VOV4.Sêdang - Hâi lơ 25/5, Khu pơkuâ ngăn pơkeăng ƀă khăm pơlât Lâm Đồng tối ăm ‘nâi, hiăng ai 241 ngế tơdjâk ngế tro tâ pơreăng má 3141 klêi khăm ngăn âm tĭnh roh má 3 ƀă COVID 19. Tung kơxô̆ kố, ai 121 ngế châ lo ing kơpong klâ kơtăn tơkŭm vâ vêh a hngêi kơ’nâi mê pơtối klâ kơtăn tơ’nôm 7 hâi tiô pơkâ.

Khu cheăng dế pro mơ-éa ăm mâu ngế klâ kơtăn hiăng klêi châ vêh a hngêi

Nôkố Lâm Đồng xuân dế pêi pro klâ kơtăn 355 ngế, tung mê, ai 152 ngế tơdjâk ngế tro tâ pơreăng 3141, ki ê cho mâu ngế ing kơpong ai pơreăng troh Lâm Đồng. Tung kơxô̆ kố, ai 21 ngế klâ kơtăn a hngêi pơkeăng, 259 ngế klâ kơtăn tơkŭm ƀă 75 ngế klâ kơtăn a hngêi.

Tiô Khu pơkuâ ngăn pơkeăng ƀă khăm pơlât kong pơlê Lâm Đồng, mơhé Lâm Đồng tá hâi châ hlo ngế ki lâi dương tĭnh ƀă COVID 19, laga drêng pơreăng xông tâ tú ó, mâu troăng hbrâ mơdât pơreăng xuân dế châ mâu kơ koan cheăng dêi kong pơlê Lâm Đồng thăm pêi pro. Tung mê, kong pơlê hiăng hbrâ hên troăng vâ hbrâ mơdât tâng ai pơreăng xông tâ tú.

A Sa Ly tơplôu ƀă tơbleăng