VOV4.Sêdang - Pêi pro hnoăng mơhnhôk tâ phĭu dêi tơná, 10 ngế lo tơbriât to pro kăn teăng mâ Kuô̆k hô̆i hneăng má XV ƀă 85 ngế tơbriât to pro kăn teăng mâ Hô̆i đong kuăn pơlê kong pơlê Kon Tum dế pêi pro tơdroăng trâm mâ kuăn pơlê a mâu tơring tung kong pơlê. Tơdroăng tơkŭm po vâ 10 ngế tơbriât to pro kăn teăng mâ Kuô̆k hô̆i hneăng má XV ƀă 85 ngế tơbriât to pro kăn teăng mâ Hô̆i đong kong pơlê, hneăng hơnăm 2021 – 2026 pêi pro hnoăng mơhnhôk tâ phĭu dêi tơná châ Vi ƀan Măt trâ̆n tơnêi têa Việt Nam kong pơlê Kon Tum pêi pro nhên, tro tiô pơkâ. 

Ngế tơbriât to pro kăn teăng mâ Kuô̆k hô̆i hneăng má XV mơhnhôk tâ phĭu a tơring Kon Rẫy, kong pơlê Kon Tum

Tơdroăng hbrâ mơdât COVID 19 a mâu tíu trâm mâ kuăn pơlê châ kơvâ khăm pơlât kong pơlê pêi pro kơtăng khât. Tâi tâng kuăn pơlê drêng châ kơ-êng pơrá tối, mâu ngế lo tơbriât to pro kăn teăng mâ Kuô̆k hô̆i ƀă ngế tơbriât to pro kăn teăng mâ Hô̆i đong kong pơlê pơrá ai hiâm mơno tơ’lêi achê, hiâm mơno lĕm; Tơdroăng pêi pro ‘nâng ‘nâi, mơhno hnoăng cheăng dêi tơná drêng châ kuăn pơlê loi tơngah rah xo to pro kăn teăng mâ Kuô̆k hô̆i ƀă kăn teăng mâ Hô̆i đong kong pơlê.

A Sa Ly tơplôu ƀă tơbleăng