VOV4.Xơ Đăng - Pêi pro tiô tơdroăng ki trâm kuăn pơlê klêi kơ’nâi hneăng hôp má 2, Kuô̆k hô̆i hneăng má 15, pơla hdrối kố nah, pôa Phan Đình Trạc, kăn xiâm tí tăng ‘nâi plĕng tơnêi têa rơtế ƀă Khu kăn Kuô̆k hô̆i kong pơlê Lâm Đồng hiăng tơkŭm trâm kuăn pơlê a hên tơring. Ing mê, kuăn pơlê pơrá tối phiu ro ‘na tơdroăng ki ƀlêi chiâng dêi hneăng hôp Kuô̆k hô̆i pơla hdrối kố nah ƀă tơdroăng ki hơ’lêh nếo, rơkê plĕng, tơdrêng amê hlối pâ thế hên tơdroăng a kong pơlê.

Klêi mơgêi rôh hôp má 2 Kuô̆k hô̆i hneăng 15, pôa Phan Đình Trạc, Ngế xiâm tí tăng ‘nâi plĕng mâu tơdroăng ăm Tíu xiâm rơtế ƀă mâu kăn Kuô̆k hô̆i  kong pơlê Lâm Đồng hiăng trâm mâ kuăn pơlê a mâu bêng, cheăm dêi mâu tơring Đức Trọng, Lạc Dương ƀă pơlê kong kơdrâm Đà Lạt, kong pơlê Lâm Đồng.

A rôh trâm mâ, kuăn pơlê  kong pơlê Lâm Đồng xuân tối loi khât  ƀă tơngah a mâu tơdroăng pơkâ tung mơnhông cheăng kâ - rêh ối, troăng rơhlâ pêi pro tơkâ luâ xơpá xua pơreăng kân COVID-19 dêi Chin phuh, dêi Kuô̆k hô̆i ing rôh hôp má 2 Kuô̆k hô̆i hneăng 15. Pakĭng mê, pơtối pâ thế hên tơdroăng ki tơdjâk troh tơdroăng rak ngăn tơnêi têa tung mâu kơvâ cheăng, mâu luât pơkâ tơniăn rêh ối pơlê pơla ƀă pơkâ mơdêk pêi pro tê mơdró tung pơla tiah hmâ nếo.

A cheăm Hiệp An, tơring Đức Trọng, ki hên kuăn pơlê tối troh ‘na tơnêi, malối tơdroăng ki hrá pro ăm hlá mơ-xúa tơnêi, hdró tíu tơkăng kong pơla tơnêi pêi chiâk deăng tơnêi kong hâi tơdah, hâi teăm nhên, tơdroăng klâ ing hlá mơ-éa rơpŏng hngêi krê, pro troăng tung thôn pơlê, chêl  boăng liăn gu xĕn tơnêi hngêi trăng  pro long têa Ta Hoét ối trâm hên xơpá tơvâ tơvân...

Tiô pôa mai Khả Cử, ối a thôn Tân An, cheăm Hiệp An, pakĭng mâu tơdroăng ki kal mê, tơdroăng rak ngăn pro tơniăn mơjiâng xuân dế cho tơdroăng ki kal châ Kuô̆k hô̆i, mâu kăn rêm râ tơmâng, ‘mâi  rơnêu: 

"Cheăm Hiệp An cho tung tơring ki pơkâ pro kơphô̆  la tơdroăng mơjiâng tơvâ tơvân. Mơgrúa pro ngâ troăng kân 20 mơjiâng túa ki ôh tá xê ngăn hngêi trăng, kuăn mơdró ki ‘nâ lo pa ngiâ ki ‘nâ trâu tung tá. Vâ tối ki pro hdrối ôh tá vâ pro hlá mơ-éa chêh, ki pro kơ’nâi mê ai chêh pro hlá mơ-éa  pâ thế hlối vâ pơxâu... Pâ thế khu râ kơpêng thế séa ngăn, tí tăng ngăn nếo tơdroăng ki pro tơniăn ‘na mơjiâng mê’’.

Rôh trâm mâ kuăn pơlê cheăm Lat, tơring Lạc Dương, kong pơlê Lâm Đồng

Môi tiah mê, kuăn pơlê cheăm lát, tơring Lạc Dương pâ thế mâu tơdroăng ki tơdjâk troh ‘na hơ’lêh tơnêi pêi chiâk, tơnêi kong chiâng tơnêi pro hngêi ối; a tơdroăng ăm hlá mơ-éa xúa tơnêi, tơdroăng pro pơlê tơdjâk troh hngêi kơmăi on tơhrik Dà Dâng – Dà Chomo; kum ăm mung liăn vâ pêi cheăng kâ,  mơ-eăm xông vâ hluăn ing kơtiê; ‘na tơdroăng kum ƀă mâu kăn cheăm.

Kuăn pơlê xuân pâ thế mơdêk rĕng pro troăng kân ĐT 726 vâ prôk lăm, rơxế kơtâu tơ’lêi hlâu, mơnhông cheăng kâ;  kơdroh ki hâ ho tơdroăng rơxế kân chơ lối hngăm, mơdêk kơxô̆ rơpŏng kuăn pơlê châ xúa têa krúa.

Tung pơla mê, kuăn pơlê pơlê kong kơdrâm Đà Lạt  malối tơmâng troh tơdroăng hbrâ mơdât COVID-19 ƀă mâu troăng rơhlâ ‘mâi mơnhông pêi chiâk, tê mơdró ôm hyô, mơnhông cheăng kâ - rêh ối. Kuăn pơlê Nguyễn Thị Hiếu Hòa, Ngế pơkuâ Tíu xiâm ngăn pơkeăng pơlât Đà Lạt tối tiah kố, ƀă tơdroăng tơmeăm khoăng ƀă mơngế pêi cheăng hlối oh tá ai hên, hmâ trâm tơdroăng pá ki hâ ho môi tiah nôkố, tâng ôh tá tăng troăng kơdroh xơpá teăm tơdrêng mê Đà Lạt kô pá vâ châ pêi tơ-brê tơdroăng pơkâ ki pơtối tung tơdroăng tiah hmâ ki nếo.

‘’Tíu pêi cheăng pêi mâu tơdroăng cheăng hmâ pêi rêm hâi môi tiah khăm pơlât, hbrâ rơnáu, tơdroăng ‘na pơ’leăng mâ mơngế, rơtế ƀă tơdroăng khăm pơlât mơdât pơreăng. Mơngế ki pêi cheăng ai tiô púi vâ, tung pơla mê xuân dế pêi pro tiô pơkâ kơdroh kơxô̆ mơngế pêi cheăng. Tung la ngiâ, drêng tơbleăng pêi tơdroăng pơkâ tơ’nôm mâu tơdroăng cheăng ‘na kơpong pơlât xuân môi tiah tơdroăng hbrâ mơdât pơreăng, mâu tơdroănng dêi hngêi pơkeăng ki lăm pơlât ukố umê  bbă mâu tôh cheăng khăm pơlât… mơni kô tâk ki pá ƀă ki hên tơdroăng cheăng ƀă hngêi pơkeăng cheăm bêng”.

Pôa Phan Đình Trạc veăng kơ-êng tối pâ thế a rôh trâm mâ

Teăng mâ Khu kăn Kuô̆k hô̆i kong pơlê Lâm Đồng, pôa Phan Đình Trạc, Ngế xiâm tí tăng ‘nâi plĕng mâu tơdroăng ăm Tíu  xiâm  khĕn kơdeăn  khât mâu tơdroăng tí tăng ngăn vâ ‘nâi nhên ƀă tơdroăng ki hlo ai khât dêi kuăn pơlê. Pakĭng mê, tối nhên, mơnhên tơ’nôm mâu tơdroăng ki tơdjâk troh luât pơkâ tŏng kum klêi hluăn ing kơtiê, vâ tơniăn ‘na tơdroăng hluăn ing kơtiê krá tơniăn ton; luât pơkâ tŏng kum ƀă kăn ƀô̆ râ cheăm, malối cho kăn ƀô̆ pơkuâ cheăng, thôn pơlê.

Malối tơmâng tơdroăng veăng hnê tối pâ thế dêi kuăn pơlê cheăm Lát, tơring Lạc Dương ‘na tơdroăng tơnêi tơníu, pôa Phan Đình Trạc pâ thế mâu kăn ƀă kơvâ cheăng cheăng tơring thế tơmâng, tơleăng mơnhên teăm tơdrêng:

‘’Kố cho môi to cheăm kong ngo ki hiăng hluăn ing kơtiê xơpá ƀă châ mơnhên tối cheăng mơjiâng thôn pơlê nếo. Púi vâ kuăn pơlê akố pơtối mơ-eăm, tơrŭm môi tuăn dêi rơpó tơkâ luâ xơpá, mơ-eăm mơnhông tâ nếo, hên tâ nếo vâ pin ôh tá la lâi xuân kâi rak dêi cheăm thôn pơlê nếo, mê ối xơpá drêng cheăm mơjiâng thôn pơlê tiô túa  lĕm tro. Rơtâ tá tơdroăng tơnêi pro hngêi ối, tơnêi pêi kâ, ăm phĭu rak xúa tơnêi, chêl thiăn, pơtối pro pơlê nếo… mê pâ thế tơring, cheăm, kong pơlê thâ kum ăm kuăn pơlê. Xua kố cho tơdroăng ki kal dêi tơdroăng pêi chiâk, tơniăn tơdroăng rêh ối’’.

Drêng trâm mâ kuăn pơlê klêi rôh hôp má 2, Kuô̆k hô̆i hneăng 15, pôa Phan Đình Trạc Ngế xiâm tí tăng ‘nâi plĕng mâu tơdroăng ăm Tíu xiâm hiăng diâp ăm kong pơlê Lâm Đồng mâu tơmeăm xúa tung khăm pơlât tơdroăng hbrâ mơdât pơreăng  COVID-19, mê cho: 10 toăng kơmăi hiâm, 200 rơpâu plâ  kên pâng môh ƀă 200 rơpâu bộ test rĕng COVID-19 ing xiâm ăm dêi khu xiâm  ngăn pơkeăng pơlât.

Pakĭng mê, kum 600 kơxu tơmeăm ăm mâu kŏng nhân ƀă mơngế pêi cheăng ki kơtiê xơpá a kong pơlê Lâm Đồng ing kơxô̆ liăn dêi khu xiâm ngăn mơngế pêi cheăng Việt Nam.

VOV Tây Nguyên

Gương tơplôu ƀă tơbleăng