VOV4.Sêdang - To lâi khế hdrối mê hía nah, kuăn pơlê pêi chiâk deăng 2 pâ kĭng têa kroăng Dà Nhim, kơpong tơkâ hluâ cheăm Lạc Xuân, tơring Đơn Dương, kong pơlê Lâm Đồng pá puât xua têa tro ‘mêi. Hiăng ai hên kơdrum deăng kơchâi drêh tro răng hlâ xua tôh têa ‘mêi, têa mơ’nok xua tơdroăng vâi hrik prêi tơlân tung chiâk deăng.

Maluâ hiăng hbrâ rơnáu tŭm mâu tơmeăm khoăng vâ pêt kơchâi hơlât ki nếo, la lối 10 hâi hdrối kố nah, rơpŏng nâ Nguyễn Thị Lành, ối a thôn Diom B, cheăm Lạc Xuân, tơring Đơn Dương xuân tá hâi teăm vâ mơdâ pêt, xua xâu lơ tro răng hlâ. Ki xiâm ga, xua kơnhŏng têa dêi kroăng Dà Nhim hiăng mơ’nok, ai kơpong ‘nâ ngăn têa kroăng môi tiah trâp tơnêi, xua ai hên khu ki dế chiâ xo prêi tung dế têa kroăng.

Tiô nâ Lành tối, tơdroăng pêt mâu hdrê kơchâi, malối hơpê lŭm, hơlât, hơpê thảo ƀă hía hế kal athế ai têa krúa lĕm, tâng tôh têa mơ’nok, têa ‘mêi ƀă ai tơnêi trâp mê kơchâi kô ôh tá dâi, kô răng hlâ tâi tâng hlối.

“Á hbrâ vâ mơdâ pêt roh kố ai 1 ha 3 sao hơlât, la hlo têa mơ’nok ó tiah kố kơchâi kô răng hlâ. Pêt hơlât 2 troh 3 măng tĭng mê hơpê kô pơxiâm tơlŭm hlá, tâng tôh têa ki kố mê kơchâi kô prăng rơmon, ngin kô tro lŭp tâi”.

Kơpong chiâ xo prêi a kroăng Dà Nhim dêi Kŏng ti pêi cheăng tiô rơnó Lê Văn Oai Lâm Đồng

Tơdroăng ki chiâ hrik prêi pro kroăng Dà Nhim thăm rế mơ’nok, chiâng ‘mêi tơdjâk ó troh tơdroăng pêi cheăng kâ dêi kuăn pơlê. Tiô jâ Phan Thị Cấp, ối a thôn La (Bui-ê) Bouye A, cheăm Lạc Xuân tối, maluâ têa ôh tá tơniăn laga kuăn pơlê xuân athế tôh ăm loăng, xua ôh tá ai têa ing ê. Hiăng hên kơdrum deăng kơchâi tro răng hlâ, mâu hdrê loăng chiâng ôh tá dâi xua vâi tôh têa ki mơ’nok kố. Tâng tơdroăng kố pơtối ối ton tiah mê, ko pro kuăn pơlê thăm rế xahpá ó, tung mê ai tá rơpŏng jâ há.

“Pêt hơpê lŭm tâng tôh têa mơ’nok mê tung dế rơmôe hơpê kô prăng rơmon, chiâng pro pá ó ăm pin. Vâ tối tơdjuôm, rêh ối tâ tá kroăng Dà Nhim kố, ngin bu ‘nâi tơngah to ing têa kroăng kố tê. Rơnó mê hngê têa lân lu tâi tâng, rơnó tô kố tơkŭm mơdâ pêt kơchâi râ la ôh tá ai têa krúa vâ tôh”.

Kuăn pơlê hêng hôu xua têa tro mơ’nok, prăng ‘mêi, pro ‘mêi ăm tơdroăng pêi chiâk pêi deăng

Dà Nhim cho têa kroăng ki kân hiu tơkâ hên mâu cheăm, pơlê kân dêi tơring Đơn Dương, ƀă môi iâ dêi tơring Đức Trọng, cho tíu ki pơtroh têa hên vâ kum ăm tơdroăng pêi chiâk pêi deăng ăm kơpong ki pêt kơchâi dêi kong pơlê Lâm Đồng. Tơdroăng ki rơhêng vâ tối akố, pơla kố cho dế rơnó tô mơdrăng, têa a kroăng Dà Nhim hiăng xiâ, la ai Kŏng ti pêi cheăng tiô rơnó Lê Văn Oai Lâm Đồng, ai tíu cheăng a tơring Đơn Dương hiăng mơ’no 2 toăng plong ki kân vâ hrik xo prêi tung dế têa. Têa chiâng mơ’nok, chiâng trâp, thăm nếo, têa ‘mêi kô hiu troh peăng hdroh, pro pá xôp chiâng mơ’nok prăng rơmon, tơkâ kơƀêl.

Tiô tơdroăng ăm ‘nâi, Kŏng ti pêi cheăng tiô rơnó Lê Văn Oai Lâm Đồng châ kong pơlê Lâm Đồng ăm hlá mơ-eá phep chiâ hrik xo prêi a tíu kố lối 11ha, tơkéa vâ tối chiâ xo prêi drô thông Dà Nhim xŏn vâ chê 6 km. Pơxiâm chiâ ƀă hrik prêi akố sap ing lơ 30/11/2020 nah, hiăng ton bê troh 14 hơnăm 5 khế. Pôa Hoàng Công Hiếu, Kăn ƀơrô ngăn ‘na tơmeăm khoăng tung têa, tơnêi dêi tơring Đơn Dương tối, tơdroăng ki Kŏng ti kố chiâ hrik xo prêi hiăng pro mơ’nok ƀă pro têa ‘mêi, pro tơdjâk chiâng pá puât ăm kuăn pơlê pêi chiâk, tơdroăng kố cho ai khât. Tung la ngiâ, tâng khu mơdró kâ mê ôh tá ai troăng ki mơdât ki ‘mêi dêi têa mê kô athế pơtê tơdroăng hrik chiâ xo prêi.

“Tung pơla chiâ xo prêi athế rak tơniăn têa krúa, ăm kuăn pơlê châ pêi chiâk pêi deăng. Maluâ ti mê, troh a chôu phut kố, tiô kơ tơdroăng tối dêi kuăn pơlê, têa xuân ối mơ’nok, ối ‘mêi tiah mê. Xua mê, to lâi hâi la ngiâ kố ah, tơring rơtế ƀă Ƀơrô ngăn ‘na tơmeăm khoăng tung kong, têa, tơnêi athế pêi pro ti lâi vâ pôi tá ăm têa mơ’nok xếo, tâng ôh, athế pôa Lê Văn Oai pơtê chiâ hrik xo prêi”.

Ti xê to pro ‘mêi ăm thông têa, mê mâu rơhê, kĭng thông têa kô tơ’lêi tơ’noh, tơhnâp

Ti xê to kơnhŏng têa tro ‘mêi, tro mơ’nok ó tiah mê, tơdroăng chiâ hrik xo prêi dêi Kŏng ti pêi cheăng tiô rơnó dêi Lê Văn Oai Lâm Đồng kô thăm pro hên rơhê, kĭng thông têa Dà Nhim kô tro tơ’noh, tơhnâp tung rơnó mê hngê a la ngiâ kố ah. Pakĭng mê, tung pơla chiâ hrik xo prêi, Kŏng ti ki kố xuân ối hmôu pơ kâng kơdât thông têa, hno têa hmâng to lo vâ, thăm nếo, ôh tá chiu pêi pro tiô tơdroăng ki hiăng tơhrâ pêi pro tiô luât, tung mê, ai tá tơdroăng ki pơkrâ ‘măn kơmăi kâng ki hiâ, ki hơngăm mâu tơmeăm hơngế ó ing kơpong, ôh tá pơkrâ Camera a kơpong ki vâ mơhno tơbleăng tơmeăm khoăng.

Quang Sáng chêh

Nhat Lisa tơplôu ƀă tơbleăng