VOV4.Sêdang - Xuân tung hâi lơ 1/4, Kuô̆k hô̆i tơpui tơno a hngêi hôp kân ‘na Tơbleăng tơdroăng pêi cheăng hneăng hơnăm 2016 – 2021 dêi Khu xêo ngăn tơmeăm khoăng Tơnêi têa; tơpui tơno ‘na pơkâ kơxô̆ mâu kăn pêi cheăng dêi Hô̆i đong kuăn pơlê dêi pơlê kong kân Hà Nội hneăng hơnăm 2021 – 2026. Tơbleăng ‘na tơdroăng xêo ngăn tơmeăm khoăng Tơnêi têa hneăng hơnăm 2016 – 2021 ăm hlo, Khu xêo ngăn tơmeăm khoăng Tơnêi têa hiăng pêi pro pơkâ xêo ngăn tơmeăm khoăng ƀă châ tơƀrê hên, kum kal khât pêi pro troăng hơlâ pêi cheăng, hbrâ mơdât kâ kơhveăm liăn ngân, mơ’nhê tê kơtê tơmeăm khoăng tơnêi têa ƀă thăm pêi tiô pơkâ, mơdêk ki châ tơƀrê tung pơkuâ, xúa liăn ngân, tơmeăm khoăng tơnêi têa.

Ki nhên, tung hneăng hơnăm, Khu xêo ngăn tơmeăm khoăng Tơnêi têa pâ thế pơkuâ ‘no hrê tơtro lối 353 rơpâu 700 rơtal liăn; pơtroh 20 roh  tơdroăng ai pro xôi a kơ koan Kan sat séa ngăn mơnhên ƀă pơxâu phak tiô pơkâ dêi luât. ‘Na tơdroăng pêi pro pơkâ thế khu xêo ngăn tơmeăm khoăng tơnêi têa, hneăng hơnăm 2016 – 2021. Kơxô̆ mơngế pâ thế ‘na pơkuâ tơtro ‘na mơ’no hrê liăn ngân dêi Khu xêo ngăn tơmeăm khoăng Tơnêi têa hiăng châ mâu tíu cheăng pêi pro cho lối 237 rơpâu 500 rơtal liăn, châ 73,6% tâng tơdroăng pâ thế; hên mơ-éa hiăng châ Chin phuh, mâu khu xiâm, kơvâ cheăng ƀă kong pơlê pêi pro tah lôi, ‘mâi rơnêu, tơ’nôm tiô pâ thế dêi Khu xêo ngăn tơmeăm khoăng tơnêi têa.

A Sa Ly tơplôu ƀă tơbleăng