VOV4.Sêdang - Pơtối tơdroăng Hneăng hôp má 11, kơxo lơ 2/4, Kuô̆k hô̆i hiăng têk kŏng tơbleăng ăm pêi pro pơkâ ‘na  tơdroăng ăm pôa Nguyễn Xuân Phúc pơtê pro Ngế pro xiâm hnê ngăn tơnêi têa Kŏng hoa xah hô̆i chuh ngiah Việt Nam. Pơkâ châ Kuô̆k hô̆i tơbleăng ăm pêi pro ƀă hên mâu kăn teăng mâ Kuô̆k hô̆i vâ môi tuăn. Teăng mâ Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i mơnê ƀă diâp reăng ăm pôa Nguyễn xuân Phúc.

Hdrối mê, pôa Nguyễn Phú Trọng, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng tơbleăng mơ-éa a ngiâ Kuô̆k hô̆i. Mơ-éa chêh tơbleăng tối nhên, a hneăng hôp má môi Kuô̆k hô̆i hneăng má 14, pôa Nguyễn Xuân Phúc châ Kuô̆k hô̆i loi tơngah rah xo to pro Ngế pro xiâm hnê ngăn tơnêi têa.

Tung pơla pôu râng hnoăng cheăng, pôa Nguyễn Xuân Phúc đi đo pêi kêi đeăng hnoăng cheăng châ pơcháu. Kô hlo hneăng hơnăm 2016 – 2021 cho môi hneăng cheăng ki má môi, Chin phuh hiăng pât djâ Việt Nam tơkâ hluâ mâu tơdroăng pá puât ƀă châ tơƀrê lĕm. Xuân tung kơxo lơ 2/4, Vi ƀan pơkuâ Kuô̆k hô̆i tơbleăng Kuô̆k hô̆i ăm Kăn xiâm hnê ngăn tơnêi têa pơtê cheăng; mâu kăn tâ phĭu rah xo kăn xiâm hnê ngăn tơnêi têa.

A Sa Ly tơplôu ƀă tơbleăng