vâi o ối tung kơpong klâ krê thế kâi tơkâ luâ tơdroăng hơkăng xua pơ’lêh tơdroăng rêh ối rêm hâi, pro ôh tá tơniăn mâu ăm mâu ngế tung rơpŏng hngêi ah mâu ki mê chiâng ai F0 ‘na hía hlối hlâ, tơdroăng ki pro ó ‘na tô tuăn, vâ mơhno ăm ‘nâi tơdjâk troh pơreăng. Xua mê, mâu vâi o kal thế châ rak ngăn teăm tơdrêng xua ai mâu ngế ki rơkê tung drêng ai tơdroăng kal, tung tơdroăng rak tơniăn. Tơdroăng kơ-êng lơ pơlât ‘na tuăn ngôa kô châ pơlât tơdrêng, drêng vâi o tung kơpong klâ krê. Ngế ki rơkê ‘na tuăn ngôa Nguyễn Thị Thu Hiền tối ăm ‘nâi tơ’nôm:

“Tơdroăng vâ ‘nâi cho kal khât ‘nâng. Pin hlo ki rế tâk mâu tơdroăng ki ôh tá tơtro môi tiah ‘nâ hía ôh tá vâ kâ, ôh tá vâ hum, ‘nâ hía ôh tá vâ tơpui ƀă mơngế ki ê, lơ ó tâ mê nếo, mâu vâi o kô ai mâu tơdroăng rơhêng lo pá gong, môi tiah vâ ‘nhiê luât pơkâ pro chiâng ai tơdroăng hêng tơxiăn tơpâm  hên tâ. Ngăn môi tiah tơngăm hôu, rĕng hôu, krâ ‘mêi ƀă hlối rĕng khíu.

Ki ăm hlo mê dêi vâi o môi tiah kế ki vâi kơtúa tơnoâng hmôu pơ tơdro ning noâng klêng tê, klêng hía tiô kơ tơdroăng gá rĕng lơ hrá, rế ton rế hên, ngin chiâng  vâ ngăn ƀă vâi o thế châ rak ngăn teăm tơdrêng xua ing mâu ngế rơkê hnê’’.

Troh nôkố, Khu xiâm ngăn cheăng pêi - mô đô̆i rong ƀă pơlê pơla xuân hiăng pơkâ hên hlá mơ-éa mơdêk hnoăng cheăng rak tơniăn ăm vâi hdrêng tung kơpong klâ krê xuân môi tiah tung pơla klâ kơtăn pơlê pơla… Ƀă mâu vâi hdrêng ki tro pro pơlăm pơlối, tro vâi hôu, vâi ‘nêk, lơ tro ôh tá tơniăn tuăn ngôa xuân hiăng ai hlo nhên ‘na mâu ngế kal thế châ tơmâng; pơkâ hnoăng cheăng pêi dêi Tíu klâ tơkŭm pú hên.

Jâ Vũ Thị Kim Hoa, Ngế xiâm phŏ ngăn Khu ngăn vâi hdrêng (Tung Khu xiâm ngăn cheăng pêi – mô đô̆i rong ƀă pơlê pơla) tối tiah kô, kơpong klâ krê ki ai vâi hdrêng kal thế đi đo tơpui krếo Tổng đài tơnêi têa kring vế vâi hdrêng 111 vâ châ hnê tối, hnê ‘na tơdroăng: Rơniăn ăm vâi hdrêng, rak ngăn, rak tơniăn tuăn ngôa, hbrâ mơdât, vâ rĕng châ ‘nâi ƀă rĕng hơlêm tuăn ngôa dêi vâi hdrêng tung pơla dế klâ krê, ối kơtăn pơlê pơla; kum tơmâng ngăn vâ rĕng ‘nâi pêi pro tơdrêng ‘na kring vế, hbrâ mơdât ki lơ pro ‘mêi ăm vâi hdrêng.

Jâ Vũ Thị Kim Hoa pâ thế:

‘’Tíu ăm ối klâ krê tơchoâm kal thế tơrŭm ƀă kơ koan ki tơdjâk troh môi tiah Vi ƀan cheăm, kăn ƀô̆ kring vế vâi hdrêng, kơ koan kŏng an, kơ koan ngăn pơkeăng  châ veăng kum tơmâng ngăn ăm vâi hdrêng. Tung pơla kum ăm vâi hdrêng, mê pin thế tơtrŏng troh tơdroăng pro ti lâi vâ châ ‘nâi mâu tơdroăng ki kal vâ dêi vâi hdrêng vâ kum vâi. Pơtih tơdjâk troh tơdroăng veăng kum tơniăn ‘na tuăn ngôa ăm vâi hdrêng, tơdjâk troh mâu tơdroăng ki ôh tá tơniăn tuăn ngôa ƀă thế ai veăng tơmâng dêi kơ koan ngăn pơkeăng pơlât  khăm ngăn ivá pro tơniăn ăm vâi hdrêng. Ƀă mâu ngế, mâu tơdroăng tối tơbleăng ki tơdjâk troh tơdroăng xôi ‘na pro pơlăm pơlối, ‘nêk hôu, pâm vâi hdrêng mê kô châ pơxâu phak tro tiô luât hiăng pơkâ’’.

Vâ tơniăn kring vế vâi hdrêng tối tơchoâm ƀă vâi hdrêng a mâu kơpong klâ krê tơchoâm ôh tá ai nôu pâ nhŏng o prôk tiô, Khu xiâm ngăn vâi hdrêng xuân thế mâu kong pơlê đi đo tối mâu tơdroăng, tơbleăng tơdroăng ngế hdrêng ki rơdjâk pơreăng COVID-19 mê. Tâng ai tơdroăng kal ki tơdjâk troh vâi hdrêng thế tối tơdrêng hlối ăm rêm râ, kơ koan kơpêng a cheăm  pơlê, tơring kong pơlê ƀă Khu xiâm ngăn vâi hdrêng vâ ai troăng rơhlâ hnê pêi pro teăm tơdrêng.

VOV1

Gương tơplôu ƀă tơbleăng