VOV4.Sêdang - Rak vế krá tơniăn kơpong tíu tơkăng kong ti xê to cho hnoăng cheăng dêi khu lêng mố đô̆i gak tơkăng kong mê ối cho hnoăng cheăng dêi tâi tâng kuăn pơlê. Ki hlê plĕng mê hiăng châ Đông mố đô̆i gâk tíu tơkăng kong Dak Tiên, khu kăn pơkuâ, kuăn pơlê a cheăm Thuận Hà, tơring Dak Song, kong pơlê Dak Nông pêi pro kơhnâ, tơdjuôm ivá rak vế tíu tơkăng kong dêi Tơnêi têa.

Tiah hmâ rêm khế môi xôh, pôa Trần Bá Tuyết rơtế mâu khu râ kăn Tôh pơkuâ troăng tíu tơkăng kong a tơneăn thôn 8, cheăm Thuận Hà pơtối rơtế ƀă kăn ƀô̆, mâu mô đô̆i gâk kring tíu tơkăng kong Dak Tiên po văng, mơgrúa, séa ngăn gâk kring troăng tíu tơkăng kong tung cheăm. Pôa Trần Bá Tuyết plĕng nhên:

“Tơdroăng tơdjuôm ivá gâk kring tơniăn tíu tơkăng kong cho veăng kum gâk kring hnoăng pơkuâ dêi Tơnêi têa,  tơdroăng châ tơƀrê pêi kâ dêi tơná. Xua mê, vâi krâ đi đo hbrâ veăng rơtế ƀă khu mô đô̆i gâk kring tíu tơkăng kong lăm séa ngăn, po văng nhâ, mơgrúa troăng tíu tơkăng kong. Ƀă pôa xuân đi đo lăm mơhnhôk, pơtâng tối vâi krâ hlê plĕng nhên hnoăng, ki kal ƀă pôu râng hnoăng cheăng dêi tơdroăng gâk kring hnoăng pơkuâ tíu tơkăng kong ƀă hbrâ mơdât mâu ngế xôi’’.

Kuăn pơlê rơtế ƀă mô đô̆i séa ngăn tíu tơkăng kong

Tiô Đăi ŭi Lương Văn Phú, Cheăng kal kí phŏ pơkuâ Đông mô đô̆i gâk kring tíu tơkăng kong Dak Tiên, pêi cheăng tơrŭm séa ngăn, mơdât tơdroăng ki ‘mêi, po văng nhâ, mơgrúa troăng tíu tơkăng kong châ đông lêng ƀă mâu tôh ki pơkuâ xêh pêi tơtro, châ tơƀrê. Mâu mô đô̆i veăng kơhnâ khât, tá hiâm mơno, ngăn kố cho hnoăng cheăng dêi tơná.

Ôh tá xê to tiah mê, rêm roh lo lăm pêi chiâk deăng, tâng châ hlo mâu ngế tơmối, vâi krâ rĕng tơbleăng ăm khu râ kăn pơkuâ, mô đô̆i gâk kring tíu tơkăng kong tối ăm ‘nâi.

Kơpong tíu tơkăng kong Việt Nam – Kul xua Đông mô đô̆i gâk kring tíu tơkăng kong Dak Tiên pơkuâ xŏn dâng 10 km. Mơnhên gâk kring krá tơniăn kơpong tíu tơkăng kong ôh tá xê cho hnoăng cheăng dêi khu mô đô̆i gâk kring tíu tơkăng kong mê ối cho hnoăng cheăng dêi tâi tâng kuăn pơlê, đông lêng hiăng tơmâng tŏng kum hên, tơtrŏng pêi tơtro tơdroăng tơbleăng cheăng lêng, rơtế ƀă khu râ kăn pơkuâ Đảng, khu râ kăn pơkuâ thăm pêi pro tơdroăng kuăn pơlê veăng gâk kring troăng tíu tơkăng kong, tơneăn, gâk kring tơniăn tung thôn, pơlê.

Tiô Trung tă Nguyễn Huy Hiếu, Kăn pơkuâ Đông mô đô̆i gâk kring tíu tơkăng kong Dak Tiên, ƀă troăng pêi achê, hlê plĕng khôi túa, tơdroăng rêh ối dêi vâi krâ, ing râ kăn pơkuâ Đảng, kăn pơkuâ troh rêm kăn ƀô̆, mâu mô đô̆i, ki má lối cho Khu kuăn pơlê, tung tơdroăng pêi pro hnoăng cheăng đi đo tơrŭm ƀă khu râ kăn Đảng, khu râ kăn pơkuâ, mâu khu râ pơlê cheăm thăm pơtâng tối ăm kuăn pơlê ‘na mâu pơkâ ki tơdjâk troh tíu tơkăng kong tơnêi têa.

Tung mâu hơnăm achê kố, pêi pro Pơkâ kơxô̆ 01 dêi Ngế pro xiâm hnê ngăn Chin phuh ‘na  tơdroăng tơkŭm po  tơdroăng ‘’Tâi tâng kuăn pơlê veăng gâk kring hnoăng pơkuâ tơnêi tíu, gâk kring tíu tơkăng kong tơnêi têa tung rơxông nếo’’ ƀă Pơkâ 33 dêi Khu xiâm kal kí ‘na ‘’Troăng pêi ton xŏn gâk kring tơnêi tê atung rơxông nếo’’, đông lêng hiăng pêi tơtro tơdroăng pơtâng tối, mơhnhôk kuăn pơlê pêi pro troăng hơlâ, troăng pơkâ pêi, troăng hơlâ dêi Đảng, luât dêi Tơnêi têa.

Kuăn pơlê veăng gâk kring tơniăn

Tơdrêng amê, mâu tôh ki pơkuâ xêh troăng tíu tơkăng kong châ mơjiâng, mê khu tơrŭm cheăng cho kuăn pơlê, ai hnoăng ƀă khu mô đô̆i gâk kring tíu tơkăng kong gâk kring Tơnêi têa.

Đông xuân thăm pơtroh tơ’nôm 1 ngế kăn ƀô̆ veăng tung Đảng uỷ cheăm ƀă pơtroh mâu đảng viên vêh pêi cheăng ƀă mâu thôn, pơlê, pơkuâ rơpŏng. Mâu tôh, khu pêi cheăng tung pơlê tơpui tơno rah xo mơngế ki kuăn pơlê loi tơngah môi tiah krâ pơlê, kăn pơkuâ thôn, pơlê vâ pơtâng tối, mơhnhôk, kum kuăn pơlê hlê plĕng rêm troăng tíu tơkăng kong, tơneăn vâ ‘nâi mâu tơdroăng pro xôi, tơbleăng teăm tơdrêng mâu tơdroăng pêi pro xôi hnoăng pơkuâ tơnêi tíu ƀă hía hé.

Hơnăm 2020, pêi pro hnoăng cheăng péa xôh, rế mơdât, gâk kring tíu tơkăng kong rế hbrâ mơdât pơreăng COVID 19, Đông mô đô̆i gâk kring tíu tơkăng kong Dak Tiên mơjiâng 3 tíu gâk tơniăn ƀă đi đo tơrŭm ƀă mâu khu cheăng, tôh pơkuâ séa ngăn, mơdât mâu ngế ‘mêi, tât a mâu troăng kŭn, gâk kring kơtăng, ôh tá ăm ai tơdroăng mơngế mot lo a tíu tơkăng kong ôh tá tro luât.

Đông mô đô̆i gâk kring tíu tơkăng kong Dak Tiên ối kum kuăn pơlê pêi kâ, pôe xo tơmeăm khoăng, lăm kơ-êng, diâp kơxuô tơmeăm khoăng, khăm pơlât, veăng tơlo liăn a pơlê. Đông lêng hiăng diâp ăm ro hdrê ăm mơngế kơtiê a cheăm Thuận Hà ƀă tơdah păn 1 ngế o hok tro ai  tơdroăng rêh ối pá puât, tŏng kum 2 ngế o hok tro kơtiê hriâm rơkê…

Mâu tơdroăng pêi ki pơxúa rêm hâi dêi kăn ƀô̆, mâu mô đô̆i a Đông lêng gâk kring tíu tơkăng kong Dak Tiên hiăng thăm pro tơdroăng loi tơngah dêi kuăn pơlê a Đảng, Tơnêi têa, khu lêng, kum mơjiâng hiâm mơno krá kâk, gâk kring hnoăng pơkuâ tíu tơkăng kong tơnêi têa.

Pôa Trần Lê Cường, Kăn pơkuâ hnê ngăn cheăng Đảng cheăm Thuận Hà, tơring Dak Song, kong pơlê Dak Nông mơnhên:

“Rơtế ƀă vâi krâ mơjiâng thôn pơlê nếo, kăn ƀô̆, mô đô̆i gâk kring tíu tơkăng kong Dak Tiên hiăng tŏng kum pơlê hên tơdroăng cheăng ki pơxúa. Tung mê, kô chiâng tối troh tơdroăng mơjiâng cheăng kal kí, mơjiâng mơngế mot tung Đảng, tŏng kum hnoăng pêi cheăng, pro troăng klông, rơchôa hno têa, pêi pro mâu troăng kum kuăn pơlê mơnhông cheăng kâ. Ing mê, rêm ngế kuăn pơlê ai hnoăng tâ tung veăng gâk kring hnoăng pơkuâ tơnêi tíu, gâk kring tơniăn tíu tơkăng kong, cho mơjiâng hiêm mơno krá kâk, veăng gâk kring tơnêi têa’’.

Hlá tơbeăng Dak Nông

A Sa Ly tơplôu ƀă tơbleăng