VOV4.Sêdang - Krông Pač cho tơring ai hên kơxô̆ mơngế prếo vêh ing Pơlê kong kân Hồ Chí Minh ƀă mâu kong pơlê peăng Hdroh hên má môi dêi kong pơlê Dak Lak, ai 2.700 ngế. Vâ kuăn pơlê ki vêh ing kơpong ai pơreăng klâ ối kơtăn tơniăn, tro tiô tơdroăng pơkâ hbrâ mơdât pơreăng COVID-19, tơring Krông Pač hiăng ai hên túa pêi ki tro, ki ‘ló, ‘nâi hriăn plĕng kum kuăn pơlê ƀă mâu rơpŏng vâi hmiân tuăn tâ. Ƀă túa pêi pro mê tơtro ƀă mâu kơpong tung thôn, kô chiâng xúa a mâu kong pơlê ki ê a Tây Nguyên.

Xuân vêh sap ing kong pơlê Bình Dương, ngoh Đồng Thanh Hiếu ƀă môi ngế pú dế klâ ối krê tung hơpăm ki pro a tơdế kơpong deăng kơphế a thôn Cao Bằng, cheăm Ea Nuêč, tơring Krông Pač. Ngoh ăm ‘nâi, lối 3 khế ôh tá ai cheăng pêi a kơpong ki ai pơreăng, kơxô̆ liăn ki ‘măn kơdĭng hiăng hrê troh liăn má mơ’nui. Drêng Bình Dương pro pơhôi tơdroăng ki prôk lăm, ngoh hiăng kơto rơxế hon đa vêh dêi ngi pơlê. Xua rơpŏng ôh tá liăn vâ klâ ối krê ối tíu vâi pơkâ mê ngoh châ khu kăn pơkuâ cheăm xoăng ăm ối tơdjuôm ƀă môi ngế pú nếo ối tung hơpăm kơphế.

“Vêh troh a pơlê mê prế nôu pâ ƀă mâu nhŏng o xoăng thế ối ƀă tung rơpŏng hơpăm dêi ngế o rơtế vêh ƀă, mê má klâ ối krê akố. Rêm hâi mê nôu, pâ chiân ăm tơmeăm kâ, nôu, pâ ‘măn a gong, drêng lâi nôu prếo pâ á vêh, mê á lăm xo. Vêh á hiăng mơnhên klâ ối krê tiô túa ki kơtăng”.

Klâ krê tung hơpăm tơdế chiâk kơphế

Pôa Triệu Văn Đường, thôn Cao Bằng, cheăm Ea Knuêč ăm ‘nâi, tung mâu hâi hdrối nah, thôn hiăng tơdah hên ngế vêh sap ing mâu kong pơlê peăng hdroh.Vâ xing xoăng tíu ối tơtro, rak tơniăn hbrâ mơdât pơreăng tro tiô pơkâ, Khu rak ngăn thôn hiăng séa ngăn kơxô̆ rơpŏng ki ai hơpăm tung chiâk kphế, ai hngêi ki lôi tê kơtê, mê tơpui tơno môi tuăn ƀă mâu rơpŏng kuăn pơlê ăm mung mâu hngêi ki mê vâ pro tíu klâ ối krê. Hnoăng cheăng séa ngăn mâu ngế ki klâ ối krê châ Khu rak ngăn ƀă Tôh hbrâ mơdât pơreăng COVID-19 pơlê pơla dêi thôn pêi pro kơtăng:

“Drêng vêh pơlê klâ ối krê mê athế tối tơbleăng vâ vâi krâ nhŏng pêi pro tro 5K vâ rak vế tơniăn ăm vâi krâ nhŏng o xuân môi tiah mâu rơpŏng ki ối achê, vâi krâ nhŏng o dêi thôn tơná. Rêm hâi xuân lăm séa ngăn vâi hôm klâ ối krê há lơ ôh, xua hên ngế ki ôh tá hlê plĕng, tâng ai pin xuân athế hnê khĕn đi đo”.

Rơpŏng chiân kế kâ ăm ngế ki klâ ối krê

Ƀă a cheăm Ea Yiêng, cheăm kơpong hngế hngo dêi tơring Krông Pač, xua hơpăm hngêi tung chiâk kơphế iâ, khu kăn pơkuâ cheăm hiăng xúa mâu hngêi hôp tơdjuôm pơlê pơla dêi rêm thôn ƀă mâu hngêi ối tơdjuôm pro kơpong klâ ối krê ƀă khĕn kố cho mâu “toăng hngêi kuăn pơlê păn”. Tung mâu tíu châ pro mơgăn tât ƀă chhá ki lía tơ’mô ƀă kơxô̆ ngế klâ ối krê. Khu rak ngăn mâu thôn tơrŭm ƀă tôh hbrâ mơdât COVID pơlê pơla ƀă khu droh rơtăm lăm mơhnhôk kum kế kâ, xoăng ngế ki pế pơchên hmê kơchâi kâ, xoăng ăm mâu ngế tung “hngêi kuăn pơlê păn”.

Đoân droh rơtăm cheăm hiăng tơbleăng mâu tơdroăng tŏng kum kế kâ vâ rak tơniăn ăm kuăn pơlê hmiân tuăn klâ ối krê. Ngoh Trần Đức Hậu, kăn phŏ Hnê ngăn Khu droh rơtăm Việt Nam tơring Krông Pač tối ăm ‘nâi:

“Khu ngăn droh rơtăm Việt Nam tơring tơkŭm po rơtuh hnoăng hmê kâ veăng kum mâu rôh kâ hmê ăm Khu rak ngăn, rế tŏng kum hmê kâ a kơxê ngin xuân tŏng kum tơ’nôm mâu kế tơmeăm vâ Khu rak ngăn thôn, pơlê pế pơchên kum ăm khu ki klâ ối krê a cheăm”.

Mâu kế ki klâ, mơdât ƀă chhá ki liá tơ’mô ƀă kơxô̆ ngế klâ ối krê

A tơring tơring Krông Pač, kong pơlê Dak Lak, tung kơxô̆ lối 2.700 ngế kuăn pơlê vêh ing Pơlê kong kân Hồ Chí Minh ƀă mâu kong pơlê peăng hdroh mê ai 11 ngế dế klâ ối krê tơkŭm a tơring, 54 ngế klâ ối krê tơkŭm a mâu cheăm ƀă 2.670 ngế klâ ối krê a hngêi. Rak tơniăn tơdroăng klâ ối krê kơtăng vâ hbrâ mơdât pơreăng, Vi ƀan hnê ngăn tơring hiăng xing xoăng nhên hnoăng cheăng dêi rêm tíu pêi cheăng ki ai tơdjâk.

Tiah mê, kơvâ ngăn pơkeăng pơlât pêi pro test rĕng ăm kuăn pơlê 3 hâi môi hdroh, rêm hâi krếo phôn pơkâ thế kuăn pơlê séa ngăn ki tô achê, séa ngăn dêi ivá; Kơvâ kŏng an rak tơniăn gâk kring tơniăn a mâu tíu klâ ối krê; Mâu khu tơrŭm, khu pú hên mơhnhôk veăng tơlo liăn, kế tơmeăm tŏng kum ăm vâi krâ nhŏng o pa kĭng kơxô̆ liăn sap ing tơnêi têa. Jâ Nguyễn Thị Kim Oanh, kăn phŏ hnê ngăn Vi ƀan tơring Krông Pač tối:

“Tơring xuân hiăng pơkâ hên hlá mơ-éa vâ hnê mơhno pêi pro mơdêk rơdêi tơdroăng cheăng dêi tôh hbrâ mơdât COVID pơlê a mâu cheăm, pơlê kân séa ngăn mâu rơpŏng ki ai ngế klâ ối krê ƀă tối tơbleăng đi đo ăm Khu hnê mơhno cheăng hbrâ mơdât pơreăng môi hâi péa hdroh. Tơring xuân hiăng mơjiâng tôh tŏng kum pơlê pơla, tôh ki kố xuân rak tơniăn mâu ivá cheăng dêi tơring xuân môi tiah kế kâ mơhnhôk tơlo dêi mâu khu ki ai hiâm mơno tŏng kum vâ kum tơdrêng ăm mâu kuăn pơlê ki klâ ối krê trâm pá xua pơreăng kân COVID-19”.

Kơnôm ing túa pêi pro tro, hnoăng cheăng klâ ối krê ăm mâu kuăn pơlê ki vêh ing Pơlê kong kân Hồ Chí Minh mâu kong pơlê peăng Hdroh a tơring Krông Pač dế châ xo tơdroăng ki môi tuăn dêi kuăn pơlê. Maluâ ‘nâi ối hên tơdroăng xơpá ƀă rơ-iô, la ƀă tơdroăng ki hbrâ rơnáu krâu dêi rêm râ kơvâ cheăng ƀă tơdroăng ki tơdjuôm ivá dêi kuăn pơlê, loi tơngah Krông Pač kô kâi hbrâ mơdât tơƀrê hnoăng cheăng hbrâ mơdât pơreăng COVID a tơring.

VOV Tây Nguyên

Katarina Nga tơplôu ƀă tơbleăng