VOV4.Sêdang - Maluâ cho môi tung mâu kơpong ki ai têa hên a kong pơlê Dak Lak, la tơring Lak xuân ối trâm pá tung rak vế tơniăn têa ôu hum ăm kuăn pơlê, malối a rơnó tô mơdrăng. Thăm nếo, a pơlê kân Liên Sơn, a kĭng long Lăk, cho têa long ki kân má môi a Tây Nguyên, hlo hên ngế kuăn pơlê xuân athế tí tăng lăm rôe têa vâ ôu hum. Tơdroăng kố, hiăng hên hdroh kuăn pơlê tơngah khu kăn pơkuâ, la xuân tá hâi teăm ai tŏng kum rơhéa to lâi.

Xuân môi tiah hên rơpŏng kuăn pơlê kân Liên Sơn, pôa Ngô Công Tâm ối a tôh kơphô̆ Hòa Thắng, hiăng hên hâi kố thế rôe chuâ tung kơƀin vâ ôu ƀă pế pơchên kế kâ. Rơpŏng bu ai péa ngế, xuân thế kơdroh xúa têa, laga rêm khế xuân tâi sap ing 300.000 – 350.000 liăn.

“Hngêi á ối péa ngế krâ tê, môi hâi xúa 1 kơƀin 20 lit vâ ôu, pế tơmeăm kâ. Môi hâi dâng 1 kơƀin mê tung 30 chât hâi cho hía 300.000 – 400.000 liăn/khế. Têa klôh hrik mê xuân ai eâk krêng tâi, bu hum, rôh tơmeăm khoăng ƀă xếo plông hngêi, xut hngêi. Têa xú khê ƀă mơngiơk prăng tiah mê ôh tá chiâng vâ xúa. Kuăn pơlê pá puât xua ôh tá bê têa krúa ô hum rôh jiếo.

A mâu roh hôp kuăn pơlê lơ tôh kơphô̆, ngin kuăn pơlê pâ thế khu râ kăn kơpêng hên ‘nâng, laga vâi bu mơnhên tê mê tá hâi kum klâi ăm kuăn pơlê’’.

Rơpâu rơpŏng a mâu cheăm, pơlê kân dêi tơring Lak, kong pơlê Dak Lak ôh tá bê têa krúa tung hên hơnăm hiăng hluâ

Ƀă jâ Đoàn Thị Hồng ối a tôh kơphô̆ Hòa Thắng tối, têa krúa chuâ ăm kuăn pơlê tung kơpong hiăng tơ’nhê ƀă pêi cheăng ôh tá châ tơƀrê xếo. Sap ing hên hơnăm kố, vâi krâ pơrá rôe têa kơthung lơ têa tung kong kếo kân vâ pế pơchên kế kâ ƀă ôu. Krê hngêi jâ tê mơdró kế tơmeăm ôu kâ, thế rôe têa tung kơthung ki kân nếo bê vâ xúa, xua mê tro lŭp hên liăn ngân.

Jâ Hồng rơtế hrĭng rơpŏng tung kơpong pói vâ kơ koan cheăng tŏng kum, pro tơ’lêi hlâu vâ ai têa krúa tơniăn xúa.

“Hngêi á tê mơdró hơpê chôu vâ tê a kơchơ pơlê kân xua mê xúa têa hên ‘nâng.  Rơnó mêi mê xúa kơthung têa kân dâ têa mêi vâ xúa, rơnó tô mê xúa têa kơmăi laga hên hơnăm kố mê thế rôe têa tung kơthung ki kân vâ xúa. Rôe têa tung kơthung ki kân mê lŭp hên liăn ngân, tê mơdró ôh tá châ tơkâ. Ô eăng ối a pơlê kân mê ôh tá ai têa krúa vâ xúa. Vâi krâ nôkố pói vâ tơnêi têa tơmâng mơ’no liăn pro troăng têa krúa vâ vâi krâ kơdroh pá puât”.

Têa klôh ai eâk krêng rơtế ƀă tơdroăng mâu tíu hdoăng têa krúa tơ’nhê ôh tá chiâng xúa xêo pro kuăn pơlê a mâu cheăm ối tung tơring Lak, kong pơlê Dak Lak pá puât

Séa ngăn dêi Vi ƀan pơlê kân Liên Sơn ăm hlo, lâp pơlê kân ai 1.680 rơpŏng ƀă lối 6.590 pơ’leăng mâ mơngế bu hlo ai môi tíu hdoăng têa krúa 150 met khô̆i/hâi măng. Tơmeăm kố châ mơ’no liăn pro sap hơnăm 2000 ƀă dế kố hiăng ôh tá dâi lĕm xếo, bu chuâ dâng 90 – 100 met khô̆i/hâi măng, tá hâi bê châ 1/5  tơdroăng kal vâ.

Vi ƀan pơlê kân Liên Sơn xuân hiăng hên xôh pơtroh pâ thế dêi kuăn pơlê a Vi ƀan tơring ƀă hiăng châ mơnhên, laga troh nôkố, tung pơlê kân xuân tá hâi ai tơ’nôm tíu chuâ têa krúa ăm kuăn pơlê ki lâi châ mơjiâng.

Tiô pôa Nguyễn Anh Tú – Kăn pơkuâ Khu pơkuâ tơdroăng tơkêa bro tơring Lak, hên hơnăm kố, tơdroăng ôh tá bê têa krúa ô hum rôh jiếo hlo ai ôh tá xê to a pơlê kân Liên Sơn mê ối ai a hên mâu cheăm, môi tiah cheăm Dak Nuê, Dak Liêng, Buôn Tría…

Xiâm kối xuân xua mâu cheăm kố a’nâi, têa ai eâk krêng. Ki ê nếo, xua tâi tâng mâu tíu hdoăng têa krúa tơkŭm pơrá hiăng tơ’nhê, ôh tá chiâng vâ xúa.

Pôa Nguyễn Anh Tú tối, rĕng má môi xuân thế troh hơnăm 2023, tơdroăng têa krúa a mâu cheăm dêi tơring Lak nếo châ mơjiâng pro, ƀă 4.500 rơpŏng kuăn pơlê châ xúa têa ing môi tơdroăng tơkêa bro 3.600 met khôi môi hâi môi măng.

“Troh nốkố Hô̆i đong kong pơlê Dak Lak hiăng kĭ troăng hơlâ mơ’no liăn pêi pro tơdroăng tơkêa bro kơnâ 90 rơtal liăn ăm Vi ƀan tơring Lak pêi pro  tơdroăng tơkêa bro têa krúa. Hneăng má 1 hơnăm 2021 mê hiăng mơ’no liăn châ 5 rơtal liăn pêi pro tơdroăng séa ngăn ƀă pro hô sơ vâ pro.

Ƀă pơtối mê, hơnăm 2022 tiô pơkâ mơ’no liăn ngân dêi Khu pơkuâ túa cheăng ƀă mơ’no liăn cheăng mê pơtối pêi pro hneăng má 2 dêi tơdroăng tơkêa bro kêi đeăng tung hơnăm 2023 ƀă ăm xúa.

A Sa Ly tơplôu ƀă tơbleăng