VOV4.Sêdang - Tung tối tơbleăng hnoăng cheăng   hneăng 14 dêi Kuô̆k hô̆i tối nhên: hneăng hơnăm hdrối kố nah hiăng pêi pro châ tơƀrê tung tâi tâng mâu kơvâ cheăng sap ing luât, séa ngăn, pơkâ tơdroăng ki kal dêi tơnêi têa troh tơpui kâ Kuô̆k hô̆i. Ing mê, hiăng veăng kum ăm tơnêi têa tơkâ luâ xơpá, pro chiâng mâu tơdroăng ki hơ’leh kơhnâ, rơdêi tung rêh ối, cheăng kâ, kring vế, gak ngăn pơlê pơla cheăm bêng, tơpui kâ, hơ’leh nếo ƀă mơdêk tơdroăng rêh ối kuăn pơlê.

Hneăng pêi cheăng Kuô̆k hô̆i hneăng 14 hiăng mơdêk ƀă mơnhông tơ-ƀrê tung tơdroăng mơjiâng luât, pro xiâm ki tro tâi tâng ăm tơdroăng mơnhông mơdêk rĕng, krá kâk dêi tơnêi têa. Tung hneăng kố nah, ai 72 luât, 2 tơdroăng chêh tung hlá mơ-éa luât ƀă hên tơdroăng ai pơkâ chiâng luât châ tơbleăng hiăng pro xiâm ki pro tro ăm tơdroăng hơ’leh nếo, mơdêk ki xêt, tơ-ƀrê tung tơdroăng xúa pêi pro dêi khu kăn tơnêi têa. Pơtối rak ki môi tuăn kuăn pơlê ƀă hnoăng pro xiâm dêi Kuăn pơlê; mơnhông cheăng kâ tê mơdró tiô troăng hơlâ xah hô̆i chuh ngiah.

Jâ Nguyễn Thị Kim Ngân, Kăn xiâm hnê ngăn Kuô̆k hô̆i ăm ‘nâi, tơdroăng cheăng séa ngăn châ tơmâng khât, tơdroăng ki seá ngăn ai chêh tối ki kal, chêh tối nhên tâi tâng mâu tơdroăng, rế ton rế mơdêk tơƀrê, pơxúa hên tơdroăng ki kal, châ kuăn pơlê khĕn kơdeăn. Ing tơdroăng séa ngăn hiăng tối tro dêi luât pơkâ, pơtối rak vế pêi pro mâu tơdroăng ki tro dêi luât, pơtối rak vế pêi pro mâu tơdroăng cheăng ki ‘ló tro, teăm châ ‘nâi ki ôh tá tro.

Séa ngăn tơdroăng pơkâ pơtối pêi pro trâu rơdâ, nhên ƀă 7 tơdroăng pơkâ ki tơdjâk troh mơnhông cheăng kâ - rêh ối pơlê pơla ƀă tơdroăng rêh ối dêi kuăn pơlê, túa ki vâ hơ’leh, mơdêk, rế ton rế tro, rế rơkê:

“Kơ-êng ƀă tiâ tơdroăng kơ-êng pơtối ai hên ki hơ’leh nếo, malối cho tơdroăng “kơ êng rĕng, tiâ ‘nâng ‘nâi” hiăng pro tơ’lêi hlâu vâ mơdêk tá kơxô̆ mâu kăn Kuô̆k hô̆i kơ-êng, tơpui tơpeăng, tá tơdroăng kal kơ-êng ƀă ki tơƀrê dêi tơdroăng kơ-êng, tơdroăng ki tiâ, pro ăm hneăng hôp ro, tơ’mot hên ngế vâ hmâng dêi mâu kăn Kuô̆k hô̆i, kuăn pơlê ki lăm tâ phĭu ƀă kuăn pơlê tung lâp tơnêi têa.

Tơdroăng tơmâng xo phĭu ki pôk rah xo ƀă mâu ngế ki dế pro kăn xua kăn Kuô̆k hô̆i rah xo lơ kĭ ăm phêp châ pêi pro tro kơtăng, veăng ‘no hnoăng pơtối rak ki môi tuăn tung tơdroăng cheăng dêi kơ koan kuăn pơlê rah xo xuân môi tiah tung tơdroăng rêh ối pơlê pơla”.

Ƀơrô Diên Hồng, Hngêi kăn pêi cheăng Kuô̆k hô̆i Việt Nam

Kuô̆k hô̆i hneăng 14 hiăng séa ngăn, pơkâ hên tơdroăng ki kal dêi tơnêi têa, ai tá tơdroăng tơdjâk kân troh ‘na rêh ối pêi cheăng kâ-pơlê pơla, mơnhông mơdêk kơpong hdroâng kuăn ngo, rơtế ƀă hnoăng cheăng pro tơniăn ‘na lêng, ‘na kring gak, tơpui tơno. Kuô̆k hô̆i hneăng 14 hiăng séa ngăn, pơkâ hên tơdroăng kal dêi tơnêi têa, ai tơdjâk tá tơdroăng cheăng kâ - rêh ối pơlê pơla, mơnhông kơpong kong ngo hdroâng kuăn ngo, rơtế ƀă tơdroăng cheăng kring vế tơniăn pơlê pơla tơnêi têa, ‘na tơpui kâ.

Kuô̆k hô̆i  hiăng pơkâ troăng hơlâ ‘no liăn pêi mâu tơdroăng tơkêa bro, mơjiâng tơmeăm khoăng ki kal dêi tơnêi têa, ai pơxúa kân ƀă tơdroăng mơnhông cheăng kâ-rêh ối dêi tơnêi têa môi tiah mơjiâng pro mâu troăng kân tơdrăng lĕm sap peăng Kơnhŏng troh peăng Hdroh ‘na Mâ hâi lo pơla hơnăm 2017-2020, mâu tơdroăng tơkêa pro ki klâ pro dêi tơdroăng tơkêa mơjiâng pro Tơraih tơ-ƀai lâp plâi tơnêi Long Thành; pơkâ pơtê pro tơdroăng tiô troăng hơlâ ‘no liăn pro on tơhrrik kơtâu ƀă trếo tik nik Ninh Thuận ƀă hía hé.

Tơdroăng ‘na mơngế pêi cheăng châ séa ngăn, pro kơtăng, nhoăm, tro tiô pơkâ, ai tiô tơdroăng vâ pêi nôkố ƀă ai hên ngế vâ môi tuăn. Tơdroăng séa ngăn, pơkâ mơjiâng, tơ’mot, ‘mâi hơ’leh tơnêi tíu ƀă xĭng xoăng mâu tíu pêi cheăng râ tơring, râ cheăm a mâu kong pơlê, pơlê kong kơdrâm, kong kân râ xiâm tơnêi têa hiăng veăng ‘no hnoăng tơbleăng pêi ai pơxúa troăng hơlâ dêi Đảng, tơdroăng pơkâ dêi Kuô̆k hô̆i ‘na rah xo iâ mơngế pêi cheăng tung khu kăn xiâm, mơnhông cheăng kâ - rêh ối, kring vế tơniăn pơlê pơla tơnêi têa. 

Mâu kăn Kuô̆k hô̆i xuân cho tíu tơdjêp ki kal pơla Kuô̆k hô̆i ƀă kuăn pơlê ing tơdroăng tơmâng, tối ki tro tuăn tơmiât, ki mơ-eăm púi vâ dêi Kuăn pơlê a tơdroăng pơkâ xuân môi tiah hnê tối, djâ tơdroăng pơkâ tŏng kum ƀă tơdroăng pơkâ dêi luât xúa tung rêh ối. Jâ Nguyễn Thị Kim Ngân, Kăn xiâm hnê ngăn Kuô̆k hô̆i tối:

“Hneăng pêi cheăng Kuô̆k hô̆i hneăng 14 hiăng pêi klêi ƀă mâu tơdroăng ăm hlo klêi tâi tâng mau tơdroăng ing mơjiâng luât, séa ngăn, pơkâ mâu tơdroăng ki kal dêi tơnêi têa troh tơdroăng tơpui kâ dêi Kuô̆k hô̆i hiăng veăng mơnhông djâ tơnêi têa chôa lâng prôk tơkâ luâ tŭm tơdroăng pá, pro ai tơdroăng hơ’leh hên, rơdêi tung mâu tơdroăng rêh ối cheăng kâ - pơlê pơla, ‘na tơdroăng mâu lêng kring gak tơnêi têa, kring vế tơniăn pơlê cheăm,‘na tơpui kâ, ‘mâi mơnhông tung rêh ối dêi kuăn pơlê, veăng ‘no hnoăng pơxúa kân tung hnoăng cheăng pơla 35 hơnăm hơ’leh nếo, pro kro tơ’nôm tơdroăng hmâ pêi pro ki lĕm tro tung pơla 75 hơnăm dêi Kuô̆k hô̆i”.

Rôh kố, teăng mâ Kuô̆k hô̆i, jâ Nguyễn Thị Kim Ngân, Kăn xiâm hnê ngăn Kuô̆k hô̆i tối mơnê khât kơ tâi tâng kuăn pơlê tung lâp tơnêi têa hiăng loi nhoăm loi khât pơcháu hnoăng cheăng ki dêi mâu kăn Kuăn pơlê; tơdroăng ki tơrŭm, kuăn pơlê ai hnoăng cheăng ƀă Kăn hnê ngăn tơnêi têa, Chin phuh, Vi ban xiâm Măt trâ̆n tơnêi têa Việt Nam, Hngêi tơleăng xiâm, Tíu xiâm séa ngăn arak luât, mâu kơ koan, khu tơrŭm cheăng xuân môi tiah tơdroăng tơrŭm, veăng kum dêi mâu vâi pú tung lâp plâi tơnêi.

VOV1 chêh

Gương tơplôu ƀă tơbleăng