VOV4.Sêdang - Pơtối hôp roh má 11, Kuô̆k hô̆i  hneăng 14, kơxê lơ 31/3 xua pôa Vương Đình Huệ, Ngế ki nếo to pro Kăn xiâm hnê ngăn Kuô̆k hô̆i pơkuâ hneăng hôp, Kuô̆k hô̆i hiăng vâ môi tuăn têk kŏng tơbleăng tơdroăng Pơkâ ôh tá rah xo xếo 3 ngế Kăn xiâm phŏ hnê ngăn Kuô̆k hô̆i. Ai hên kơxô̆ phĭu vâ, Kuô̆k hô̆i tơbleăng ôh tá rah xo 3 ngế kăn xiâm phŏ hnê ngăn Kuô̆k hô̆i . Kuô̆k hô̆i  pơkâ:  Ôh tá vêh rah xo xếo Kăn xiâm phŏ hnê ngăn Kuô̆k hô̆i hneăng 14, mê cho: jâ Tòng Thị Phóng, pôa Uông Chu Lưu ƀă pôa Phùng Quốc Hiển. Tơdroăng pơkâ mê xêt sap ing châ Kuô̆k hô̆i têk kŏng tiâ vâ môi tuăn.

Pơtối mê, Vi ƀan pơkuâ cheăng Kuô̆k hô̆i pơtroh inâi rah xo vâ Kuô̆k hô̆i pôk mâu ngế pro Kăn xiâm phŏ hnê ngăn Kuô̆k hô̆i ƀă tơpui tơno a Khu ‘na tơdroăng hbrâ mơngế pêi cheăng vâ tâ phĭu rah xo mâu kăn xiâm phŏ hnê ngăn Kuô̆k hô̆i.

Hâi kố, Vi ƀan pơkuâ cheăng Kuô̆k hô̆i tơbleăng ăm Kuô̆k hô̆i  tơdroăng tơpui tơno a khu ƀă tối nhên mâu tơdroăng tơmâng xo dêi mâu kăn Kuô̆k hô̆i tối ‘na hbrâ mơngế vâ tâ phĭu rah xo mâu Kăn xiâm phŏ hnê ngăn Kuô̆k hô̆i. Kuô̆k hô̆i tâ phĭu rah xo mâu Kăn xiâm phŏ hnê ngăn Kuô̆k hô̆i ƀă tơdroăng tâ phĭu pơkí.

Pơtối mê, Kuô̆k hô̆i tơpui tơno a hngêi hôp kân ‘na tơdroăng tơbleăng hnoăng cheăng pêi hneăng hơnăm 2016-2021 dêi Khu xiâm riân ngăn liăn Tơnêi têa.

Gương tơplôu ƀă tơbleăng