VOV4.Sêdang - Măng tĭng hdrối, khu kăn Kuô̆k hô̆i mâu kong pơlê a kơpong Tây Nguyên hiăng trâm mâ kuăn pơlê hdrối vâ po hneăng hôp má 2, Kuô̆k hô̆i hneăng má 15. A mâu tíu trâm kuăn pơlê, kuăn pơlê tối phiu ro hlo mâu tơdroăng ki pêi pro klêi a Hneăng hôp má môi Kuô̆k hô̆i hneăng má 15, môi tuăn ƀă tơdroăng ki po hôp, tơdroăng pêi cheăng dêi Hneăng hôp má 2, ƀă pơkâ mơ’no hên rơkong tơpui tối, pâ thế hên tơdroăng ki kal a kong pơlê. Ki nhên môi tiah rĕng hbru tŭm vaccine hbrâ mơdât COVID-19 ăm kuăn pơlê, ai troăng hơlâ tŏng kum kuăn pơlê ‘mâi mơnhông cheăng kâ klêi kơ’nâi ai pơreăng kân, tơmâng ngăn ‘no liăn pêi chiâk deăng ki ai ivá rơdêi a Tây Nguyên.

A mâu roh trâm mâ kuăn pơlê, khu kăn Kuô̆k hô̆i kong pơlê Dak Lak tơmâng xo hên tơdroăng hnê tối ki tơmâng khât ‘na mâu troăng rơhlâ vâ pêi pro tiô pơkâ “tơpéa tơdoăng” hlối mơnhông cheăng kâ - rêh ối pơlê pơla, hlối hbrâ mơdât pơreăng hiăng châ kuăn pơlê tối tơbleăng. Pakĭng mê, kuăn pơlê pâ thế Kuô̆k hô̆i,  Chin phuh, mâu khu xiâm, kơvâ cheăng xiâm ƀă kong pơlê pơtối hnê mơhno pêi kơtăng  tơdroăng hbrâ mơdât pơreăng COVID-19, pro xiâm vaccine pâk mơdât pơreăng ăm kuăn pơlê, mơdêk mơngế cheăng ‘na pơkeăng, tá mâu ngế, tơmeăm hbrâ, malối mâu kăn ƀô̆ cheăng khăm pơlât vâ rĕng kâi mơdât pơreăng, ăm dêi tơnêi têa rĕng vêh môi tiah hmâ nếo. Kuăn pơlê Lê Văn Thao ối a cheăm Ea Trang, tơring MDrak, tối: 

“Tung pơla hdrối kô nah, xiâm vaccine châ ăm, tơring hiăng tơbleăng pâk ăm mâu ngế tiô khu ki ăm pâk ahdrối tiô pơkâ, laga vâ tơ-brê tâ nếo pro xiâm ai kế mơdât pơreăng tung kuăn pơlê vâ châ tơ-ƀrê ton xuân pâ thế mâu khu râ tơmâng ăm xiâm vaccine vâ chôa pro rak tơniăn pro ti lâi ôh ti xê to pâk ăm mâu ngế veăng hbrâ mơdât pơreăng mê ối pâk ăm tâi tâng kuăn pơlê. Malối cho mâu ngế kuăn pơlê a kơpong hdroâng kuăn ngo, kơpong hngế hngo cho mâu tíu ki tơ’lêi tâ pơreăng hên ƀă mâu tơdroăng klâ krê, mâu tơdroăng hbrâ mơdât pơreăng ki xơpá má môi’’.

Khu kăn Kuô̆k hô̆i kong pơlê Dak Lak trâm mâ kuăn pơlê

Xuân tung măng tĭng hdrối, Khu kăn Kuô̆k hô̆i kong pơlê Gia Lai hiăng ai roh trâm mâ kuăn pơlê a 4 to cheăm kơpong hngế hngo mê cho: Ia Mơr, Ia Ga, Ia Piơr ƀă Ia Lâu, tơring Čư̆ Prông, tơdroăng ăm ‘nâi ‘na rôh hôp má 2, Kuô̆k hô̆i hneăng 15 ƀă tơmâng xo mâu tơdroăng veăng hnê khên dêi kuăn pơlê. A rôh trâm mâ, kuăn pơlê tối phiu ro hlo mâu tơdroăng ki châ tơ-ƀrê a rôh hôp má môi Kuô̆k hô̆i hneăng 15 hiăng rah xo mâu kăn xiâm dêi Kuô̆k hô̆i, Tơnêi têa, Chin phuh hneăng hơnăm 2021-2026 ƀă hên kơxô̆ phĭu vâ.

Pakĭng mê, pâ thế: kal ‘mâi hơ’lêh tơ’nôm mâu hlá mơ-éa chêh ‘na luât: môi tiah Luât tơnêi tơníu, Khu luât săm phoăng săm tơkêng hơnăm 2015, Luât lêng, Luât tơ’noăng khĕn kơdeăn... vâ rêm râ, mâu kơvâ cheăng tơ’lêi tơbleăng tơniăn hnê mâu tơdroăng pôi tá pro xôi luât ƀă tơtro ƀă tơdroăng rêh ối. Pơtối mê, pêi pro mâu troăng rơhlâ ‘mâi mơnhông mơdêk cheăng kâ-rêh ối.

Kuăn pơlê Kon Tum tối ăm mâu kăn Kuô̆k hô̆i

‘Na mâu tơdroăng ki nhên a kong pơlê, kuăn pơlê a kong pơlê Gia Lai tối: Kơpong tíu tơbâ Plei Me châ mơnhên tối cho kơpong tíu tơbâ râ Tơnêi têa la hâi châ ’no liăn tŏng kum mơjiâng tơxâng vâ tơ’mot mâu tơmối troh om hyô, tơmâng ‘no liăn mơjiâng tơmeăm khoăng troăng prôk a kong pơlê, tơdroăng tơleăng mơnhên xoăng ‘na tơnêi ối, tơnêi pê kâ ăm kuăn pơlê hdroâng kuăn ngo. Kuăn pơlê Gia Lai xuân pâ thế mâu kơ koan tơleăng mơnhên mâu tơdroăng tơdjâk troh mơnhông mơdêk ‘na krâ on tơhrik mâ hâi a kuâ hngêi, tơdroăng rak ngăn mâu tơdroăng tơkêa păn hên mơnăn a tung kong pơlê, mâu tơdroăng ki ôh tá tơniăn tung tơkŭm po hriâm tơdrêng...

Malối, hên kuăn pơlê tối tơdroăng ki “tô” ‘na mơdêk hbrâ mơdât pơreăng COVID-19, pro ti lâi vâ tơleăng mơnhên pro ăm mơngế ki pêi cheăng châ vêh ing kơpong tâ pơreăng. Kuăn pơlê Nguyễn Trường An, cheăm Ia Lâu, tơring Čư̆ Prông tối:

“Ki khât ga kuăn ‘nĕng akố vêh ing kơpong tâ pơreăng xuân xơpá, la nôkố xuân ôh tá châ pâ pêi cheăng a kong pơlê. Ki ê nếo, pơla kố rêm ngế pơtối lo ing kơpong tâ pơreăng tơdroăng kố xuân púi râm râ kăn tơmiât ngăn hdrối. Ki hdrối, tơdroăng rêh ối dêi kuăn pơlê kơpong tơkăng kong xơpá, púi vâ tơnêi têa ai mâu pơkâ luât ki tŏng kum, pro tơ’lêi hlâu ăm rêm ngế châ mơnhông mơdêk, hnê kuăn pơlê mơjiâng mơnhông mơdêk túa pêt loăng plâi, păn mơnăn mơnhông cheăng kâ”.

Trâm mâ kuăn pơlê a Gia Lai hdrối po roh hôp má 2 Kuô̆k hô̆i hneăng 15

A kong pơlê Kon Tum, khu kăn Kuô̆k hô̆i hiăng trâm mâ kuăn pơlê a tơring Sa Thầy, Kon Plông ƀă Kon Rẫy. Kuăn pơlê tối môi tuăn ƀă tơdroăng, pêi cheăng dêi Rôh hôp má 2, Kuô̆k hô̆i hneăng 15, môi tuăn troăng rơhlâ xuân môi tiah hnê mơhno dêi Chin phuh tung tơdroăng hbrâ mơdât pơreăng COVID-19 ƀă phiu ro drêng hlo kuăn pơlê, malối cho mâu ngế ki pá puât kal châ tơmâng, tŏng kum tơdrêng.

Mâu tơdroăng a kong pơlê, kuăn pơlê Kon Tum púi vâ ngế xiâm pơkuâ ‘no liăn cheăng rĕng pro tơdroăng tơkêa ‘mâi mơnhông pro mâu tíu ki hiăng tơ’nhiê a troăng kân 24 ing pơlê kân Mang Deang, tơring Kon Plông prôk ngi kong pơlê Quảng Ngãi. Pơtối ăm hok tro hdroâng kuăn ngo châ xúa tơdroăng tŏng kum kâ kế a kơhâi dế. Tơvêh mâu tơdroăng tơkêa bro ki hrá pêi, pêi ôh tá tơ-ƀrê mơ’nhiê tơnêi. Mơdêk tơdroăng cheăng rak ngăn tơmeăm khoăng tung tơnêi. Kơdroh tơdjâk ‘mêi troh hngêi kơmăi on tơhrrik krâ kơvâ ƀă kŭn ƀă tơdroăng rêh ối xuân môi tiah pêi cheăng dêi kuăn pơlê. Ƀă tơdroăng rak ngăn kong, kuăn pơlê Kon Tum pâ thế rêm râ rĕng séa ngăn, tí tăng ngăn tơnêi kong châ tiô pơkâ  178 dêi Chin phuh. Ai luât pơkâ tŏng kum, malối cho hdroâng kuăn ngo ‘na hdrê, liăn ngân, kih thuât vâ kuăn pơlê pêt nếo  kong a tơnêi ngo lĭng.

                                                                                                VOV Tây Nguyên

Gương tơplôu ƀă tơbleăng