VOV4.Sêdang - Chin phuh nếo pơkâ ‘no tơ’nôm 5.100 rơtal ing kơxô̆ liăn ki ‘măn kơdĭng dêi tơnêi têa hơnăm 2021 ăm Khu xiâm ngăn ‘na pơkeăng ƀă khăm pơlât rôe kơmăi, pơkeăng, tơmeăm khăm pơlât, trếo pơkeăng ƀă hên tơmeăm ki ê vâ hbrâ, tơplâ, mơdât pơreăng COVID-19. Tung pơla ƀok thái pơkeăng, kế tơmeăm ôh tá ai tŭm, tơdroăng pơkâ kố vêh mơnhên tối mê cho ki kơjo má môi kal athế pêi pro tơdrêng dêi Đảng, Chin phuh cho rak vế mo lĕm ivá châ chăn, tơdroăng rêh ối dêi tâi tâng kuăn pơlê – cho ki xiâm dêi tơdroăng pêi lo kế tơmeăm liăn ngân ăm tơnêi têa. Kuăn pơlê – tơdroăng tâng tối ukố umê, mâu ngế ki hriăn plĕng tung hên kơvâ cheăng, mâu râ pơrá vâ môi tuăn tơdroăng pơkâ kố ƀă pói tơngah ivá cheăng ki nếo kô châ pêi pro tơ-ƀrê tung pêi pro păng ‘nâng – ai pơxúa ăm pơlê pơla. Chêh tối dêi ngế chêh hlá tơbeăng Thu Trang ai mơnhên tối ‘na tơdroăng mê:

Kơtăn nôkố tá hâi teăm ton, a roh Hôp tơrá khu kăn mơ’no tơdrêng tung um tiô troăng hyôh internet mơgêi tơdroăng liăn ngân dêi Hngêi rak liăn tơnêi têa 6 khế apoăng hơnăm 2021, pơkâ mơ’no hnoăng cheăng tung 6 khế mơ’nui hơnăm. Khu xiâm râng liăn tối pơtâng, 6 khế apoăng hơnăm, Kơxô̆ liăn dêi tơnêi têa hiăng ‘no 4.650 rơtal liăn ăm tơdroăng hbrâ, tơplâ, mơdât pơreăng. Riân tơdjoâm sap ing hơnăm 2020, kơxô̆ liăn ki kum kố hiăng troh 21.500 rơtal liăn, tung mê, 8.400 rơtal liăn xing xoăng ăm tơdroăng rôe pơkeăng, kơmăi kơmok vâ pêi pro mâu tơdroăng cheăng hbrâ, tơplâ, mơdât pơreăng. Tơkéa vâ tối, 5.100 rơtal liăn nếo châ Chin phuh mơ’no ƀă pơcháu ăm Khu xiâm ngăn ‘na pơkeăng ƀă khăm pơlât, Khu râng liăn ki xúa, ti xê to kơxô̆ liăn ki apoăng vâ thăm mơdêk ki tơ-ƀrê tung hbrâ, tơplâ, mơdât pơreăng, kring vế tơniăn ivá mo lĕm, tơdroăng rêh ối kuăn pơlê drêng ai tơdroăng ki xông tâ tú ó dêi pơreăng COVID-19. Pôa Nguyễn Minh Phong, Ngế hriăn plĕng ‘na pêi cheăng kâ, xuân cho tiê̆n sih, ai tối tiah kố:

‘’Tơdroăng kố ki păng ‘nâng ga ôh tá xê pro pin kơdrâ, ôh tá luâ kơ tơdroăng ki pin tơmiât, maluâ xuân ôh tá pá ƀă kuăn pơlê lơ mâu ngế ki hriăn plĕng ‘na tơdroăng rêh ối – pơtâng ngăn ki ai păng ‘nâng, xua pin dế trâm tro tơdroăng xông tâ tú pơreăng rôh má 4, hiăng lân troh hên kơng pơlê, pơlê kong kân xua mê tơdroăng ki mơ’no liăn ngân ăm tơdroăng tŏng kum, tơveăng, tơplâ mơdât pơreăng cho kal kân khât, kal athế ai kơxô̆ liăn ki hên. Á tơmiât tiah kố, mơ’no 5.000 rơtal liăn kố cho ăm tơ’nôm tá xê cho roh má mơ’nui. Kuăn pơlê kô tơniăn tâ tâng châ xing xoăng liăn tro tơdroăng, châ mơdât pơreăng, mê a mâu hnôu ki ‘măn pơkeăng ki vâ tơplâ mơdât pơreăng, hbrâ tât pơreăng, ki rơhêng vâ tối vâ khăm pơlât ăm mâu ngế ki tamo châi mê kô châ thăm mơdêk hên tâ. Mâu tơdroăng ki ôh tá bê ai tŭm pơkeăng, kơmăi kơmok pơlât vâ pơlât mơngế tamo ki tối F0 lơ ôh tá bê kơmăi hiâm oxy, ôh tá bê pơkeăng kô châ kơnôm hên ‘nâng ịng kơxô̆ liăn ki kum mơ’no rôe pơkeăng, kơmăi kơmok mê’’.

Tâng vâ riân ngăn tơchoâm tơdroăng, pôa Mạc Văn Tiến, Ngế ki hriăn plĕng ‘na tơdroăng kum ‘na rêh ối pơlê pơla ai tối tiah kố, mâu kong têa tung lâp plâi tơnêi hiăng ƀă dế athế ‘no hên tâ kơxô̆ liăn, ó rơdêi tâ ăm tơdroăng hbrâ, tơplâ mơdât pơreăng, tung mê, ai tá tơdroăng cheăng ‘na pơkeăng ƀă khăm pơlât ƀă tơdroăng kum pơlê pơla. Ƀai mơhriâm ing mâu kong têa, tung pơla pơreăng xông tâ tú ó a hơnăm 2020 hiăng ăm hlo, mâu kong têa kal athế ai kơxô̆ liăn ki hbrâ, kum tơ’nôm, vâ hbrâ rơnáu ăm mâu tơdroăng ki hơ’lêh phá tơ-ê dêi pơreăng COVID-19, ví kơ tơdroăng ki trâm lối xahpá, xâu xía ó môi tiah a mâu kong têa: Ấn Độ, Myanmar ƀă hên mâu kong têa ki ê. Việt Nam pin ối mơhúa ‘nôi, 3 roh ki pơreăng xông tâ tú mê bú iâ, tơdroăng cheăng hbrâ mơdât pơreăng chía krá tơniăn, mâu tơdroăng pơlê pơla pơrá châ môi tuăn – mơ’no kơxô̆ liăn dêi tơnêi têa pin xúa tá hâi teăm hên. Pôa Mạc Văn Tiến ai tối ‘na tơdroăng tơmiât tơná:

‘’Tơ’nôm 5.100 rơtal liăn athế mơnhên tối cho teăm tơdrêng, kal khât, ai xiâm ki vâ tŏng kum tơdroăng. La xuân athế kal vêh hlê plĕng nhên ‘na tơdroăng ki mơni nhôm hdrối, hbrâ hdrối, ‘na mâu tơdroăng ki chiâng phá hlêk tơ ê xua ga kô pro pá ăm tơdroăng cheăng kâ la ngiâ. Tá hâi tối, kố cho tơdroăng ki ai tơdrêng kal athế pêi pro teăm rĕng, ga xuân cho tơdroăng ki pin tá hâi teăm khên tối hdrối pơla tơdroăng ôh tá pro xôi luât ƀă tơdroăng ki tơkôm ai xâu xía mê vâ tí tăng kâ kơhveăm. Ói tơngah mâu ngế ki pêi hnoăng cheăng kố môi tuăn, môi mơno, rak vế tơniăn ing kơxô̆ liăn ki kố dêi Chin phuh vâ pơtroh ăm tíu ki kal khât, rĕng châ rôe mâu pơkeăng, kơmăi kơmok ki vâ khăm pơlât, hhbrâ, mơdât pơreăng. Kố xuân cho tơdroăng ki kuăn pơlê pói rơhêng vâ’’.

Môi tuăn ƀă tơdroăng tơmiât kố, jâ Phạm Nguyên Cường - Ngế hriăn plĕng krê xêh ‘na tơdroăng tŏng kum rêh ối pơlê pơla, tơdroăng pêi cheăng, cheăng pêi - môi tung mâu ngế ki veăng séa mơnhên, tơpui tối tơdrăng ‘na rak vế, pêi pro, xúa kơxô̆ liăn ki sap nah tá hâi chói ai kố, môi tiah kơxô̆ 62 rơpâu rơtal liăn mê, ki Chin phuh kum ăm khu mơdró kâ, khu kuăn pơlê tiah kố:

‘’Tung tơdroăng pơkâ, troăng mơ’no dêi Ngế pro xiâm hnê ngăn Chin phuh hiăng pơchân tối mâu kơ koan pơkuâ ngăn tơnêi têa ‘na pơkeăng ƀă khăm pơlât athế pêi pro tŭm têk tâi tâng mâu tơdroăng pơkâ Luât ki pơkâ ƀă khu ngế ki lăm tăng tíu tê vâ rôe pơkeăng, kơmăi kơmok, pro ti lâi athế châ kơdĭng, châ tơ-ƀrê má môi. Laga, kố cho kơxô̆ liăn ki athế tối tiah kố, xuân ai mâu tơdroăng mơni kô ôh tá teăm chôu phut, hâi khế vâ lăm tăng tí ki tê, la ki kal má môi athế rĕng teăm pêi pro mâu tơdroăng ki tơveăng, tŏng kum tơdrêng, tơniăn, rak vế ivá châ chăn ăm kuăn pơlê. Xua mê, ai hên mâu ngế ƀok thái pơkeăng, mâu hngêi pơkeăng, mâu khu pơkuâ ngăn ’na pơkeăng ƀă khăm pơlât athế pôu râng dêi mâu hnoăng cheăng ki ai tơdrêng tiah mê. Xua mê, pơcháu hnoăng pôu râng cheăng ăm khu kơ koan ngăn ’na pơkeăng, hngêi pơkeăng, mê Khu xiâm ngăn pơkeăng ƀă khăm pơlât athế ‘no dêi hnoăng séa ngăn ƀă tâi tâng kuăn pơlê, mâu khu râ pơkuâ cheăng kal kí rơtế veăng séa mơnhên ngăn, pêi pro ‘na tơdroăng ki mê. Tơdroăng ki pôu râng dêi hnoăng cheăng tiah mê ki tơdrêng xuân kal athế tơdrăng, hơpâ khât, athế tối tơbleăng, athế pêi pro, athế tối pơtâng ƀă athế tí tăng séa mơnhên ngăn tơdroăng cheăng, ôh tá xê riân ngăn kơxô̆ liăn’’.

5.100 rơtal liăn cho kơxô̆ ki ôh tá xê iâ - cho hnoăng cheăng, xuân cho ki kơdo mơ-eăm, khŏm kâi chiâng dêi Chin phuh tung tơ’mot - mơ’no kơxô̆ liăn, tung pơla tơdroăng pêi cheăng kâ - rêh ối pơlê pơla ai tơdjâk kân ó ing pơreăng plâ vâ chê 2 hơnăm kố. Maluâ ti mê, môi tiah tơdroăng ki hriăn plĕng dêi mâu ngế ki rơkê mê, ngăn i nhên tung pơlê pơla, kố xuân cho môi tung mâu tơdroăng pơkâ ki ai tơdjâk, lân rơdâ, xua ga, Chin phuh hiăng khŏm mơ-eăm hbrâ, tơplâ, mơdât pơreăng ki kân ó má môi, kuăn pơlê, pơlê pơla, khu mơdró, tâi tâng khu pêi cheăng, rêh ối pơlê pơla hmâ vâ hmâ ôh xuân hlo nhên ƀă kơdo mơ-eăm, khŏm pôu râng hnoăng cheăng dêi tơná. Tơdroăng ki Vingroup dế tơveăng kum rôe ƀă mơjiâng kơmăi hiâm, rế pêi cheăng kâ rơkê, ƀlêi chiâng, ing mê, kô châ mơ’no tê dêi pơkeăng ki kơdĭng - veăng kum ăm tơnêi têa tung hbhrâ mơdât, tơplâ ƀă pơreăng cho tơdroăng ki pơtih.

Ôh tá chiâng tối ôh tá pơxúa – kố cho tơdroăng cheăng dêi ngế mơdró, khu mơdró ki pêi lo liăn ngân xiâm, ai hên liăn ngân, laga, pin hlo nhên, Chin phuh kơdo mơ-eăm xua vâ kring vế, rak ngăn ivá, châ chăn, tơdroăng rêh dêi kuăn pơlê xuân cho ki xiâm vâ pơlê pơla hmiân, rak tơniăn tuăn rơtế ƀă Chin phuh pêi pro mâu hnoăng cheăng ki mê. Tơdroăng ki u ối mê cho a khu râ ki vâ pêi pro – tơdroăng kố, Khu xiâm ngăn pơkeăng ƀă khăm pơlât, Khu xiâm râng liăn ngân ƀă mâu kơ koan, khu râ ai tơdjâk, xúa athế tơ-ƀrê, tơdrăng, hơpâ păng ‘nâng ing kơxô̆ liăn ki mê – kal pơtối mơhno hnoăng cheăng ki ó rơdêi, pôu râng hngăm hên tâ nếo dêi mâu khu râ, kơvâ cheăng,; mâu ngế krê tung hneăng hbrâ, tơplâ, mơdât pơreăng.

THU TRANG - VOV1 chêh

Nhat Lisa tơplôu ƀă tơbleăng