VOV4.Xơ Đăng - Măng tĭng hdrối, Hneăng hôp má 2, Kuô̆k hô̆i hneăng má 15 pơtối tơkŭm po ƀă hên tơdroăng ki kal, tung mê, kuăn pơlê tung lâp tơnêi têa tơmâng ngăn khât rôh tiâ mơnhên ‘na tơdroăng ki hnê ƀă hriâm tung pơla ai pơreăng COVID-19 dế tâ tú rơ-iô. Hlo tơdjuôm dêi kuăn pơlê tung lâp tơnêi têa, rôh tiâ mơnhên dêi pôa Nguyễn Kim Sơn, ngế xiâm ngăn hnê hriâm ƀă hnê mơjiâng tuăn ngoâ rơkê ƀă tơdroăng kố cho nhên khât, tơdrăng hơpâ păng ‘nâng.

Malối tơmâng khât troh tơdroăng hnê hriâm tiô troăng hyôh internet dêi kơvâ ngăn hnê hriâm tung pơla dế ai pơreăng COVID-19 nôkố, pôa Lưu Văn Đức, ối a bêng Quyết Thắng, pơlê kong kơdrâm Kon Tum, kong pơlê Kon Tum ăm ‘nâi, tơdroăng pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngôa rơkê tiâ tơdroăng kơ-êng mê nhên khât ƀă hlối hleăng há. Ngế xiâm ngăn hnê hriâm hiăng tối tơdrăng drêng tối ‘na troăng rơhlâ ki pá tung hnê hriâm mê ƀă tối tơbleăng troăng rơhlâ tơkâ luâ xơpá.

Ing tơdroăng  ki ai khât tung cheăng kâ, rêh ối dêi kong pơlê Kon Tum ối hên xơpá, tơdroăng hriâm tiô troăng hyôh internet bú pơtối rak hnê a mâu kơpong ki tơ’lêi hlâu tê, pôa Lưu văn Đức tối:

“Tung pơla ai pơreăng COVID-19 kố, á hlo tơdroăng ‘na tơmâng xo mâu tơdroăng hnê khoa hok tiô troăng internet rế kơdroh, xua mê kô tơdjâk troh tơdroăng hnê mâu ngế ki vâ hriâm ‘na tơdroăng kố tung la ngiâ. Xua mê ƀă kong pơlê, Tíu xiâm tơnêi têa séa ngăn thế ‘no liăn mơjiâng hngêi trung hnê, tơmeăm khoăng ƀă mơjiâng kơpong klâ krê tơchoâm pú hên, vâ kơdroh ki xúa mâu hngêi trung pro tíu klâ ối krê ăm mâu ki tâ pơreăng ƀă pơlât COVID. Pôi tá xúa mâu hngêi trung xếo xua tơdjâk troh tơdroăng hriâm dêi mâu vâi o vâi muăn”.

Pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngôa rơkê tiâ tơdroăng kơ-êng

Tơmâng khât tơdroăng pơ’lêh nếo tơdroăng hnê hriâm, jâ Vũ Thị Quế ối a pơlê kong kơdrâm Lai Châu, kong pơlê Lai Châu tối tơdroăng xơpá, pơloăng mơnúa ki kơvâ ngăn hnê hriâm ƀă hnê mơjiâng tuăn ngôa rơkê tung pơla hdrối kô nah. Laga, tơdroăng ki pơ’lêh tâi tâng tơdroăng hnê hriâm ƀă hnê hriâm tiô hyôh internet  vâ hmâ ƀă tơdroăng dế ai pơreăng tâ tú mơni kô ối ton mê Khu xiâm ngăn hnê hriâm ƀă hnê tuăn ngôa rơkê xuân kal tơmiât troh tơdroăng tơrêm kơpong ƀă pro tơ’lêi hlâu ‘na tơdroăng hriâm dêi mâu hok tro kơpong kong ngo.

“Ƀă tơdroăng hriâm dêi mâu hok tro kơpong hngế hngo, kơpong hdroâng kuăn ngo ki xơpá, gá lot tâ kơpong tơbăng,  pơlê kong kân. Ƀă nôkố ai pơreăng tâ tú nếo hok tro thế hriâm online, ôh tá ai kơmăi vâ hriâm, ôh tá ai hyôh internet, hriâm ôh tá tơniăn. Púi vâ khu xiâm ngăn hnê hriâm ƀă hnê mơjiâng tuăn ngôa rơkê ai troăng rơhlâ pơ’lêh nếo ăm tơtro vâ tơniăn ki pơxúa dêi vâi o kuăn ngo kơpong kong ngo”.

Tiâ rơkong kơ-êng dêi mâu kăn ‘na hnê hriâm tiô troăng hyôh internet ôh tá tơbrê môi tiah hnê hriâm a hngêi trung, mê tơdroăng séa ngăn, tối ki ai khât nôkố lơ lối môi hơnăm, pôa  Nguyễn Kim Sơn Ngế xiâm ngăn hnê hriâm tối:

“Hnê hriâm tiô troăng internet hâi tro, ai mâu tơdroăng thế chôa pơ’lêh. Xua tơdroăng mê pin hâi châ séa ngăn, hâi châ vâ tối, lôi 1 hơnăm a tơmiât tiah kố ôh tá tro. Hriâm troh dâng lâi thế séa ngăn troh dâng mê ƀă thế tơmiât ngăn troh tơdroăng ki xơpá xúa pơreăng ƀă ngăn tiô pơkâ dêi tơdroăng hnê mê cho xiâm’’.

Tiô mâu kăn Kuô̆k hô̆i tối, pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngôa rơkê tối mơhé nếo xo pêi hnoăng cheăng tung pơla achê kố la hiăng ‘nâi tơdroăng dêi kơvâ hnê hriâm krá khât, hbrâ rơnáu nhên hdrối ƀă tiâ nhên hleăng ƀă mâu tơdroăng ki kal vâ ‘nâi plĕng. Pôa Y Khut Niê, Ngế xiâm phŏ khu kăn Kuô̆k hô̆i kong pơlê Dak Lak hneăng 14 tối: Mâu kăn hiăng kơ êng mâu tơdroăng ki nhên, achê ƀă tơdroăng nôkố drêng kơvâ ngăn hnê hriâm chiu tơdjâk kân ing ai pơreăng COVID-19

“Ing tơdroăng kơ-êng mâu kăn tối tiah kố, Ngế xiâm mơhé cho ngế ki xiâm nếo rah xo la hlê mâu tơdroăng kơ-êng mê, hlê nhên khât, ‘nâi mâu tơdroăng ƀă ‘nâi tơleăng mâu tơdroăng ki kal hdrối. Laga tung la ngiâ xuân ối ai mâu tơdroăng ki kân tâ ƀă hlối pá tâ ăm Ngế xiâm ngăn hnê hriâm cho kal thế tơkŭm, xing xoăng ăm hâi khế hriâm malối cho mâu vâi o vâi muăn râ má 1 kô cho môi tơdroăng ki kal khât thế tơmiât nhên ahdrối tâ”.

Mơgêi mâu tơdroăng tơdjâk troh ‘na hnê hriâm ƀă hnê mơjiâng tuăn ngôa rơkê, pôa Vương Đình Huệ, Kăn xiâm hnê ngăn Kuô̆k hô̆i tối, pơreăng COVID-19 ôh tá xê tơdjâk troh to tơdroăng hnê hriâm mê ối pro hrá tơdroăng ki pơ’lêh nếo tung tâi tâng tơdroăng hnê hriâm đăi hok. 28 ngế kăn Kuô̆k hô̆i kơ-êng, 10 tơdroăng tơpui tơno, 20 ngế kăn chêh inâi la hâi châ kơ-êng xuân hiăng mơhno ki tơmâng khât dêi mâu kăn Kuô̆k hô̆i, chât rơtuh ngế hok tro, nôu pâ hok tro tung lâp tơnêi têa.

Pôa Nguyễn Kim Sơn nếo xo hnoăng cheăng pro Ngế xiâm pơkuâ ngăn hnê hriâm ƀă hnê tuăn ngôa rơkê hâi teăm ton, la hiăng ‘nâi hlê nhên mâu tơdroăng dêi kơvâ ngăn hnê hriâm, kơvâ ki pơkuâ, hiăng tiâ nhên mâu tơdroăng ki mâu kăn Kuô̆k hô̆i kơ êng xuân môi tiah tơdroăng tơpui tơno. Pôa Vương Đình Huệ, Kăn xiâm hnê ngăn Kuô̆k hô̆i tối nhên:

“Pâ thế Khu xiâm ngăn hnê hriâm ƀă hnê mơjiâng tuăn ngôa rơkê tơrŭm krá ƀă Khu xiâm ngăn Pơkeăng khăm pơlât ƀă mâu kong pơlê vâ tí tăng ‘nâi plĕng ƀă rĕng tơbleăng tơdroăng  pâk vaccine ăm hok tro. Kố cho môi tung mâu tơdroăng pơkâ vâ pin rĕng ăm hok tro, sinh viên vêh hriâm a hngêi trung rĕng má môi. Ai pơkâ troăng rơhlâ ăm hok tro, sinh viên vêh hriâm a hngêi trung nếo, vâ hriâm tơchoâm. Rĕng kơdroh ki kơtăn hơngế ‘na tơdroăng hnê hriâm pơla kơpong kuăn ngo ƀă mâu kong ngo.

VOV Tây Nguyên chêh

Gương tơplôu ƀă tơbleăng